ഏറ്റവും എരിവുള്ള മുളക് കഴിച്ച് റെക്കോർഡ് നേടി യുഎസ്സ് പൗരൻ, സമ്മതിച്ചു എന്ന് സോഷ്യൽ മീഡിയ

ഗിന്നസ് വേൾഡ് റെക്കോർഡ് തങ്ങളുടെ ഇൻസ്റ്റ​ഗ്രാം പേജിൽ ​ഗ്രി​ഗറി മുളക് കഴിക്കുന്നതിന്റെ വീഡിയോ പങ്കുവച്ചിട്ടുണ്ട്. എന്നാലും ഇത്രയും എരിവുള്ള മുളക് കഴിക്കാൻ ​ഗ്രി​ഗറിക്കെങ്ങനെ ധൈര്യം വന്നു എന്നത് പലരേയും അമ്പരപ്പിച്ചു. 

എരിവിനോട് ഇഷ്ടമുള്ളവരുണ്ടാകും. എന്നുവച്ച് അത് കഴിക്കാനാവുന്നതിന് ഒരു പരിധിയില്ലേ? ഇവിടെ ഒരാൾക്ക് അങ്ങനെ യാതൊരു പരിധിയും ഉണ്ടായിരുന്നില്ല. 8.72 സെക്കൻഡിൽ മൂന്ന് കരോലിന റീപ്പർ മുളക്(Carolina Reaper chilli peppers ) കഴിച്ച് അദ്ദേഹം ഗിന്നസ് റെക്കോർഡ് (Guinness World Record) സ്ഥാപിച്ചു. ഓ, എന്ന് പറയാൻ വരട്ടെ. ലോകത്തിലെ തന്നെ ഏറ്റവും എരിവുള്ള മുളകാണ് കരോലിന റീപ്പർ. ​ഗ്രി​ഗറി ഫോസ്റ്റർ (Gregory Foster) എന്ന യുഎസ് പൗരനാണ് ഈ റെക്കോർഡ് നേട്ടം സ്വന്തമാക്കിയത്.

ഒന്നിനു പിറകെ ഒന്നായി മൂന്ന് മുളകുകളാണ് ​ഗ്രി​ഗറി കഴിച്ചു തീർക്കുന്നത്. തീർന്നില്ല, വെറുതെ കഴിക്കുകയല്ല. യാതൊരു ഭാവവ്യത്യാസവും കൂടാതെയാണ് ​ഗ്രി​ഗറി മുളകുകൾ കഴിച്ചു തീർക്കുന്നത്. എന്നാൽ, പിന്നീട് ആദ്യത്തെ മുളക് കഴിച്ച് തുടങ്ങിയപ്പോൾ തന്നെ തനിക്ക് അസ്വസ്ഥത അനുഭവപ്പെട്ടിരുന്നു എന്ന് ​ഗ്രി​ഗറി പറഞ്ഞിരുന്നു. ഈ റെക്കോർഡിന് മുമ്പ് ഒരുമിനിറ്റിൽ ഏറ്റവും കൂടുതൽ മുളക് കഴിച്ചതിന്റെ റെക്കോർഡ് ​ഗ്രി​ഗറി നേടിയിരുന്നു. 120 ​ഗ്രാം കരോലിന റീപ്പർ ആണ് അന്ന് അദ്ദേ​ഹം കഴിച്ചത്.

ഗിന്നസ് വേൾഡ് റെക്കോർഡ് തങ്ങളുടെ ഇൻസ്റ്റ​ഗ്രാം പേജിൽ ​ഗ്രി​ഗറി മുളക് കഴിക്കുന്നതിന്റെ വീഡിയോ പങ്കുവച്ചിട്ടുണ്ട്. എന്നാലും ഇത്രയും എരിവുള്ള മുളക് കഴിക്കാൻ ​ഗ്രി​ഗറിക്കെങ്ങനെ ധൈര്യം വന്നു എന്നത് പലരേയും അമ്പരപ്പിച്ചു. ഏതായാലും നിങ്ങളെ സമ്മതിച്ചു എന്നും പറഞ്ഞുകൊണ്ട് ​ഗ്രി​ഗറിയെ അഭിനന്ദിച്ച് ഒരുപാടുപേർ വീഡിയോയ്ക്ക് കമന്റിട്ടിട്ടുണ്ട്. അതിനകത്ത് തന്നെ ഈ വീഡിയോ മുഴുവനും കാണാൻ വയ്യേ എന്ന് പറഞ്ഞവരും കുറവല്ല.  

കനേഡിയന്‍ പൗരന്‍ മൈക്ക് ജാക്കിന്റെ റെക്കോഡ് ആണ് ഇപ്പോൾ ഗ്രിഗറി തകര്‍ത്തിരിക്കുന്നത്. 9.72 സെക്കന്‍ഡ് സമയമെടുത്താണ് ജാക്ക് കരോലിന റീപ്പര്‍ മുളക് കഴിച്ചു തീർത്തിരുന്നത്. 

ഏതായാലും എരിവുള്ള വീഡിയോ കാണാം: