ഞാൻ നിന്നെ സ്നേഹിക്കുന്നു, നീയോ; പ്രണയത്തിന്‍റെയും വിരഹത്തിന്‍റെയും സന്ദേശങ്ങൾ കൊത്തിവച്ച, നൂറ്റാണ്ടുകൾ പഴക്കമുള്ള റൂൺ കല്ലുകൾ

വൈക്കിംഗുകൾ കൊത്തിവെച്ച പ്രണയത്തിന്റെയും വിരഹത്തിന്റെയും സന്ദേശങ്ങൾ കാത്തുസൂക്ഷിക്കുന്ന റൂണ്‍ കല്ലുകള്‍. ഒരു കുടുംബത്തിന്റെ സമ്പത്തും സാമൂഹിക പദവിയും പ്രദർശിപ്പിക്കാനുള്ള മാർഗ്ഗം കൂടിയായിരുന്ന ഈ ശിലകൾ.

സ്വീഡനിലെ പാടവരമ്പുകളിലും ദേവാലയ പരിസരങ്ങളിലും പാതയോരങ്ങളിലും ആരുടെയും ശ്രദ്ധയിൽപ്പെടാതെ കിടക്കുന്ന ചില പുരാതന ശിലകളുണ്ട്. അവയാണ് റൂൺ കല്ലുകൾ. ആളുകൾ ഇവയെ ഗൗനിക്കാതെ കടന്നുപോകാറുണ്ടെങ്കിലും, ആയിരം വർഷങ്ങൾക്ക് മുമ്പ് ജീവിച്ചിരുന്ന മനുഷ്യരുടെ ചില സന്ദേശങ്ങൾ വരെയും ഈ കല്ലുകൾ ഇന്നും കാത്തുസൂക്ഷിക്കുന്നു. വൈക്കിംഗുകൾ ഈ കല്ലുകളിൽ കൊത്തിവെച്ച സന്ദേശങ്ങൾ പ്രണയത്തെയും വിരഹത്തെയും അഭിമാനത്തെയും അവരുടെ ദൈനംദിന ജീവിതത്തെയും കുറിച്ചുള്ളതാണ്. കർഷകർ നിലം ഉഴവുമ്പോഴോ നിർമ്മാണ തൊഴിലാളികൾ മണ്ണുമാറ്റുമ്പോഴോ ഒക്കെ ഇന്നും ഇത്തരം ശിലകൾ അവിടെ കണ്ടെത്തുന്നുണ്ടെന്ന് വിദഗ്ധർ പറയുന്നു. പ്രണയത്തെയും വിരഹത്തെയും വേദനയെയും ഒക്കെ കുറിച്ചുള്ള സന്ദേശങ്ങളും ഈ കല്ലുകളിലുണ്ട്.

ഗോഥെൻബർഗിന് സമീപം കണ്ടെത്തിയ ഒരു ചെറിയ കല്ലിൽ കൊത്തിവെച്ചിരിക്കുന്നത് ഇങ്ങനെയാണ്: 'നീ എന്നെ ഓർക്കുന്നുണ്ടോ? ഞാൻ നിന്നെ ഓർക്കുന്നു. നീ എന്നെ സ്നേഹിക്കുന്നുണ്ടോ? ഞാൻ നിന്നെ സ്നേഹിക്കുന്നു.' അതുപോലെ, നല്ലൊരു വീട്ടമ്മയായിരുന്നു തന്റെ ഭാര്യയെന്നാണ് ഒരു ശിലയിൽ ഭർത്താവ് എഴുതിയിരിക്കുന്നത്. വിദേശത്ത് യുദ്ധത്തിൽ മരിച്ച മകനെ ഓർക്കുന്ന പിതാവിന്റെ സന്ദേശമാണ് മറ്റൊരു കല്ലിൽ ഉള്ളത്.

റൂൺ കല്ലുകൾ നിർമ്മിക്കുന്നത് അക്കാലത്ത് വലിയ ചെലവുള്ള കാര്യമായിരുന്നു. അതിനാൽ ഇവ വെറുമൊരു സ്മാരകം മാത്രമല്ല, മറിച്ച് ഒരു കുടുംബത്തിന്റെ സമ്പത്തും സാമൂഹിക പദവിയും പ്രദർശിപ്പിക്കാനുള്ള മാർഗ്ഗം കൂടിയായിരുന്നു. 'ജാർലബാങ്കെ' എന്ന വൈക്കിംഗ് പ്രഭു താൻ ജീവിച്ചിരിക്കുമ്പോൾ തന്നെ സ്വയം പുകഴ്ത്തിക്കൊണ്ട് നിരവധി ശിലകളാണ് സ്ഥാപിച്ചത്.

അതുപോലെ, സ്വീഡനിലെ 'റോക്ക് റൂൺ സ്റ്റോൺ' ലോകത്തിലെ ഏറ്റവും ദൈർഘ്യമേറിയ റൂൺ ലിഖിതങ്ങളിലൊന്നാണ്. ഒൻപതാം നൂറ്റാണ്ടിൽ നിർമ്മിക്കപ്പെട്ട ഇതിൽ പുരാതന രാജാക്കന്മാരെക്കുറിച്ചുള്ള കഥകളാണെന്നായിരുന്നു ആദ്യം കരുതിയിരുന്നത്. എന്നാൽ പുതിയ പഠനങ്ങൾ സൂചിപ്പിക്കുന്നത്, നൂറ്റാണ്ടുകൾക്ക് മുൻപുണ്ടായ അതിശൈത്യത്തെയും പ്രകൃതിക്ഷോഭങ്ങളെയും കുറിച്ചുള്ള മുന്നറിയിപ്പുകളോ നക്ഷത്രങ്ങളെയും സൂര്യനെയും കുറിച്ചുള്ള പ്രപഞ്ച രഹസ്യങ്ങളോ ഇതിലുണ്ടാകാം എന്നാണ്.

ലോകമെമ്പാടുമായി ഏകദേശം 7,000 റൂൺ ലിഖിതങ്ങൾ ഇതുവരെ കണ്ടെത്തിയിട്ടുണ്ട്. മരത്തിലും എല്ലിലും തുണിയിലുമെല്ലാം റൂണുകൾ കൊത്തിയിരുന്നെങ്കിലും ശിലകളിൽ കൊത്തിയവയാണ് കാലത്തെ അതിജീവിച്ചത്. ഇന്ന് ആധുനിക കലയിലും ഗെയിമുകളിലും ക്വിസുകളിലുമെല്ലാം ഈ പുരാതന അക്ഷരങ്ങൾ വീണ്ടും ഇടം പിടിക്കുകയാണ്.