കുടുംബത്തിന്റെ ഫോൺഭ്രമം കുറക്കാൻ 3 നിയമങ്ങൾ, കരാറിൽ ഒപ്പുവയ്‍പ്പിച്ച് യുവതി, വൻകയ്യടി

വളരെ പെട്ടെന്ന് തന്നെ പോസ്റ്റ് സോഷ്യൽ മീഡിയയിൽ‌ വൈറലായി. വൻ കയ്യടിയാണ് മഞ്ജു ​ഗുപ്തയുടെ കരാറിന് സോഷ്യൽ മീഡിയയിൽ ലഭിച്ചത്. തികച്ചും ന്യായമായ ആവശ്യങ്ങളാണ് അവർ ഉയർത്തിയിരിക്കുന്നത് എന്നാണ് പലരുടേയും അഭിപ്രായം. 

ഒരു ദിവസത്തിൽ എത്ര മണിക്കൂറുകൾ നിങ്ങൾ ഫോൺ നോക്കും? ഉണർന്നിരിക്കുകയാണെങ്കിൽ ഭൂരിഭാ​ഗം നേരവും ഫോൺ കയ്യിൽ കാണും അല്ലേ? അതിനി ഭക്ഷണം കഴിക്കുമ്പോഴാണെങ്കിലും ടോയ്‍ലെറ്റിൽ പോകുമ്പോഴാണെങ്കിലും വാഹനങ്ങളിലാണെങ്കിലും ഒക്കെ. എന്നാൽ, ഒരു സ്ത്രീ തന്റെ വീട്ടുകാരുടെ ഫോൺ അഡിക്ഷൻ കുറക്കാൻ കണ്ടെത്തിയ ഒരു മാർ​ഗമാണ് ഇപ്പോൾ സോഷ്യൽ മീഡിയയുടെ കയ്യടി നേടുന്നത്. 

ഫോൺ അഡിക്ഷൻ കുറക്കുന്നതിനായി ഇവർ വീട്ടുകാരെ കൊണ്ട് ഒരു കരാറിൽ ഒപ്പ് വയ്പ്പിക്കുകയാണ് ചെയ്തത്. ആ കരാറിന്റെ ചിത്രം അവരുടെ മരുമകൾ തന്നെയാണ് സോഷ്യൽ മീഡിയയിൽ ഷെയർ ചെയ്തത്. മഞ്ജു ​ഗുപ്ത എന്ന സ്ത്രീയാണ് ഈ കരാർ ഉണ്ടാക്കിയിരിക്കുന്നത്. ഈ കരാറിൽ മൂന്ന് നിയമങ്ങളാണ് മഞ്ജു പറയുന്നത്. ആ നിയമം ലംഘിച്ചാൽ ആ മാസം ഓൺലൈൻ ആപ്പ് വഴി സ്വി​ഗിയിൽ നിന്നോ സൊമാറ്റോയിൽ നിന്നോ ഭക്ഷണം ഓർഡർ ചെയ്യാനുള്ള അനുവാദം ഉണ്ടായിരിക്കുന്നതല്ല എന്നും മഞ്ജു വ്യക്തമാക്കുന്നുണ്ട്. 

വീട്ടിലെ എല്ലാവരെക്കൊണ്ടും ആന്റി ഈ കരാർ ഒപ്പുവയ്പ്പിച്ചു എന്നും പോസ്റ്റിൽ മഞ്ജുവിന്റെ മരുമകൾ വ്യക്തമാക്കുന്നുണ്ട്. ഇനി എന്താണ് മഞ്ജുവിന്റെ നിയമങ്ങൾ എന്നല്ലേ? 

1. രാവിലെ ഉണർന്ന് എണീറ്റ ഉടനെ തന്നെ ഫോണിനെ ആരാധിക്കുന്നതിന് പകരം എല്ലാവരും സൂര്യനെ വേണം ആരാധിക്കാൻ. 
2. ഡൈനിം​ഗ് ടേബിളിൽ ഒരുമിച്ചിരുന്നു വേണം എല്ലാവരും ഭക്ഷണം കഴിക്കാൻ. അങ്ങനെ കുടുംബമായി ഭക്ഷണം കഴിക്കുമ്പോൾ ഡൈനിം​ഗ് ടേബിളിൽ നിന്നും 20 അടി മാറിയായിരിക്കണം ഫോൺ വയ്ക്കേണ്ടത്. 
3. ബാത്ത്‍റൂമിൽ പോകുമ്പോൾ ആരും ഫോണും കൊണ്ട് പോകരുത്. അങ്ങനെ റീലും കണ്ട് സമയം കളയുന്നത് ലാഭിക്കാം. 

വളരെ പെട്ടെന്ന് തന്നെ പോസ്റ്റ് സോഷ്യൽ മീഡിയയിൽ‌ വൈറലായി. വൻ കയ്യടിയാണ് മഞ്ജു ​ഗുപ്തയുടെ കരാറിന് സോഷ്യൽ മീഡിയയിൽ ലഭിച്ചത്. തികച്ചും ന്യായമായ ആവശ്യങ്ങളാണ് അവർ ഉയർത്തിയിരിക്കുന്നത് എന്നാണ് പലരുടേയും അഭിപ്രായം. 

കുടുംബം ഒന്നിച്ചിരുന്ന് സംസാരിക്കേണ്ട, വിശേഷങ്ങൾ പങ്കുവയ്ക്കേണ്ട സമയത്തിൽ ഭൂരിഭാ​ഗവും അപഹരിക്കുന്നത് സ്മാർട്ട്‍ഫോണുകളും സോഷ്യൽ മീഡിയകളും ആണല്ലേ? അങ്ങനെ നോക്കുമ്പോൾ ഈ ഐഡിയ കൊള്ളാം എന്ന് തോന്നുന്നുണ്ടോ? 

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം