'നാക്കുളുക്കാതെ പറയാന്‍ ശശി തരൂര് തന്നെ വേണം'! ബാങ്കോക്കിന്‍ മുഴുവന്‍ പേര് കേട്ടാല്‍ നിങ്ങള്‍ ഞെട്ടും!

വിനോദസഞ്ചാരികൾ നിറഞ്ഞ  ബസിൽ ഒരു ടൂർ ഗൈഡ് നഗരത്തിന്‍റെ മുഴുവൻ പേര് പറയുന്നതായി കാണിക്കുന്ന ഒരു വീഡിയോ വൈറലായതോടെയാണ് ഇത് നഗരത്തിന്‍റെ യഥാര്‍ത്ഥ പേര് ശ്രദ്ധനേടിയത്.   

സഞ്ചാരികളു‌ടെ പ്രിയപ്പെട്ട ന​ഗരമാണ് ബാങ്കോക്ക്. തായ്‌ലൻഡിന്‍റെ ഊർജ്ജസ്വലമായ തലസ്ഥാന ന​ഗരം കൂടിയാണ് ബാങ്കോക്ക്, തെക്കുകിഴക്കൻ ഏഷ്യൻ സാഹസികത ആസ്വദിക്കാൻ ആഗ്രഹിക്കുന്ന സഞ്ചാരികളെ എപ്പോഴും ഈ നഗരം ആകർഷിക്കുന്നു. നഗരത്തിന്‍റെ ഊർജവും വൈവിധ്യമാർന്ന പാചകരീതികളും അതിശയിപ്പിക്കുന്ന കാഴ്ചകളും നൽകുന്ന സന്തോഷ മുഹൂർത്തങ്ങൾ ചെറുതല്ല. എന്നാൽ ബങ്കോക്കിന്‍റെ മറ്റൊരു പ്രത്യേകത ഇപ്പോൾ സോഷ്യൽ മീഡിയിയിൽ വൈറലാവുകയാണ്. കാര്യം മറ്റൊന്നുമല്ല, ലോകത്തിലെ തന്നെ ഏറ്റവും നീളം കൂടിയ സ്ഥലനാമം ബാങ്കോക്കിന്‍റെതാണ്. ബാങ്കോക്ക് എന്നത് വെറും ചുരുക്കപ്പേര് മാത്രമാണന്ന് സാരം.

ഒരു കവിത പോലെ മനോഹരമായ ആ പേര് എന്താണന്ന് അറിയണ്ടേ,  "ക്രുങ് തേപ് മഹാനഖോൻ ആമോൻ രത്തനകോസിൻ മഹീന്തര അയുതയ മഹാദിലോക് ഫോപ് നൊപ്പരത് രച്ചത്തനി ബുരിറോം ഉദോമ്രത്ചനിവേത് മഹാസതൻ ആമോൻ പിമാൻ അവതൻ സതിത് സക്കത്തട്ടിയ വിത്സനുകം പ്രസിത്"  ("Krung Thep Mahanakhon Amon Rattanakosin Mahinthara Ayuthaya Mahadilok Phop Noppharat Ratchathani Burirom Udomratchaniwet Mahasathan Amon Piman Awatan Sathit Sakkathattiya Witsanukam Prasit,"). മാലാഖമാരുടെ നഗരം, അനശ്വരരുടെ മഹത്തായ നഗരം, ഒമ്പത് രത്നങ്ങളുടെ മഹത്തായ നഗരം, രാജാവിന്‍റെ ഇരിപ്പിടം, രാജകൊട്ടാരങ്ങളുടെ നഗരം, ഇന്ദ്രന്‍റെ നിർദ്ദേശപ്രകാരം വിശ്വകർമൻ സ്ഥാപിച്ച ദേവന്മാരുടെ ഭവനം  എന്നൊക്കെയാണ് ഈ വലിയ പേരിന്‍റെ അർത്ഥം. "ക്രുങ് തേപ് മഹാ നഖോൺ" (Krung Thep Maha Nakhon) എന്ന ചുരുക്കപ്പേരിലും തായ്ലൻഡിൽ ഈ ന​ഗരം അറിയപ്പെടുന്നുണ്ട്.

വിനോദസഞ്ചാരികൾ നിറഞ്ഞ  ബസിൽ ഒരു ടൂർ ഗൈഡ് നഗരത്തിന്‍റെ മുഴുവൻ പേര് പറയുന്നതായി കാണിക്കുന്ന ഒരു വീഡിയോ വൈറലായതോടെയാണ് ഇത് നഗരത്തിന്‍റെ യഥാര്‍ത്ഥ പേര് ശ്രദ്ധനേടിയത്.   "ബാങ്കോക്കിന്‍റെ മുഴുവൻ പേര് ഏറ്റവും നീളം കൂടിയ സ്ഥല നാമമായി ഗിന്നസ് വേൾഡ് റെക്കോർഡ് അംഗീകരിച്ചു" എന്ന അടിക്കുറിപ്പോടെയാണ് ഈ വീഡിയോ ഇൻസ്റ്റാഗ്രാമിൽ പങ്കുവെച്ചിരിക്കുന്നത്.