ഡേറ്റിംഗ് ആപ്പുകൾ കൊണ്ടൊന്നും കാര്യമില്ല, മനംമടുത്ത 42 -കാരി ചെയ്തത്, ഭർത്താവിനെ കണ്ടെത്താൻ പുതിയ മാർ​ഗം

35 -നും 45 -നും ഇടയിൽ പ്രായമുള്ള, മതപരവും രാഷ്ട്രീയപരവുമായ കാര്യങ്ങളിൽ തൻ്റെ കാഴ്ചപ്പാടുകളുടേതിന് സമാന കാഴ്ച്ചപ്പാടുകളുള്ള, സമാനമായ ആരോഗ്യ മുൻഗണനകളുള്ള ഒരാളെയാണ് ലിസ കറ്റലാനോ തേടുന്നത്.

സാൻ ഫ്രാൻസിസ്കോയിൽ നിന്നുള്ള 42 വയസ്സുകാരിയായ ലിസ കറ്റലാനോ എന്ന യുവതിയാണ് പ്രണയം കണ്ടെത്താൻ വേറിട്ട വഴിയിലൂടെ സഞ്ചരിച്ച് ശ്രദ്ധേയമാവുന്നത്. അനുയോജ്യനായ ഒരാളെ കണ്ടെത്താൻ പരസ്യബോർഡുകൾ സ്ഥാപിക്കുകയാണ് ലിസ ചെയ്തത്. നിരവധി ഡേറ്റിംഗ് ആപ്പുകളിൽ കാലങ്ങളോളം തിരഞ്ഞിട്ടും തനിക്ക് ചേർന്ന ആളെ കണ്ടെത്താൻ കഴിയാതെ വന്നതോടെയാണ് ലിസ ഇത്തരത്തിൽ ഒരു വേറിട്ട വഴി തേടിയിരിക്കുന്നത്.

തന്റെ പുതിയ വെബ്സൈറ്റായ MarryLisa.com പ്രചരിപ്പിക്കാനായി ഏകദേശം പന്ത്രണ്ടോളം പരസ്യബോർഡുകളാണ് ഇവർ സ്ഥാപിച്ചത്. തന്നെ ഡേറ്റ് ചെയ്യാൻ യോഗ്യരായ അവിവാഹിതരായ പുരുഷന്മാരിൽ നിന്നുള്ള അപേക്ഷ ക്ഷണിച്ചുകൊണ്ടുള്ള ഈ സൈറ്റിൽ, ലിസ തന്റെ ജീവിതത്തെക്കുറിച്ചും താൽപ്പര്യങ്ങളെക്കുറിച്ചും പങ്കാളിയിൽ നിന്ന് എന്താണ് പ്രതീക്ഷിക്കുന്നതെന്നും വിശദമാക്കുന്നു.

ഈ ആശയം ഒരു തമാശയായി തുടങ്ങിയ പരീക്ഷണമായിരുന്നുവെന്നും, എന്നാൽ പെട്ടെന്ന് അതൊരു പൂർണ്ണമായ കാമ്പയിനായി മാറിയെന്നും ലിസ കറ്റലാനോ പറയുന്നു. പരസ്യബോർഡിൽ ലിസയുടെ ഒരു ചിത്രവും കട്ടിയുള്ള മഞ്ഞ അക്ഷരങ്ങളിൽ സൈറ്റിന്റെ ലിങ്കും കാണാം. വെബ്സൈറ്റിൽ വിശദമായ ഒരു അപേക്ഷാ ഫോം ഉണ്ട്, അതിൽ ഭാവി പങ്കാളികൾ അവരുടെ വിദ്യാഭ്യാസം, കരിയർ, ഹോബികൾ എന്നിവയെക്കുറിച്ചുള്ള വിവരങ്ങൾ പൂരിപ്പിക്കണം.

തന്റെ ആവശ്യങ്ങൾ എന്തൊക്കെയാണെന്നും ലിസ വ്യക്തമാക്കിയിട്ടുണ്ട്: സ്ഥിരതയുള്ള, ഏകപത്നീ ബന്ധത്തിൽ താൽപ്പര്യമുള്ള ഒരാൾ, ഒരു കുടുംബം തുടങ്ങാൻ ആഗ്രഹിക്കുന്നയാൾ, ആരോഗ്യകരമായ ജീവിതശൈലി നയിക്കുന്നയാൾ എന്നിങ്ങനെയുള്ള ആളെയാണ് അവർക്ക് വേണ്ടത്. 35 -നും 45 -നും ഇടയിൽ പ്രായമുള്ള, മതപരവും രാഷ്ട്രീയപരവുമായ കാര്യങ്ങളിൽ തൻ്റെ കാഴ്ചപ്പാടുകളുടേതിന് സമാന കാഴ്ച്ചപ്പാടുകളുള്ള, സമാനമായ ആരോഗ്യ മുൻഗണനകളുള്ള ഒരാളെയാണ് ലിസ കറ്റലാനോ തേടുന്നത്.

19 വയസ്സുള്ളവർ മുതൽ 78 വയസ്സുള്ളവർ വരെ അപേക്ഷകൾ അയച്ചിട്ടുണ്ട്. 2023 -ൽ ഗുരുതരമായ അസുഖത്തെ തുടർന്നാണ് ലിസയ്ക്ക് ഭാവിവരനെ നഷ്ടപ്പെട്ടത്. ആ ബന്ധത്തിന് ശേഷം വീണ്ടും ഡേറ്റിംഗ് ചെയ്യുന്നത് വിചിത്രമായി തോന്നി എന്നും അവർ പറഞ്ഞു. ഡേറ്റിംഗ് ആപ്പുകൾ ഫലപ്രദമാകാമെങ്കിലും, തനിക്ക് വ്യക്തിപരമായി താൻ ആഗ്രഹിച്ച ഫലം ലഭിക്കുന്നില്ലെന്ന് അവർ പറയുന്നു. സെപ്റ്റംബർ 2-ന് കാമ്പയിൻ ആരംഭിച്ചതി, അവർക്ക് ഏകദേശം 1,800 അപേക്ഷകൾ ലഭിച്ചു.