നായ്ക്കൾ പാലത്തിൽ നിന്ന് ചാടി മരിക്കുന്നതിന് മുമ്പ് എന്തോ ബാധിച്ചതുപോലെ പെരുമാറിയിരുന്നു എന്ന് പറയുന്നു.
നിഗൂഢതകള്‍ മനുഷ്യരെ എക്കാലവും ആകര്‍ഷിക്കുന്ന ഒന്നാണ്. എന്തുകൊണ്ടാണ് അത് സംഭവിക്കുന്നത് എന്ന ചോദ്യം പലപ്പോഴും ഉള്ളില്‍ തങ്ങിനില്‍ക്കും. അത്തരം ഒരു സ്ഥലത്തിന്‍റെ ഉത്തമോദാഹരണമാണ് ഡംബാർടണിലെ സ്കോട്ട്ലൻഡിലെ ഓവർടൗൺ പാലം. ലോകമെമ്പാടുമുള്ള വിദഗ്ധർ ഉൾപ്പടെയുള്ള ആളുകളെ അമ്പരപ്പിക്കുന്ന പാലത്തിന് വിശദീകരിക്കാനാവാത്ത ഒരു നിഗൂഢതയുണ്ട്. ഈ പാലത്തിന്‍റെ പ്രത്യേകത ഇവിടെയെത്തുമ്പോള്‍ നായകള്‍ എടുത്തുചാടി മരിക്കുന്നു എന്നതാണ്.
'ദ ന്യൂയോർക്ക് ടൈംസി'ന്റെ ഒരു റിപ്പോർട്ട് അനുസരിച്ച്, നായ്ക്കൾ പാലത്തിൽ നിന്ന് വീഴുകയോ ചാടുകയോ ചെയ്ത നിരവധി കേസുകളില്‍ ഒരു പാരാനോർമൽ എന്റിറ്റിയുടെ സാന്നിധ്യം അനുഭവപ്പെട്ടുവെന്ന് ആരോപിക്കപ്പെടുന്നു. പതിറ്റാണ്ടുകളായി ഇത് നടക്കുന്നുണ്ടെന്ന് നാട്ടുകാർ പറയുന്നു. പാലത്തിന് 50 അടി താഴ്ചയുണ്ട്, താഴെ വെള്ളമില്ല, പാറകൾ മാത്രമേയുള്ളൂ. 1950 -കള്‍ മുതല്‍ ഏകദേശം മുന്നൂറോളം നായകള്‍ ഇങ്ങനെ പാലത്തില്‍ നിന്നും ചാടി മരിച്ചിട്ടുണ്ടാവും എന്ന് റിപ്പോര്‍ട്ടില്‍ പറയുന്നു.
ഇതുപോലുള്ള ഒരു സ്ഥലത്തിന് ചില ഐതിഹ്യങ്ങളും കഥകളും ഉണ്ടായിരിക്കും. എന്നാൽ, പല വളർത്തുമൃഗ ഉടമകളും ഈ സ്ഥലം അസാധാരണമായ എന്തെങ്കിലുമായി ബന്ധപ്പെട്ടിരിക്കുന്നുവെന്ന് വിശ്വസിക്കുന്നു. നായ്ക്കൾ പാലത്തിൽ നിന്ന് ചാടി മരിക്കുന്നതിന് മുമ്പ് എന്തോ ബാധിച്ചതുപോലെ പെരുമാറിയിരുന്നു എന്ന് പറയുന്നു. 1908 -ൽ ഭർത്താവ് മരിച്ചതിന് ശേഷം 30 വർഷത്തിലേറെക്കാലം ദുഃഖത്തിൽ ഒറ്റയ്ക്ക് ജീവിച്ചിരുന്ന ഓവർടൂണിലെ വൈറ്റ് ലേഡി ഈ പാലത്തെ വേട്ടയാടുന്നതായി പ്രാദേശിക ഐതിഹ്യങ്ങളിൽ ചിലർ വിശ്വസിക്കുന്നു.
2014 -ൽ തന്റെ നായ കാസിയുമായി പാലത്തിലൂടെ നടന്ന ഒരു ഉടമ ആലീസ് ട്രെവോറോ പറഞ്ഞു: 'ഞാൻ ഇവിടെ നിര്‍ത്തി. അവൾ അനുസരണയുള്ളവളായതിനാൽ ഞാൻ അവളെ പിടിച്ചിരുന്നില്ല. ഞാനും എന്റെ മകനും കാസിയുടെ അടുത്തേക്ക് നടന്നു. പെട്ടെന്ന് അവള്‍ പാലത്തിന് മുകളിലൂടെ എന്തോ ഒന്ന് ഉറ്റുനോക്കുന്നത് പോലെ നിന്നു... തന്നെ ചാടാൻ പ്രേരിപ്പിക്കുന്ന എന്തോ ഒന്ന് അവൾ കണ്ടു.' അതേ വർഷം തന്നെ മറ്റൊരു വളർത്തുമൃഗ ഉടമയായ കെന്നത്ത് മൈക്കിൾ തന്റെ ഗോൾഡൻ റിട്രീവറുമായി പാലത്തിലൂടെ നടക്കുമ്പോൾ നായ പെട്ടെന്ന് പാലത്തിൽ നിന്ന് ചാടി. ഭാഗ്യത്തിന് അത് രക്ഷപ്പെട്ടു.
ഇത്തരം ആത്മഹത്യകള്‍ കാരണം ഈ സ്ഥലം അറിയപ്പെടുന്നത് തന്നെ 'ഡോഗ് സൂയിസൈഡ് ബ്രിഡ്‍ജ്' എന്നാണ്.