വെർജീനിയ വൂൾഫ് പാതി ബം​ഗാളിയാണോ? വെളിപ്പെടുത്തലുമായി ബന്ധു

താൻ വെർജീനിയ വൂൾഫിനെ നേരിട്ട് കണ്ടിട്ടില്ല. ചിത്രങ്ങളിലാണ് കണ്ടിട്ടുള്ളത്. അവരുടെ മുഖത്തിന് ബം​ഗാളിലെ സ്ത്രീകളുടെ മുഖത്തോട് സാമ്യമുണ്ട്. അവർക്ക് രബീന്ദ്രനാഥ ടാ​ഗോറിന്റെ മണ്ണുമായുള്ള ബന്ധത്തെ നാം ആഘോഷിക്കേണ്ടതാണ് എന്നും വില്യം പറയുകയുണ്ടായി.

ഇരുപതാം നൂറ്റാണ്ടിലെ ഏറ്റവും പ്രധാനപ്പെട്ട എഴുത്തുകാരിയായി പരി​ഗണിക്കപ്പെടുന്ന ആളാണ് വെർജീനിയ വൂൾഫ്. അവരുടെ രണ്ടാം തലമുറയിൽ പെട്ട മരുമകൻ ഒരു പുതിയ വെളിപ്പെടുത്തലുമായി മുന്നോട്ട് വന്നിരിക്കയാണ്. അത് മറ്റൊന്നുമല്ല, വെർജീനിയ വൂൾഫ് ഒരു പാതി ബം​ഗാളിയാണ് എന്നാണ് ഇദ്ദേഹത്തിന്റെ വെളിപ്പെടുത്തൽ. 

ദില്ലി കേന്ദ്രീകരിച്ച് പ്രവർത്തിക്കുന്ന സ്കോട്ടിഷ് എഴുത്തുകാരനും ചരിത്രകാരനുമായ വില്യം ഡാൽറിംപിളാണ് തന്റെ ബന്ധുവും പ്രശസ്ത ഇംഗ്ലീഷ് എഴുത്തുകാരിയുമായ വിർജീനിയ വൂൾഫ് പാതി ബം​ഗാളിയാണ് എന്ന് പറഞ്ഞത്. 'ആർക്കും കൂടുതലായി അറിയാത്ത ഒരു കാര്യം തനിക്ക് വെർജീനിയ വൂൾഫുമായി ബന്ധപ്പെട്ട് പങ്കുവയ്ക്കാനുണ്ട്. സത്യത്തിൽ അവർ ഒരു പാതി ബം​ഗാളിയാണ്' എന്നാണ് ഒരു മാ​ഗസിനോട് ഈ വർഷം ആദ്യം അദ്ദേഹം വെളിപ്പെടുത്തിയത്. 

താനും വെർജീനിയ വൂൾഫും പാതി ബം​ഗാളികളാണ്. തന്റെ മുതുമുത്തശ്ശിയും പത്തൊമ്പതാം നൂറ്റാണ്ടിലെ ഫോട്ടോ​ഗ്രാഫറുമായിരുന്നു ജൂലിയറ്റ് മാർ​ഗരറ്റ് കാമറൂൺ. അവർ ജീവിച്ചത് ബം​ഗാളിലെ ചന്ദൻ ന​ഗറിലായിരുന്നു എന്നാണ് വില്ല്യമിന്റെ വെളിപ്പെടുത്തൽ. ഹുഗ്‌ളി ജില്ലയിലാണ് ചന്ദൻ ന​ഗർ. 

ഫ്രാങ്കോ-ബംഗാളി വംശജരിൽ നിന്നാണ് തന്റെ മുതുമുത്തശ്ശി വന്നത്, ആ ബംഗാളി മുത്തശ്ശിയും ഫ്രഞ്ചുകാരനുമായുള്ള വിവാഹ സർട്ടിഫിക്കറ്റ് ഞങ്ങളുടെ പക്കലുണ്ട് എന്നും വില്യം പറഞ്ഞു. പുറത്തായിരുന്നു ജീവിച്ചിരുന്നത് എങ്കിലും അവർക്ക് ബം​ഗാളിനെ കുറിച്ച് നന്നായി അറിയാമായിരുന്നു എന്നും വില്യം കൂട്ടിച്ചേർത്തു. 

താൻ വെർജീനിയ വൂൾഫിനെ നേരിട്ട് കണ്ടിട്ടില്ല. ചിത്രങ്ങളിലാണ് കണ്ടിട്ടുള്ളത്. അവരുടെ മുഖത്തിന് ബം​ഗാളിലെ സ്ത്രീകളുടെ മുഖത്തോട് സാമ്യമുണ്ട്. അവർക്ക് രബീന്ദ്രനാഥ ടാ​ഗോറിന്റെ മണ്ണുമായുള്ള ബന്ധത്തെ നാം ആഘോഷിക്കേണ്ടതാണ് എന്നും വില്യം പറയുകയുണ്ടായി. ഒരുപക്ഷേ, താൻ എന്നെങ്കിലും വെർജീനിയയ്ക്ക് ബം​ഗാളിനെ കുറിച്ചുള്ള ബന്ധത്തെ കുറിച്ച് ഒരു പുസ്തകം തന്നെ എഴുതിയേക്കും. അവരുടെ പല കവിതകളിലും ബം​ഗാളി സാഹിത്യവുമായുള്ള ബന്ധം ദർശിക്കാം എന്നും വില്യം പറഞ്ഞു. ‌

വെർജീനിയ വൂൾഫ് വളരെ ചെറുപ്പത്തിൽ തന്നെ എഴുതി തുടങ്ങിയിരുന്നു. 1915 -ലാണ് അവരുടെ ആദ്യത്തെ നോവൽ പ്രസിദ്ധീകരിക്കപ്പെടുന്നത്. 'ഒരാളുടെ സ്വന്തം മുറി' (A Room of One's Own) ലോകമെമ്പാടും ചർച്ച ചെയ്യപ്പെട്ട പുസ്തകമാണ്. മിസ്സിസ്സ് ഡാല്ലോവെ, റ്റു ദ് ലൈറ്റ്‌ഹൌസ്, ഒർലാന്റോ എന്നിവയാണ് മറ്റ് പ്രധാന രചനകൾ.