സ്ത്രീധനമായി ഏകദേശം ഒരുകോടി രൂപ ലഭിച്ചുവെന്നാണ് നാട്ടുകാരുടെ നിഗമനം. എന്നാൽ, വൈറലായ ആ പൊങ്ങച്ച വീഡിയോ പൊലീസിനെ മാത്രമല്ല പ്രകോപിപ്പിച്ചത്, സമൂഹത്തെ ഒന്നടങ്കമാണ്.
സ്ത്രീധനം വാങ്ങുന്നതും നൽകുന്നതും കുറ്റമാണ് എന്ന് നമുക്കറിയാം. അതുകൊണ്ട് തന്നെ പലപ്പോഴും കൊടുക്കുന്നത് വീട്ടുകാർ മാത്രം അറിഞ്ഞുള്ള ഒരേർപ്പാടായി മാറുകയാണ് പലയിടത്തും. എന്നാൽ, ഉത്തർ പ്രദേശിലെ ഷംലിയിലുള്ള ഒരു വ്യാപാരി ഈ സ്ത്രീധന നിയമത്തെ കുറിച്ച് ഒന്നും കേട്ടിട്ടില്ല എന്ന് തോന്നുന്നു. അദ്ദേഹം തന്റെ വിവാഹത്തിന് സ്ത്രീധനമായി ലഭിച്ച 41 ലക്ഷം രൂപയും, സ്വർണവും ആളുകൾക്ക് മുന്നിൽ പ്രദർശനത്തിന് വച്ചു. ആരോ അത് വീഡിയോയിൽ പകർത്തി സാമൂഹ്യമാധ്യമങ്ങളിൽ പോസ്റ്റ് ചെയ്‌തു. പോരെ പുകില്? വീഡിയോ വൈറലായതിന് പിന്നാലെ പൊലീസും, ആദായനികുതി വകുപ്പും അയാളെ അന്വേഷിച്ചെത്തി.
വിവാഹ ചടങ്ങിൽ പാത്രങ്ങളിൽ അടുക്കിവച്ചിരിക്കുന്ന നോട്ട് കെട്ടുകൾ, കാൽമുട്ട് വരെ എത്തുന്ന വധുവിന്റെ സ്വർണ മാല, വെള്ളി, മറ്റ് വിലപിടിപ്പുള്ള വസ്തുക്കൾ എന്നിവയാണ് വരൻ പ്രദർശനത്തിന് വച്ചത്. വീഡിയോയിൽ, വരൻ പണത്തിനെകുറിച്ചും സ്ത്രീധനമായി ലഭിച്ച എസ്‍യുവിയെക്കുറിച്ചും വീമ്പിളക്കുന്നത് കാണാം. തുടർന്ന് പൊന്നിൽ കുളിച്ച് നിൽക്കുന്ന മണവാട്ടിയുടെ രൂപവും കാണാം. സ്ത്രീധനമായി ഏകദേശം ഒരുകോടി രൂപ ലഭിച്ചുവെന്നാണ് നാട്ടുകാരുടെ നിഗമനം. എന്നാൽ, വൈറലായ ആ പൊങ്ങച്ച വീഡിയോ പൊലീസിനെ മാത്രമല്ല പ്രകോപിപ്പിച്ചത്, സമൂഹത്തെ ഒന്നടങ്കമാണ്.
ഷാംലിയുടെ താനഭവാനിലാണ് ഈ കല്യാണം നടന്നത്. ഷംലി സ്വദേശിയും ഗുജറാത്തിലെ സൂറത്തിലെ തുണിവ്യാപാരിയുമായ വ്യക്തിയുടെ മകളാണ് വധു. വരൻ ഷംലി സ്വദേശിയായ കർണാടകയിലെ ബിസിനസ്സുകാരനും. കല്യാണ വീഡിയോ പരിശോധിച്ച പൊലീസ് ഇപ്പോൾ അന്വേഷണത്തിന് ഉത്തരവിട്ടിരിക്കുകയാണ്. ഷംലിയിലെ തദ്ദേശവാസികളെയും ഈ വീഡിയോ ചൊടിപ്പിച്ചു. ആ കുടുംബത്തിനെതിരെ കർശന നടപടിയെടുക്കണമെന്ന് നാട്ടുകാർ ആവശ്യപ്പെട്ടു. ഇത്തരം പൊങ്ങച്ച വീഡിയോകൾ പാവപ്പെട്ട കുടുംബങ്ങൾക്ക് ഒരടിയാകുമെന്നും, ആ വീടുകളിലെ പിതാക്കന്മാർ പെൺമക്കളെ വിവാഹം കഴിപ്പിക്കാൻ പാടുപെടുമെന്നും സമുദായത്തിൽ മുതിർന്നവർ പറഞ്ഞു. ഇപ്പോൾ പൊലീസും ആദായനികുതി വകുപ്പും അന്വേഷണത്തിന് എത്തിയതോടെ ആകെ പുലിവാല് പിടിച്ചിരിക്കുകയാണ് വീട്ടുകാർ.