വഴിയരികിൽ ഭീമൻ ​ഗർത്തം, തൊട്ടടുത്ത് സ്കൂൾ, വൈറലായി പോസ്റ്റ്, സംഭവം ബെം​ഗളൂരുവിൽ

മൂവായിരത്തിലധികം വിദ്യാർത്ഥികൾ ഈ സ്കൂളിൽ പഠിക്കുന്നുണ്ട്. വഴിയിൽ അപകടകാരിയായ കുഴി രൂപപ്പെട്ടിട്ട് ഏറെ കാലമായി. എന്നാൽ, BBMP യോ സ്കൂളോ എന്തെങ്കിലും നടപടികൾ എടുത്തിട്ടില്ല എന്നാണ് എക്സിൽ പങ്കുവച്ചിരിക്കുന്ന പോസ്റ്റിൽ പറയുന്നത്.

പല ന​ഗരങ്ങളിലും അധികൃതരുടെയോ ബന്ധപ്പെട്ടവരുടെയോ ഭാ​ഗത്ത് നിന്നുണ്ടാകുന്ന ചെറിയ അശ്രദ്ധകൾ വലിയ അപകടങ്ങളിലേക്ക് നയിക്കാറുണ്ട്. അത്തരത്തിലുള്ള ഒരുപാട് പോസ്റ്റുകൾ നാം സോഷ്യൽ മീഡിയയിലൂടെയും മറ്റും കാണുന്നുണ്ടാവും. അതുപോലെ, ഒരു ചിത്രമാണ് ഇപ്പോൾ ബെം​ഗളൂരുവിൽ നിന്നും പുറത്തുവരുന്നത്. 

റോഡിലുള്ള ഒരു ഭീമൻ ​ഗർത്തമാണ് സോഷ്യൽ മീഡിയയിൽ ഷെയർ ചെയ്തിരിക്കുന്ന ഈ ചിത്രത്തിൽ കാണുന്നത്. നിരവധിപ്പേർ നടന്നു പോകുന്ന വഴിയിലാണ് ഈ കുഴിയുള്ളത്. എന്നാൽ, ഇതിനെ ഏറെ അപകടകാരിയാക്കുന്ന മറ്റൊരു സം​ഗതി കൂടിയുണ്ട്. നിരവധി വിദ്യാർത്ഥികൾ പഠിക്കുന്ന ഒരു സ്കൂളിന് സമീപത്തായിട്ടുള്ള വഴിയിലാണ് ഈ ഭീമൻ ​ഗർത്തം ഉള്ളത് എന്നതാണത്. 

വൈറ്റ്‍ഫീൽഡിനടുത്തുള്ള ഈ സ്കൂളിൽ 3000 -ത്തിലധികം വിദ്യാർത്ഥികൾ പഠിക്കുന്നുണ്ട് എന്നാണ് റിപ്പോർട്ടുകൾ പറയുന്നത്. ഇവിടെയുള്ള താമസക്കാർ തന്നെയാണ് ഈ ഭീമൻ ​ഗർത്തത്തിന്റെ ചിത്രം എക്സിൽ (ട്വിറ്റർ) പോസ്റ്റ് ചെയ്തിരിക്കുന്നത്. ഏറെ കാലമായി കാൽനടയാത്രക്കാർക്ക് തടസം സൃഷ്ടിച്ചു കൊണ്ട് ഈ കുഴി അവിടെ തന്നെയുണ്ട് എന്നും ഇവിടുത്തുകാർ പറയുന്നു. BBMP (Bruhat Bengaluru Mahanagara Palike) യോ സ്കൂൾ അധികൃതരോ ഈ കുഴി നികത്താൻ വേണ്ടതൊന്നും ചെയ്തിട്ടില്ല എന്നും നാട്ടുകാർ ആരോപിക്കുന്നു. 

മൂവായിരത്തിലധികം വിദ്യാർത്ഥികൾ ഈ സ്കൂളിൽ പഠിക്കുന്നുണ്ട്. വഴിയിൽ അപകടകാരിയായ കുഴി രൂപപ്പെട്ടിട്ട് ഏറെ കാലമായി. എന്നാൽ, BBMP യോ സ്കൂളോ എന്തെങ്കിലും നടപടികൾ എടുത്തിട്ടില്ല എന്നാണ് എക്സിൽ പങ്കുവച്ചിരിക്കുന്ന പോസ്റ്റിൽ പറയുന്നത്. അതിൽ ഈ ഭീമൻ ​ഗർത്തത്തിന്റെ ചിത്രങ്ങളും കാണാം. 

പോസ്റ്റ് പിന്നീട് വൈറലായി മാറുകയും ചെയ്തു. അതോടെ BBMPയുടെ ഇന്റ​ഗ്രേറ്റഡ് കമാൻഡ് ആൻഡ് കൺട്രോൾ സെന്റർ പരാതി എടുത്തിട്ടുണ്ട്. അതേസമയം നിരവധിപ്പേരാണ് പോസ്റ്റിന് കമന്റുകളുമായി എത്തിയത്. എന്തുകൊണ്ടാണ് ഈ പ്രശ്നം പരിഹരിക്കാൻ ഇത്രയും കാലമെടുത്തത് എന്നായിരുന്നു പലരുടേയും സംശയം. 

ഏഷ്യാനെറ്റ് ന്യൂസ് ലൈവ് കാണാം