ഒരു ഗ്രാമത്തിലെ മുഴുവന്‍ വീടുകളിലും ഇരട്ടകള്‍!

എന്നാല്‍ ഒരു ഗ്രാമത്തിലെ മുഴുവന്‍ വീടുകളിലും പിറക്കുന്നത് ഇരട്ടക്കുട്ടികള്‍ ആണെങ്കില്‍ എന്തായിരിക്കും സ്ഥിതി?

ഇരട്ട കുട്ടികള്‍ ഇപ്പോഴും നമുക്കൊരു കൗതുകമാണ്. ഇനിയവര്‍ ഒരുപോലെ ഇരിക്കുന്നവര്‍ ആണെങ്കില്‍ പറയുകയും വേണ്ട. അവര്‍ എത്ര വളര്‍ന്നാലും ആ കൗതുകം ബാക്കിനില്‍ക്കും.  എന്നാല്‍ ഒരു ഗ്രാമത്തിലെ മുഴുവന്‍ വീടുകളിലും പിറക്കുന്നത് ഇത്തരത്തിലുള്ള ഇരട്ടക്കുട്ടികള്‍ ആണെങ്കില്‍ എന്തായിരിക്കും സ്ഥിതി?

അങ്ങനെ എവിടെയെങ്കിലും സംഭവിക്കുമോ എന്നാണ് സംശയം എങ്കില്‍, അങ്ങനെയൊരു ഗ്രാമം ഉണ്ട്. നൈജീരിയയില്‍ ആണ് ആ ഗ്രാമം. ഇവിടുത്തെ എല്ലാ വീടുകളിലും ചുരുങ്ങിയത് ഓരോ ജോടി ഇരട്ടകള്‍ എങ്കിലും ഉണ്ട് . തങ്ങളുടെ ഗ്രാമത്തിനു ലഭിച്ച വലിയ ഭാഗ്യമായാണ് ഇവിടുത്തുകാര്‍ ഇതിനെ കാണുന്നത്. എല്ലാവര്‍ഷവും ഗ്രാമത്തില്‍ ഇരട്ടകള്‍ പിറക്കുന്നതിന്റെ സന്തോഷം പങ്കുവയ്ക്കാന്‍ അവര്‍ വലിയ ആഘോഷവും സംഘടിപ്പിക്കാറുണ്ട്. ആ ആഘോഷത്തില്‍ ഗ്രാമത്തില്‍ പിറന്ന മുഴുവന്‍ ഇരട്ടകളും അണിഞ്ഞൊരുങ്ങി പങ്കെടുക്കും. ആഘോഷത്തിന്റെ ഭാഗമാകാന്‍ മറ്റു നാടുകളില്‍ നിന്നുപോലും ഇരട്ടകള്‍ ഇവിടെ എത്താറുണ്ട്. ഈ മാസം ആദ്യം നടന്ന ഈ വര്‍ഷത്തെ ആഘോഷത്തില്‍ ആയിരക്കണക്കിന് ഇരട്ടകളാണ് പങ്കെടുത്തത്.

നൈജീരിയയുടെ തെക്കുപടിഞ്ഞാറന്‍ നഗരമായ ഇഗ്‌ബോ-ഓറയില്‍ ആണ് ഇത്തരത്തില്‍ അസാധാരണമാംവിധം ഇരട്ടകള്‍ പിറക്കുന്നത്.ഇവിടെയുള്ള മിക്കവാറും എല്ലാ കുടുംബങ്ങളിലും ഇരട്ടകളോ അല്ലെങ്കില്‍ രണ്ടിലധികം കുട്ടികളോ ജനിക്കാറുണ്ട്. ഒരു ജോഡി ഇരട്ടക്കുട്ടികളെങ്കിലും ഇല്ലാത്ത ഒരു വീടുപോലും ഈ ഗ്രാമത്തില്‍ ഇല്ല എന്നാണ് തദ്ദേശ ഭരണ വകുപ്പ് അധ്യക്ഷന്‍ ജിമോ ടിറ്റിലോയ് തന്നെ സാക്ഷ്യപ്പെടുത്തുന്നത്.

എന്തുകൊണ്ടാണ് തങ്ങളുടെ ഗ്രാമത്തില്‍ ഇത്തരത്തില്‍ ഇരട്ട കുട്ടികള്‍ പിറക്കുന്നത് എന്ന് ഇവര്‍ക്ക് വ്യക്തമായി അറിയില്ല എങ്കിലും തങ്ങള്‍ക്ക് കിട്ടിയ വലിയ ഭാഗ്യവും സന്തോഷവും ആയാണ് അവര്‍ അതിനെ കരുതുന്നത്. അതുകൊണ്ടുതന്നെ കഴിഞ്ഞ 12 വര്‍ഷമായി അവര്‍ ഇതൊരു ആഘോഷമായി മാറ്റുന്നതിന് ഗ്രാമത്തില്‍ ഇരട്ടകള്‍ക്കായി ഒരു വാര്‍ഷിക ഉത്സവം തന്നെ സംഘടിപ്പിച്ചു വരികയാണ്.

ഈ ഉത്സവത്തില്‍ പങ്കെടുക്കാന്‍ ഗ്രാമത്തില്‍ പിറന്ന എല്ലാ ഇരട്ടകളും എത്തുമെന്നു മാത്രമല്ല പുറം നാടുകളില്‍ നിന്നുപോലും ഇവിടുത്തെ ആഘോഷത്തില്‍ പങ്കെടുക്കാന്‍ ഇരട്ടകള്‍ എത്തും. ഒക്ടോബര്‍ മാസം ആദ്യവാരത്തിലാണ് ഈ വര്‍ഷത്തെ വാര്‍ഷിക ഉത്സവം നടന്നത്. ഈ ഉത്സവത്തില്‍ പങ്കെടുത്തത് ആയിരം ജോഡി ഇരട്ടകളാണ്.

നൈജീരിയയിലെ ഏറ്റവും വലിയ നഗരമായ ലാഗോസില്‍ നിന്ന് 135 കിലോമീറ്റര്‍ (83 മൈല്‍) തെക്ക് 200,000 പേരെങ്കിലും താമസിക്കുന്ന ഇഗ്‌ബോ-ഓറയില്‍ ഇരട്ടകളുടെ ഉയര്‍ന്ന നിരക്കിന് ശാസ്ത്രീയ വിശദീകരണമൊന്നുമില്ല.  എന്നാല്‍ ഇഗ്‌ബോ-ഓറയിലെ പലരും വിശ്വസിക്കുന്നത് സ്ത്രീകളുടെ ഭക്ഷണക്രമത്തില്‍ ഇത് കണ്ടെത്താനാകുമെന്നാണ്.  ഇരട്ടക്കുട്ടികളുടെ അമ്മയായ അലകെ ഒലവുന്‍മി, യാമപ്പൊടിയില്‍ നിന്ന് ഉണ്ടാക്കുന്ന അമല എന്ന പ്രാദേശിക വിഭവമാണ് ഇതിന് കാരണമെന്ന് പറയുന്നു.

തലസ്ഥാനമായ അബുജയിലെ ഗൈനക്കോളജിസ്റ്റായ ജോണ്‍ ഒഫെം പറയുന്നത്, 'അവര്‍ കഴിക്കുന്ന ചില ഭക്ഷണങ്ങളില്‍ ഹോര്‍മോണുകളുടെ അളവ് കൂടുതലായതിനാല്‍ ഒന്നിലധികം അണ്ഡോത്പാദനം നടക്കുന്നു എന്നാണ്. മറ്റൊരു കൗതുകകരമായ കാര്യം ഇവിടെ പിറക്കുന്ന ഇരട്ടക്കുട്ടികളില്‍ അധികവും ഐഡന്റിറ്റിക്കല്‍ ട്വിന്‍സ് അഥവാ സമാന രീതിയിലുള്ള ഇരട്ടകള്‍ ആണ് എന്നതാണ്.