മദ്യമോ പുകയിലയോ ഇല്ല, 6-8 ഫോൺ ഉപയോ​ഗമില്ല, എല്ലാ ആഘോഷങ്ങളും ഒരുമിച്ച്, മഹാരാഷ്ട്രയിലെ ഗ്രാമത്തെ കുറിച്ച്

നല്ല ഡ്രെയിനേജ് സംവിധാനം, പ്രായമായവർക്ക് ഇരുന്ന് വിശ്രമിക്കാനും വർത്തമാനം പറയാനും ഒക്കെയായി ബെഞ്ചുകൾ എല്ലാം ഇവിടെയുണ്ട്. അയ്യായിരത്തിലധികം ചെടികളാണ് ​ഗ്രാമീണർ നട്ടുപിടിപ്പിച്ചിരിക്കുന്നത്.

മദ്യപാനവും പുകവലിയും നിരോധിച്ചിരിക്കുന്ന ഒരു ​ഗ്രാമം. അങ്ങനെ ഒരു ​ഗ്രാമമുണ്ടോ ഇന്ത്യയിൽ? ഉണ്ട്. മദ്യപിക്കരുത്, പുകവലിക്കരുത് എന്ന് മാത്രമല്ല, ഇവ വിൽക്കാനും ഈ ​ഗ്രാമത്തിൽ അധികാരമില്ല. മാത്രമല്ല, മദ്യപിക്കുന്നവരെ നാട്ടുകാർ അങ്ങോട്ട് കയറ്റാറുപോലുമില്ലത്രെ. മഹാരാഷ്ട്രയിലെ ജാകേകുർവാഡി എന്ന ​ഗ്രാമമാണ് മദ്യവും പുകയിലയും പടിക്ക് പുറത്ത് നിർത്തിയിരിക്കുന്നത്. 

ഇവിടുത്തെ ​ഗ്രാമമുഖ്യൻ അമർ സൂര്യവംശി എന്നയാളാണ്. അമർ സൂര്യവംശിയുടെ നേതൃത്വത്തിൽ നാല് വർഷം കൊണ്ടാണ് ഈ മാറ്റം പൂർണമായും നടപ്പിലാക്കിയത്. ​ഗ്രാമത്തിൽ മദ്യപിച്ചവർക്ക് പ്രവേശനമില്ലെന്ന് മാത്രമല്ല, പുറത്ത് നിന്നും മദ്യവുമായി ​ഗ്രാമത്തിലേക്ക് കയറാനും അനുവാദമില്ലത്രെ. പുകയില ഉത്പ്പന്നങ്ങളൊന്നും തന്നെ ഉപയോ​ഗിക്കാനോ വിൽക്കാനോ അതുപോലെ ഈ ​ഗ്രാമത്തിൽ അനുവാദമില്ല. 

ഇത് മാത്രമല്ല, മറ്റൊരു സുപ്രധാന കാര്യവും ഈ ​ഗ്രാമം നേരത്തെ തന്നെ നടപ്പിലാക്കിയിട്ടുണ്ട്. നമുക്കറിയാം ഫോൺ ഉപയോ​ഗിക്കാതെ കുറച്ച് നേരം പോലും ഇരിക്കാൻ സാധിക്കാത്ത അവസ്ഥയാണ് ഇന്ന് ഏറിയ പങ്ക് ആളുകൾക്കും. വീഡിയോ കണ്ടും സോഷ്യൽ മീഡിയ നോക്കിയും എത്രനേരം വേണമെങ്കിലും നാം ചെലവഴിക്കും. എന്തിനേറെ പറയുന്നു, പരസ്പരം സംസാരിക്കാൻ പോലും സാധിക്കാത്ത അവസ്ഥ. എന്നാൽ, ഈ ​ഗ്രാമത്തിൽ വൈകുന്നേരം 6 മണി മുതൽ 8 മണി വരെ ഫോൺ ഉപയോ​ഗിക്കുന്നതിനും നിയന്ത്രണമുണ്ട്. കുട്ടികൾക്ക് പഠനത്തിൽ ശ്രദ്ധ കേന്ദ്രീകരിക്കാൻ വേണ്ടിയാണത്രെ ഇത്. 

ഇതുകൊണ്ടും തീർന്നില്ല, നല്ല ഡ്രെയിനേജ് സംവിധാനം, പ്രായമായവർക്ക് ഇരുന്ന് വിശ്രമിക്കാനും വർത്തമാനം പറയാനും ഒക്കെയായി ബെഞ്ചുകൾ എല്ലാം ഇവിടെയുണ്ട്. അയ്യായിരത്തിലധികം ചെടികളാണ് ​ഗ്രാമീണർ നട്ടുപിടിപ്പിച്ചിരിക്കുന്നത്. അതുപോലെ, എല്ലാ വാർഷികങ്ങളും ആഘോഷങ്ങളും ഉത്സവങ്ങളുമെല്ലാം എല്ലാവരും ഒരുമിച്ചാണ് കൊണ്ടാടാറുള്ളത്. നാല് വർഷം കൊണ്ട് മഹാരാഷ്ട്രയിലെ മാതൃകാ​ഗ്രാമമായി ഈ ​ഗ്രാമം മാറിക്കഴിഞ്ഞു എന്നും റിപ്പോർട്ടുകൾ പറയുന്നു. 

മഹാരാഷ്ട്രയിലെ ഒസ്മാനാബാദ് ജില്ലയിലെ ഉമർഗ തഹ്‌സിലിലാണ് ജകേകുർവാദി ഗ്രാമം. 1,594 ആളുകളാണ് ഇവിടെയുള്ളത്.