പൂക്കൾ പറിക്കുമ്പോൾ ചിരിച്ചാൽ 500 രൂപ പിഴ, വൈറലായി ബം​ഗളൂരുവിലെ ബോർഡ്! 

എന്തായാലും ഇതുപോലെയുള്ള വിചിത്രമായ മുന്നറിയിപ്പുകൾ ബം​ഗളൂരുവിൽ ഇത് ആദ്യമായിട്ടല്ല എന്നാണ് പറയുന്നത്.

പലർക്കും വിടർന്ന് നിൽക്കുന്ന പൂക്കൾ കാണുമ്പോൾ അത് പറിച്ചെടുക്കുക എന്നത് ഒരു ഹോബിയാണ്. എന്നാൽ, പുറത്ത് പാർക്കിലോ മറ്റോ പോയാൽ ഇങ്ങനെ ചെയ്യുന്നത് അവിടുത്തെ നിയമത്തിന് വിരുദ്ധമാണ് അല്ലേ? അത് വ്യക്തമാക്കുന്ന ബോർഡുകളും മറ്റും ഇവിടങ്ങളിൽ ഒക്കെ കാണാറുമുണ്ട്. 

എന്നാൽ, ബം​ഗളൂരുവിൽ വളരെ വിചിത്രമെന്ന് തോന്നുന്ന ഒരു ബോർഡാണ് ഇപ്പോൾ വാർത്തകളിൽ നിറയുന്നത്. അതിൽ പറയുന്നത് പുഞ്ചിരിച്ചുകൊണ്ട് പൂക്കൾ പറിക്കരുത് എന്നാണ്. അധികൃതരാണ് പൂക്കൾ പറിക്കുന്നതിന് എതിരായി ഇങ്ങനെ വളരെ വിചിത്രമായ ഒരു ബോർഡ് ഇവിടെ സ്ഥാപിച്ചിരിക്കുന്നത്. 

സോഷ്യൽ മീഡിയാ പ്ലാറ്റ്‍ഫോമുകളിലാണ് ചിത്രം ഷെയർ ചെയ്തിരിക്കുന്നത്. ദയവായി പൂക്കൾ പറിക്കരുത്... ഞങ്ങൾ നിങ്ങളെ നിരീക്ഷിക്കുന്നുണ്ട്. ചിരിക്കുമ്പോൾ പൂക്കൾ പറിക്കവെ പിടിക്കപ്പെട്ടാൽ 500 രൂപ പിഴ ചുമത്തും എന്നാണ് ഇവിടെയുള്ള ബോർഡിൽ എഴുതിയിരിക്കുന്നത്. 

എന്തായാലും ഇതുപോലെയുള്ള വിചിത്രമായ മുന്നറിയിപ്പുകൾ ബം​ഗളൂരുവിൽ ഇത് ആദ്യമായിട്ടല്ല എന്നാണ് പറയുന്നത്. അടുത്തിടെ ബംഗളൂരുവിലെ ഒരു പാർക്കിലും സമാനമായ നിയമങ്ങൾ വിവരിക്കുന്ന ഒരു പോസ്റ്റർ കണ്ടെത്തിയിരുന്നു. അതിൽ പറയുന്നത് സന്ദർശകർക്ക് ഈ പാർക്കിനകത്ത് ഓടാനോ ജോ​ഗിങ്ങിനോ ഉള്ള അനുവാദം ഇല്ല എന്നാണ്. ബൃഹത് ബെംഗളൂരു മഹാനഗര പാലിക (ബിബിഎംപി) യുടേതാണ് ഈ അറിയിപ്പ്. 

നമുക്കറിയാം, നമ്മുടെ നാട്ടിലടക്കം പല സ്ഥലങ്ങളിലും ആന്റിക്ലോക്ക് വൈസിൽ നടക്കരുത് എന്ന് പറയാറുണ്ട്. തടസങ്ങളും മറ്റും ഇല്ലാതിരിക്കാനാണ് ഇത്. ഏതായാലും ബം​ഗളൂരുവിലെ ഓട്ടവും ജോ​ഗിങ്ങും ഒക്കെ നിരോധിച്ചിരിക്കുന്ന ഈ പാർക്കിലും അത് നിരോധിച്ചിട്ടുണ്ട്. ഇത് ട്വിറ്ററിൽ പോസ്റ്റ് ചെയ്ത ആൾ പറയുന്നത് ഇത്തരത്തിലുള്ള ബോർഡുകൾ പലപ്പോഴും കാണാറുണ്ട്, ശരിക്കും അത് എന്തിനാണ് എന്നാണ്. 

ഏതായാലും, പുഞ്ചിരിച്ച് കൊണ്ട് പൂക്കൾ പറിക്കരുത് എന്ന ബോർഡിന്റെ ചിത്രവും ഇപ്പോൾ വൈറലായിരിക്കുകയാണ്.