മുത്തശ്ശിക്കഥ പോലെ; 650 അടി താഴ്ചയിലൊരു സിങ്ക്ഹോൾ, അകത്ത് കൊടുംകാട്

തെക്കുപടിഞ്ഞാറൻ ചൈനയിലെ ഗ്വാങ്‌സി ഷുവാങ് സ്വയംഭരണ പ്രദേശത്തുള്ള ലെയ് ഫെങ്ഷാൻ യുനെസ്കോ ഗ്ലോബൽ ജിയോപാർക്കിലാണ് ഇത് കണ്ടെത്തിയത്.

ഒരുപാട് നി​ഗൂഢതകളും വിസ്മയങ്ങളും നിറഞ്ഞ ഒന്നാണ് നമ്മുടെ പ്രപഞ്ചം. അതിൽ വളരെ വളരെ ചെറിയ ശതമാനം മാത്രമാണ് മനുഷ്യർ കണ്ടിട്ടുണ്ടാവുക. ഒരിക്കലും അവസാനിക്കാത്ത അനേകം അത്ഭുതങ്ങൾ ഈ പ്രപഞ്ചം കാത്തുവച്ചിട്ടുണ്ടാകും. അതുപോലെ ഒന്നാണ് ചൈനയിൽ കണ്ടെത്തിയ ഈ സിങ്ക്ഹോളും. വെറുമൊരു സിങ്ക്ഹോൾ മാത്രമല്ല. അതിനകത്ത് ഒരു കാട് തന്നെ ഉണ്ട് എന്നതാണ് അതിന്റെ പ്രത്യേകത. 

650 അടി ആഴത്തിലാണ് ഈ സിങ്ക്ഹോൾ ഉള്ളത്. കഴിഞ്ഞ വർഷം മെയ് മാസത്തിലാണ് ഒരു ചൈനീസ് ജിയോപാർക്കിൽ നിന്നും 650 അടി താഴ്ചയുള്ള ഈ സിങ്ക്ഹോൾ കണ്ടെത്തിയത്. ഇതിലെ ഏറ്റവും കൗതുകകരമായ കാര്യം നേരത്തെ പറഞ്ഞതു പോലെ അതിനകത്ത് ഒരു കാടുണ്ട് എന്നത് തന്നെയാണ്. കഴിഞ്ഞ വർഷം ഇതിന്റെ ഫോട്ടോകൾ സാമൂഹിക മാധ്യമങ്ങളിൽ വൈറലായിരുന്നു. അതോടെ, പലരും ഇതിനെ 'നരകത്തിലേക്കുള്ള വാതിൽ', 'സ്വർ​ഗത്തിലെ കുഴികൾ' തുടങ്ങി പല പേരിലും വിശേഷിപ്പിച്ചിരുന്നു. 

തെക്കുപടിഞ്ഞാറൻ ചൈനയിലെ ഗ്വാങ്‌സി ഷുവാങ് സ്വയംഭരണ പ്രദേശത്തുള്ള ലെയ് ഫെങ്ഷാൻ യുനെസ്കോ ഗ്ലോബൽ ജിയോപാർക്കിലാണ് ഇത് കണ്ടെത്തിയത്. യുനെസ്കോയുടെ വെബ്സൈറ്റ് പ്രകാരം ജിയോപാർക്കിൽ, ഡെവോണിയൻ മുതൽ പെർമിയൻ കാലഘട്ടങ്ങൾ വരെയുള്ള 60% കാർബണേറ്റ് പാറകൾ ഉണ്ട് എന്നാണ് പറയുന്നത്.

​ഗവേഷകർ പറയുന്നതനുസരിച്ച്, പുരാതനകാലത്തെ ഈ വനത്തിൽ നേരത്തെ അജ്ഞാതമായ വിവിധയിനം ചെടികളും മൃ​ഗങ്ങളും ഉണ്ടായിരുന്നു എന്നാണ്. അതുപോലെ ഇത്തരം സിങ്ക്ഹോളുകൾ ഇത് ആദ്യമായിട്ടല്ല ചൈനയിൽ കണ്ടെത്തുന്നത്. ചൈനീസ് സർക്കാരിന്റെ ന്യൂസ് ഏജൻസിയായ സിൻഹുവ (Xinhua) റിപ്പോർട്ട് ചെയ്യുന്നത് ഇതുപോലെയുള്ള 30 സിങ്ക്ഹോളുകൾ രാജ്യത്താകെയായി ഉണ്ട് എന്നാണ്.