വലിയ സ്ക്രീനുകൾ വീണ്ടും സ്വപ്നം കണ്ടുതുടങ്ങുമ്പോൾ; തിയേറ്ററുകളെ പ്രണയിച്ച് ജെൻ സി

ഇരുപതാം നൂറ്റാണ്ടിൽ സിനിമ നേരിട്ട ഏറ്റവും വലിയ ഭീഷണി ടെലിവിഷൻ ആയിരുന്നു. എന്നാൽ ഇന്ന് സൊന്റാഗ് ഭയപ്പെട്ട ആ തകർച്ചയുടെ ആഴം വർദ്ധിപ്പിച്ചുകൊണ്ട് ‘സ്ട്രീമിംഗ്’ യുഗം എത്തിയിരിക്കുന്നു. നിലവിൽ സിനിമ ഒരു വലിയ അസ്തിത്വ പ്രതിസന്ധി നേരിടുകയാണ്. 

സിനിമ എന്ന കലാരൂപത്തിന്റെ നൂറാം വാർഷിക വേളയിൽ, അതായത് ഏകദേശം മുപ്പത് വർഷങ്ങൾക്ക് മുമ്പ് പ്രശസ്ത ചിന്തക സൂസന്‍ സൊന്റാഗ് ഒരു ലേഖനമെഴുതി. 'ദി ഡെകസി ഓഫ് സിനിമ' എന്നായിരുന്നു അതിന്റെ പേര്. മനുഷ്യൻ എങ്ങനെ നടക്കണം, എങ്ങനെ സംസാരിക്കണം, എങ്ങനെ പ്രണയിക്കണം, എന്തിന് എങ്ങനെ ദുഃഖിക്കണം എന്ന് പോലും പഠിച്ചത് ആഴ്ചയിലൊരിക്കൽ തീയേറ്ററുകളിലേക്ക് നടത്തിയ ആ യാത്രകളിലൂടെയായിരുന്നു എന്ന് അവർ അതിൽ കുറിച്ചു. അന്ന് സിനിമയുടെ തകർച്ചയ്ക്ക് കാരണമായി അവർ കണ്ടത് ടെലിവിഷന്റെ വരവായിരുന്നു. എന്നാൽ ഇന്ന്, സൊന്റാഗ് ഭയപ്പെട്ട ആ തകർച്ചയുടെ ആഴം വർദ്ധിപ്പിച്ചുകൊണ്ട് 'സ്ട്രീമിംഗ്' പ്ലാറ്റ്‌ഫോമുകൾ ലോകത്തെ കീഴടക്കിയിരിക്കുന്നു. ഈയൊരു പശ്ചാത്തലത്തിലാണ് സിനിമയുടെ ഭാവിയെക്കുറിച്ച് 'ദി ഗാർഡിയൻ' തങ്ങളുടെ എഡിറ്റോറിയലിലൂടെ സംസാരിക്കുന്നത്.

സിനിമ നേരിടുന്ന നിലനിൽപ്പ് പ്രതിസന്ധി

സിനിമ ഇന്ന് അതിന്റെ ചരിത്രത്തിലെ ഏറ്റവും വലിയ അസ്തിത്വ പ്രതിസന്ധിയിലൂടെയാണ് കടന്നുപോകുന്നത്. കേവലം വരുമാനത്തിലെ കുറവ് മാത്രമല്ല ഇത് സൂചിപ്പിക്കുന്നത്. നെറ്റ്ഫ്ലിക്സ് പോലുള്ള സ്ട്രീമിംഗ് ഭീമന്മാർ വാർണർ ബ്രദേഴ്സിനെപ്പോലെയുള്ള പാരമ്പര്യമുള്ള സ്റ്റുഡിയോകളെ ഏറ്റെടുക്കാൻ ശ്രമിക്കുന്നു. 2023-ൽ ഹോളിവുഡിൽ നടന്ന എഴുത്തുകാരുടെയും നടീനടന്മാരുടെയും സമരങ്ങളും ലോക്ക്ഡൗണിന്റെ ആഘാതവും തീയേറ്ററുകളെ വല്ലാതെ തളർത്തിയിട്ടുണ്ട്.

പ്രശസ്ത താരം ലിയോനാർഡോ ഡികാപ്രിയോയുടെ സിനിമ പോലും ഓസ്കാർ നാമനിർദ്ദേശങ്ങൾ വാരുന്നുണ്ടെങ്കിലും തീയേറ്ററുകളിൽ ലാഭമുണ്ടാക്കാൻ കഷ്ടപ്പെടുകയാണ്. ജനങ്ങൾക്ക് ഇന്നും സിനിമകളോട് പഴയ ആവേശം ഉണ്ടോ എന്ന് അദ്ദേഹം സംശയിക്കുന്നു. തീയേറ്ററുകൾ ഭാവിയിൽ വെറും 'ജാസ് ബാറുകൾ' പോലെ ഒരു ചെറിയ വിഭാഗം ആളുകൾക്ക് മാത്രം പ്രിയപ്പെട്ട ഇടങ്ങളായി മാറുമോ എന്നാണ് അദ്ദേഹത്തിന്റെ ആശങ്ക. ഇതിനുപുറമെ, ഡിജിറ്റൽ ലോകത്തിന്റെ കടന്നുകയറ്റം മനുഷ്യന്റെ ശ്രദ്ധ കേന്ദ്രീകരിക്കാനുള്ള കഴിവിനെ ഇല്ലാതാക്കിയെന്നും ഇത് സിനിമയെ വലിയ രീതിയിൽ ബാധിച്ചുവെന്നും ഈ രംഗത്തെ പ്രമുഖർ ചൂണ്ടിക്കാട്ടുന്നു.

സിനിമകളുടെ ദൈർഘ്യവും തീയേറ്ററുകളുടെ ഭാവിയും

ഇന്നത്തെ സിനിമകൾ അമിത ദൈർഘ്യമുള്ളവയാകുന്നത് മറ്റൊരു പ്രതിസന്ധിയാണ്. 'ദി ബ്രൂട്ടലിസ്റ്റ്', 'അവതാർ: ഫയർ ആൻഡ് ആഷ്' തുടങ്ങിയ സിനിമകൾ മൂന്ന് മണിക്കൂറിൽ അധികം സമയമെടുക്കുന്നു. ഇത്രയും വലിയ സിനിമകൾ കാണുന്ന പ്രേക്ഷകരെ മടുപ്പിക്കുക മാത്രമല്ല, തീയേറ്ററുകളുടെ ലാഭത്തെയും ബാധിക്കുന്നു. ഒരു രാത്രിയിൽ ഒരു ഷോ മാത്രമേ നടത്താൻ കഴിയൂ എന്ന സാഹചര്യം സാമ്പത്തികമായി വലിയ തിരിച്ചടിയാണ്. യുകെയിലെ സ്വതന്ത്ര തീയേറ്ററുകളിൽ മൂന്നിലൊന്നും വരും വർഷങ്ങളിൽ അടച്ചുപൂട്ടൽ ഭീഷണിയിലാണ്. നമ്മുടെ പരിസരത്തുള്ള ചെറിയ തീയേറ്ററുകൾ അപ്രത്യക്ഷമാകുന്നത് ഒരു വലിയ ദുരന്തമായിരിക്കുമെന്ന് ഗാർഡിയൻ നിരീക്ഷിക്കുന്നു.

ജെൻ സിയും സിനിമയുടെ പുനർജന്മവും

എല്ലാ പ്രതിസന്ധികൾക്കിടയിലും ഒരു വലിയ പ്രത്യാശ നൽകുന്നത് പുതിയ തലമുറയാണ്. ഡിജിറ്റൽ ലോകത്ത് ജനിച്ചുവളർന്നവരാണെങ്കിലും, യുവാക്കൾ വീണ്ടും തീയേറ്ററുകളിലെ വലിയ സ്ക്രീനിനെ പ്രണയിച്ചു തുടങ്ങിയിരിക്കുന്നുവെന്നാണ് ദി ഗാർഡിയൻ റിപ്പോർട്ട് ചെയ്യുന്നത്. ബ്രിട്ടീഷ് കൗൺസിൽ നടത്തിയ സർവ്വേ പ്രകാരം, സോഷ്യൽ മീഡിയ ഇൻഫ്ലുവൻസർമാരേക്കാൾ ഇരട്ടി സ്വാധീനം സിനിമയ്ക്കും ടെലിവിഷനും യുവാക്കൾക്കിടയിലുണ്ട്. കഴിഞ്ഞ വർഷം അമേരിക്കയിൽ യുവാക്കളായ സിനിമാ കാഴ്ചക്കാരുടെ എണ്ണത്തിൽ 25 ശതമാനം വർദ്ധനവുണ്ടായി. 2025-ൽ ബ്രിട്ടനിലെയും അയർലണ്ടിലെയും ബോക്സ് ഓഫീസ് വരുമാനം വൻതോതിൽ വർദ്ധിച്ചത് ഈ മാറ്റത്തിന്റെ സൂചനയാണ്.

രസകരമായ വസ്തുത എന്തെന്നാൽ, ഇൻസ്റ്റാഗ്രാമും 'ലെറ്റർബോക്സ്ഡ്' പോലുള്ള പ്ലാറ്റ്‌ഫോമുകളും വഴിയുള്ള ചർച്ചകളാണ് യുവാക്കളെ വീണ്ടും തീയേറ്ററുകളിലേക്ക് എത്തിക്കുന്നത്. ലണ്ടനിലെ പ്രശസ്തമായ പ്രിൻസ് ചാൾസ് തീയേറ്റർ അടച്ചുപൂട്ടാൻ ശ്രമിച്ചപ്പോൾ ഉണ്ടായ പ്രതിഷേധം തെളിയിക്കുന്നത്, പുതിയ തലമുറയ്ക്ക് സിനിമ വെറുമൊരു വിനോദമല്ല, മറിച്ച് അതൊരു വികാരമാണെന്നാണ്.

ഗാർഡിയന്റെ നിലപാടും സിനിമയുടെ ഭാവി ആഹ്വാനവും

സംവിധായകൻ മാർട്ടിൻ സ്കോസെസി പറഞ്ഞതുപോലെ, സിനിമയ്ക്ക് അർഹിക്കുന്ന ബഹുമാനം നമ്മൾ നൽകണം. അൽഗോരിതങ്ങൾ വിളമ്പുന്ന ഉള്ളടക്കങ്ങൾ കണ്ട് സോഫകളിൽ ഇരിക്കുന്നതിന് പകരം തീയേറ്ററുകളിലേക്ക് ഇറങ്ങണം. അല്ലെങ്കിൽ വെറും പൊള്ളയായ ദൃശ്യങ്ങൾ മാത്രം കാണുന്നവരായി നമ്മൾ മാറും. സൂസൻ സൊന്റാഗ് തന്റെ ലേഖനത്തിന്റെ അവസാനം കുറിച്ചതുപോലെ, സിനിമയ്ക്ക് ഒരു പുനർജന്മം ഉണ്ടാകണമെങ്കിൽ അത് സിനിമയോടുള്ള പുതിയൊരു പ്രണയത്തിലൂടെ മാത്രമേ സാധ്യമാകൂ. ആ പ്രണയം പുതിയ തലമുറയിൽ കാണുന്നുണ്ട് എന്നത് സിനിമയുടെ ഭാവി സുരക്ഷിതമാണെന്ന പ്രത്യാശ നൽകുന്നു.