'2026 -ൽ മഹാദുരന്തങ്ങൾ, മൂന്നാംലോക മഹായുദ്ധം?'; വീണ്ടും ചർച്ചയായി ബാബ വാം​ഗയുടെ 'പ്രവചനം'

1996 -ലാണ് ഇവർ മരിക്കുന്നത്. എന്നാൽ, പ്രവചനങ്ങളുടെ പേരിൽ ഇവർ പിന്നീട് അറിയപ്പെടുകയായിരുന്നു. 9/11 അറ്റാക്കുകളും 2022 -ലെ യുകെ വെള്ളപ്പൊക്കവും ഇവർ പ്രവചിച്ചിരുന്നു എന്നാണ് പറയപ്പെടുന്നത്.

പ്രവചനങ്ങൾക്ക് ശാസ്ത്രീയമായ അടിത്തറകളൊന്നും തന്നെ ഇല്ല. എന്നിരുന്നാലും എല്ലാ കാലത്തും ആളുകൾക്ക് ഈ പ്രവചനങ്ങളിൽ വലിയ കൗതുകമാണ്. ഓർമ്മയില്ലേ, ജപ്പാൻ നോവലിലെ ജൂലായ് അഞ്ചിന് ഒരു മഹാദുരന്തമുണ്ടാകുമെന്ന പ്രവചനം ലോകത്താകെ വാർത്തയായത്. രാജ്യത്തെ ടൂറിസത്തെ പോലും വലിയ തരത്തിലാണ് ഈ പ്രചവചനം ബാധിച്ചത്. റിയോ തത്സുകിയുടെ 2021 -ലെ 'ദി ഫ്യൂച്ചർ ഐ സോ' എന്ന പുസ്‌തകത്തെ അടിസ്ഥാനമാക്കിയാണ് ഈ പ്രവചനം ലോകശ്രദ്ധ നേടിയത്. 'ജപ്പാന്റെ ബാബ വാംഗ' എന്നും തത്സുകി അറിയപ്പെടുന്നുണ്ട്. ഇപ്പോഴിതാ സാക്ഷാൽ ബാബ വാം​ഗ തന്നെ നടത്തിയ ചില പ്രവചനങ്ങളാണ് ശ്രദ്ധിക്കപ്പെടുന്നത്. 2026 -ൽ നടക്കാൻ പോകുന്ന കുറച്ചു കാര്യങ്ങളെ കുറിച്ചാണ് പ്രവചനം.

ബൾഗേറിയയിൽ ജനിച്ച ബാബ വം​ഗ 'ബാൽക്കണിലെ നോസ്ട്രഡാമസ്' എന്നാണ് അറിയപ്പെടുന്നത്. അന്ധയായ ബാബാ വം​ഗയ്ക്ക് ഒരു കൊടുങ്കാറ്റിൽ അകപ്പെട്ട് പോയശേഷം കുട്ടിക്കാലത്ത് തന്നെ കാഴ്ച നഷ്ടപ്പെട്ടതായി പറയപ്പെടുന്നു. 1996 -ലാണ് ഇവർ മരിക്കുന്നത്. എന്നാൽ, പ്രവചനങ്ങളുടെ പേരിൽ ഇവർ പിന്നീട് അറിയപ്പെടുകയായിരുന്നു. 9/11 അറ്റാക്കുകളും 2022 -ലെ യുകെ വെള്ളപ്പൊക്കവും ഇവർ പ്രവചിച്ചിരുന്നു എന്നാണ് പറയപ്പെടുന്നത്.

ഇപ്പോഴിതാ 2026 -ൽ എന്ത് സംഭവിക്കുമെന്നതിനെ കുറിച്ച് ഇവർ നടത്തിയ പ്രവചനങ്ങളാണ് ശ്രദ്ധിക്കപ്പെടുന്നത്. പ്രകൃതിദുരന്തങ്ങളുടെ പരമ്പര തന്നെ 2026 -ലുണ്ടാകുമെന്നാണ് ബാബ വാം​ഗ പറയുന്നത്. ഭൂകമ്പങ്ങൾ, അഗ്നിപർവ്വത സ്ഫോടനങ്ങൾ, കടുത്ത കാലാവസ്ഥാ വ്യതിയാനങ്ങൾ ഇവയെല്ലാം ഇതിൽ പെടുന്നു. ഭൂമിയുടെ കരഭാഗത്തിന്റെ ഏഴ് മുതൽ എട്ട് ശതമാനം വരെ ഈ പ്രകൃതിദുരന്തങ്ങളിൽ ബാധിക്കപ്പെടുമെന്നാണത്രെ വാം​ഗയുടെ പ്രവചനം.

ഇത് കൂടാതെ 2026 -ൽ മൂന്നാം ലോക മഹായുദ്ധമുണ്ടാകുമെന്നും ബാബ വാം​ഗ പ്രവചിച്ചിട്ടുണ്ട്. അതുമാത്രമല്ല, 2026 -ൽ നിർമ്മിതബുദ്ധി ശക്തി പ്രാപിക്കുമെന്നും മനുഷ്യരെ തന്നെ നിയന്ത്രിക്കുന്ന ശക്തിയായി അത് മാറുമെന്നും ബാബ വാം​ഗയുടെ പ്രവചനങ്ങളിലുണ്ട് എന്നാണ് പറയപ്പെടുന്നത്. അതേസമയം, ഇതിനൊന്നും കൃത്യമായ തെളിവുകളോ അടിസ്ഥാനമോ ഇല്ല.