ഇരട്ടക്കുട്ടികള്‍, ഒരാള്‍ പിറന്നത് 2022-ല്‍, മറ്റേയാള്‍ 2023-ല്‍!

ഒരു കുഞ്ഞു ജനിച്ചത് 2022 -ലും അടുത്ത കുഞ്ഞ് ജനിച്ചത് 2023 -ലും ആണ്. രസകരമായ ആ കഥ ഇങ്ങനെയാണ്.

ഇരട്ടക്കുട്ടികളോട് എല്ലാവര്‍ക്കും ഒരു പ്രത്യേക സ്‌നേഹം ആയിരിക്കും. അമ്മയുടെ വയറ്റില്‍ നിന്നും ഒരേ ദിവസം ഒരുമിച്ചു പുറത്തേക്ക് വരുന്ന കുഞ്ഞുങ്ങളെയാണ് ഇരട്ട കുട്ടികള്‍ എന്ന് നമ്മള്‍ പൊതുവില്‍ പറയുന്നത്. പലപ്പോഴും ഇവരുടെ ജനനസമയങ്ങള്‍ തമ്മില്‍ മിനിറ്റുകളുടെ വ്യത്യാസം മാത്രമേ കാണുകയുള്ളൂ. എന്നാല്‍ കഴിഞ്ഞദിവസം ടെക്‌സസില്‍ നിന്നുള്ള  ദമ്പതികള്‍ പങ്കുവെച്ചത് മറ്റൊരു കഥയാണ്. അവരുടെ ഒരു കുഞ്ഞു ജനിച്ചത് 2022 -ലും അടുത്ത കുഞ്ഞ് ജനിച്ചത് 2023 -ലും ആണ്. രസകരമായ ആ കഥ ഇങ്ങനെയാണ്.

2022 ഡിസംബര്‍ 31 -ന് അര്‍ദ്ധരാത്രി അടുപ്പിച്ചാണ് കാലി  ജോ സ്‌കോട്ട് എന്ന സ്‌കോട്ട്‌ലാന്‍ഡ് സ്വദേശിയായ യുവതിയെ അവളുടെ രക്തസമ്മര്‍ദ്ദ വ്യതിയാനത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചത്. പരിശോധനയ്ക്ക് ശേഷം ഡോക്ടര്‍മാര്‍, സിസേറിയന്‍ നടത്തി എത്രയും വേഗം കുഞ്ഞുങ്ങളെ പുറത്ത് എടുക്കാന്‍ തീരുമാനിച്ചു. 2023 ജനുവരി 11 -നായിരുന്നു മുന്‍പ് ഓപ്പറേഷന്‍  തീരുമാനിച്ചിരുന്ന തീയതി . എന്നാല്‍ അത്രയും ദിവസം കാത്തിരിക്കുന്നത് അമ്മയ്ക്കും കുഞ്ഞുങ്ങള്‍ക്കും അപകടം ഉണ്ടാകുമെന്ന് മനസ്സിലാക്കിയതിനെ തുടര്‍ന്നാണ് ഡോക്ടര്‍മാര്‍ എത്രയും വേഗം അവളുടെ സര്‍ജറി ചെയ്യാന്‍ തീരുമാനിച്ചത്. അങ്ങനെ ആ പുതുവര്‍ഷ രാവിലെ അവളുടെ സി- സെക്ഷന്‍ നടത്തി. 

2022 ഡിസംബര്‍ 31-ന് രാത്രി 11. 55 -ന് ഇരട്ടക്കുട്ടികളില്‍ ആദ്യത്തെ കുഞ്ഞിനെ പുറത്തെടുത്തു. ആദ്യത്തെ കുഞ്ഞു പിറന്ന് ഏഴ് മിനിറ്റ് കഴിഞ്ഞപ്പോള്‍  2023 ജനുവരി ഒന്നിലെ ആ പുതുവര്‍ഷ പുലരിയില്‍ അവളുടെ രണ്ടാമത്തെ കുഞ്ഞും പിറന്നു. ആദ്യം പിറന്ന കുഞ്ഞിന് ആനി ജോ എന്നും രണ്ടാമത് ഉണ്ടായ കുഞ്ഞിന് എഫി റോസ് എന്നുമാണ് പേര് നല്‍കിയിരിക്കുന്നത്. ഏതായാലും വെറും മിനിറ്റുകളുടെ വ്യത്യാസത്തില്‍ മാത്രമാണ് ഈ കുഞ്ഞു സഹോദരിമാര്‍ രണ്ടു  വര്‍ഷങ്ങളിലായി പിറന്നിരിക്കുന്നത്. 

അപൂര്‍വങ്ങളില്‍ അപൂര്‍വമായി മാത്രം സംഭവിക്കുന്ന ഒരു ജനനമാണ് ഇവരുടെത്. കഴിഞ്ഞവര്‍ഷം കാലിഫോണിയയില്‍ നിന്നുള്ള  ദമ്പതികള്‍ക്കും സമാനമായ രീതിയില്‍ മിനിറ്റുകളുടെ വ്യത്യാസത്തില്‍ രണ്ടുവര്‍ഷങ്ങളിലായി കുഞ്ഞുങ്ങള്‍ പിറന്നിരുന്നു. 2021 ഡിസംബര്‍ 31-നും 22 ജനുവരി ഒന്നിനുമായാണ് കാലിഫോര്‍ണിയയില്‍ നിന്നുള്ള ഫാത്തിമ മാട്രിഗല്‍ എന്ന യുവതി തന്റെ ഇരട്ട കുഞ്ഞുങ്ങള്‍ക്ക് ജന്മം നല്‍കിയത്. ഏതായാലും ഇനി ഒരു 12 മാസം കൂടി കാത്തിരിക്കാം മറ്റാരെങ്കിലും ഈ കഥ തുടരുമോ എന്നറിയാന്‍.