ലോകത്തിലെ ഏറ്റവും വലിയ നായ? ശരിക്കും കുതിരയെപ്പോലെ തന്നെ എന്ന് ആരാധകർ

തങ്ങൾക്ക് അവനെ കിട്ടുമ്പോൾ തന്നെ അവനൊരു വലിയ നായയായിരുന്നു എന്ന് ബ്രിട്ടാനി ​ഗിന്നസ് വേൾഡ് റെക്കോർഡ്സിനോട് പറഞ്ഞിരുന്നു. 

ലോകത്തിലെ ഏറ്റവും വലിയ നായ ഏതാണ് എന്ന് അറിയുമോ? ​ഗിന്നസ് വേൾഡ് റെക്കോർഡ്സ് പ്രകാരം സിയൂസ് Zeus) എന്ന ഒരു ഗ്രേറ്റ് ഡേൻ (Great Dane) ആണത്. ടെക്‌സാസിലെ ബെഡ്‌ഫോർഡിൽ നിന്നുള്ള രണ്ട് വയസ്സുള്ള സിയൂസിന്റെ ഉയരം 1.046 മീറ്ററാണ്. അതായത്, 3 അടി, 5.18 ഇഞ്ച്. മാർച്ച് 22 -നാണ് ഔദ്യോ​ഗികമായി അവനെ ലോകത്തിലെ ഏറ്റവും വലിയ നായയായി അം​ഗീകരിച്ചത്. അവന്റെ മൃ​ഗഡോക്ടർ അവന്റെ നീളം പരിശോധിച്ച് ഉറപ്പ് വരുത്തി.

ബ്രിട്ടാനി ഡേവിസ് (Brittany Davis) എന്നാണ് സിയൂസിന്റെ ഉടമയുടെ പേര്. സിയൂസിന് എട്ടാഴ്ച മാത്രം പ്രായമുള്ളപ്പോൾ ബ്രിട്ടാനിയുടെ സഹോദരനാണ് അവനെ അവൾക്ക് സമ്മാനിക്കുന്നത്. സിയൂസ് എന്ന് പേരുള്ള ഒരു ​ഗ്രേറ്റ് ഡാൻ വേണം എന്ന് അവളെപ്പോഴും ആ​ഗ്രഹിച്ചിരുന്നു. അതിനാൽ തന്നെ അവനെ കിട്ടിയപ്പോൾ അവൾക്കുണ്ടായ സന്തോഷം പറഞ്ഞറിയിക്കാനാവില്ല. ആദ്യം അവന്റെ നീളവും വലിപ്പവും അവളെ ഒന്ന് പരിഭ്രമിപ്പിച്ചു എങ്കിലും പിന്നീട് അവൾ അതിനോട് പൊരുത്തപ്പെട്ടു. 

തങ്ങൾക്ക് അവനെ കിട്ടുമ്പോൾ തന്നെ അവനൊരു വലിയ നായയായിരുന്നു എന്ന് ബ്രിട്ടാനി ​ഗിന്നസ് വേൾഡ് റെക്കോർഡ്സിനോട് പറഞ്ഞിരുന്നു. 12 കപ്പ് ഡോ​ഗ് ഫുഡ്, ഇടയ്ക്കുള്ള പുഴുങ്ങിയ മുട്ട ഇവയെല്ലാം പെടുന്നു അവന്റെ മെനുവിൽ. തവിട്ടും ചാരനിറവും ചേർന്നതാണ് അവന്റെ നിറം. അവനിപ്പോൾ ഒരു പ്രാദേശിക സെലിബ്രിറ്റി തന്നെയാണ്. ബ്രിട്ടാനിക്കൊപ്പം പുറത്ത് പോകുമ്പോഴെല്ലാം ആളുകളവനെ ശ്രദ്ധിക്കുകയും അടുത്ത് വരികയും ചെയ്യുന്നു. 'ഉഫ്, അവൻ ശരിക്കും ഒരു കുതിരയെപ്പോലെ തന്നെ' എന്നാണ് മിക്കവരും പറയാറുള്ള കമന്റ് എന്ന് ബ്രിട്ടാനി പറയുന്നു. 

അമേരിക്കൻ കെന്നൽ ക്ലബ്ബിന്റെ അഭിപ്രായത്തിൽ, ഗ്രേറ്റ് ഡേനുകൾ മധ്യകാലഘട്ടത്തിലെ വേട്ടക്കാരായ നായകളിൽ നിന്നുമുള്ളവയാണ് മറ്റ് ഇനങ്ങളെക്കാൾ ഉയരമുള്ളവയാണ് എങ്കിലും അവയ്ക്ക് മറ്റുള്ള നായകളേക്കാൾ ആയുസ് കുറവായിരിക്കും. കഴിഞ്ഞ വർഷം, ലോകത്തിലെ ഏറ്റവും ഉയരം കൂടിയ നായയായി ഗിന്നസ് വേൾഡ് റെക്കോർഡ് ഒരിക്കൽ ആഘോഷിച്ചിരുന്ന ഗ്രേറ്റ് ഡേൻ ഫ്രെഡി എട്ട് വയസ്സുള്ളപ്പോൾ മരിച്ചിരുന്നു.