വയനാടിന്റെ കാട്ടിലൊളിപ്പിച്ച വിസ്മയം: ചെതലയം വെള്ളച്ചാട്ടം മിസ്സാക്കല്ലേ

ട്രെക്കിംഗ് പ്രേമികൾക്കും പ്രകൃതിസ്നേഹികൾക്കും അനുയോജ്യമായ ഈ സ്ഥലത്തേക്ക്, വനത്തിലൂടെ നാല് കിലോമീറ്റർ ട്രെക്ക് ചെയ്ത് എത്താം. പക്ഷിനിരീക്ഷണത്തിനും ഈ പ്രദേശം പേരുകേട്ടതാണ്.

വെള്ളച്ചാട്ടം ഇഷ്ടമല്ലാത്തവരായി ആരുമുണ്ടാകില്ല. പ്രകൃതിയുടെ മടിയിലൊളിഞ്ഞിരിക്കുന്ന ഹിഡൻ സ്പോട്ടുകൾ കണ്ടെത്തി അവിടേക്ക് സാഹസിക യാത്രകളായി പോകുന്നവരിൽ വർധനയുണ്ട്. അത്തരത്തിൽ ഇപ്പോഴും അത്ര അറിയപ്പെടാത്ത, പക്ഷേ അതീവ മനോഹരമായ ഒരു വെള്ളച്ചാട്ടമാണ് ചെതലയം വെള്ളച്ചാട്ടം (Chethalayam Waterfalls). വയനാട്ടിലാണ് ഈ വെള്ളച്ചാട്ടം സ്ഥിതി ചെയ്യുന്നത്.

ട്രെക്കിംഗ് പ്രേമികൾക്കും പ്രകൃതി ആസ്വാദകർക്കും ചെതലയം തീർച്ചയായും ഇഷ്ടമാകും. വയനാടിന്റെ വടക്കൻ അറ്റത്ത്, സുൽത്താൻ ബത്തേരിയോട് ചേർന്നാണ് ചെതലയം വെള്ളച്ചാട്ടം സ്ഥിതി ചെയ്യുന്നത്. മീൻമുട്ടിയുമായി താരതമ്യപ്പെടുത്തുമ്പോൾ ചെറുതായെങ്കിലും, സാഹസിക ട്രെക്കിംഗിനും പക്ഷിനിരീക്ഷണത്തിനും പറ്റിയ സ്ഥലമാണ് ഈ പ്രദേശം.

വനങ്ങളാൽ ചുറ്റപ്പെട്ട ഈ പ്രദേശം പക്ഷികൾക്കും ചെറിയ വന്യജീവികൾക്കും അഭയമാണ്. വെള്ളച്ചാട്ടത്തിലേക്ക് പ്രവേശിക്കാനായി ചെതലയം ഫോറസ്റ്റ് റേഞ്ച് ഓഫീസിൽ നിന്ന് അനുമതി നേടണം, എന്നാൽ പ്രവേശന ഫീസ് ഇല്ല. കിടങ്ങനാട് മുതൽ ഏകദേശം നാല് കിലോമീറ്ററോളം നീളുന്ന ട്രെക്കിംഗ് പൂർത്തിയാക്കി മാത്രമേ വെള്ളച്ചാട്ടത്തിൽ എത്താൻ കഴിയൂ. ചെതലയത്തേയ്ക്കുള് പാത മുഴുവൻ പച്ചപ്പും കാടിന്റെ ശാന്തതയും നിറഞ്ഞതാണ്.

സെപ്റ്റംബർ മുതൽ മാർച്ച് വരെ കാലഘട്ടം ചെതലയം സന്ദർശിക്കാൻ ഏറ്റവും അനുയോജ്യമായതാണ്. സുൽത്താൻ ബത്തേരിയിൽ നിന്ന് 15 കിലോമീറ്ററും, കൽപറ്റയിൽ നിന്ന് 30 കിലോമീറ്ററും അകലെയാണ് ഈ സ്ഥലമുണ്ടായത്. കോഴിക്കോട് റെയിൽവേ സ്റ്റേഷനിൽ നിന്ന് ഏകദേശം 100 കിലോമീറ്റർ ദൂരം യാത്ര ചെയ്യണം. ബസും സ്വകാര്യ വാഹനങ്ങളും ഉപയോഗിച്ച് എളുപ്പത്തിൽ ഇവിടെ എത്തിച്ചേരാം.