തെന്മലയുടെ മുകൾത്തട്ടിലെ രഹസ്യം; 360 ഡിഗ്രി സുന്ദരക്കാഴ്ചകൾ സമ്മാനിച്ച് പാണ്ഡവൻ പാറ

കൊല്ലം ജില്ലയിൽ തെന്മലയ്ക്ക് സമീപം സ്ഥിതി ചെയ്യുന്ന ഒരു രഹസ്യ വിനോദസഞ്ചാര കേന്ദ്രമാണ് പാണ്ഡവൻ പാറ. പാണ്ഡവരുമായി ബന്ധപ്പെട്ട ഐതിഹ്യങ്ങളാലും പ്രകൃതിസൗന്ദര്യത്താലും സമ്പന്നമായ ഇവിടം, ശാന്തമായ ഒരു യാത്രാനുഭവം തേടുന്നവർക്ക് അനുയോജ്യമാണ്. 

നമ്മുടെ കൊച്ചു കേരളം പ്രകൃതിരമണീയമായ കാഴ്ചകൾകൊണ്ടും ചരിത്രപരമായ പ്രാധാന്യം കൊണ്ടും അനുഗ്രഹീതമാണ്. പ്രശസ്തമായ ടൂറിസ്റ്റ് കേന്ദ്രങ്ങൾക്കപ്പുറം, സഞ്ചാരികളുടെ കണ്ണിൽപ്പെടാതെ മറഞ്ഞുകിടക്കുന്ന നിരവധി അദ്ഭുതകേന്ദ്രങ്ങൾ ഇവിടെയുണ്ട്. അത്തരത്തിൽ, തിരക്കുകളിൽ നിന്നും ഒഴിഞ്ഞ ശാന്തമായ ഒരിടം തേടുന്ന യാത്രാപ്രേമികൾക്കായി കൊല്ലം ജില്ല ഒളിപ്പിച്ചുവെച്ച ഒരു രഹസ്യസങ്കേതമാണ് പാണ്ഡവൻ പാറ.

പുരാണപ്പെരുമയും അതിമനോഹരമായ പ്രകൃതി സൗന്ദര്യവും ഒരുപോലെ ഒത്തുചേരുന്ന ഈ സ്ഥലം തെന്മലയ്ക്ക് അടുത്താണ് സ്ഥിതിചെയ്യുന്നത്. മഹാഭാരതത്തിലെ പാണ്ഡവരുമായി ബന്ധപ്പെട്ട ഐതിഹ്യങ്ങൾ പേറുന്ന ഈ പാറക്കെട്ട്, കേരളത്തിന്റെ നിഗൂഢമായ സൗന്ദര്യം അടുത്തറിയാൻ ആഗ്രഹിക്കുന്നവർക്ക് ഒരു നവ്യാനുഭവമാകും.

തെന്മലയിലെ ഉരുക്കുന്നിന് അടുത്താണ് പാണ്ഡവൻപാറയുള്ളത്. കാടിനുള്ളിലൂടെ നടന്ന് വേണം പാണ്ഡവൻ പാറയ്ക്ക് മുകളിലെത്താൻ. പാറയുടെ മുകളിൽ ഒരു ക്ഷേത്രവുമുണ്ട്. ഇവിടുത്തെ ഏറ്റവും വലിയ ആകർഷണം ഭീമാകാരമായ പാറകൾ തന്നെയാണ്. തെന്മലയുടെ ഭംഗി മുഴുവൻ ഈ പാണ്ഡവൻ പാറയ്ക്ക് മുകളിലെത്തിയാൽ കാണാം. കുന്നും മലയും തടാകവും റെയിൽപാതയുമെല്ലാം ഇവിടെ നിന്നാൽ കാണാൻ സാധിക്കും.

പാണ്ഡവൻപാറയ്ക്ക് മുകളിലെത്താൻ അല്പം നടക്കേണ്ടതായുണ്ട്. കാട്ടിലൂടെയുള്ള ഈ യാത്ര നിങ്ങൾക്ക് ഉറപ്പായും ഇഷ്ടപ്പെടും. വൈകുന്നേരങ്ങളിൽ ശാന്തമായ ഒരിടത്ത് ഇരിക്കാനാണ് നിങ്ങൾ ആഗ്രഹിക്കുന്നതെങ്കിൽ ധൈര്യമായി പാണ്ഡവൻ പാറയിലേക്ക് വരാം. തെന്മലയിലേക്ക് എത്തുന്ന ഭൂരിഭാഗം സഞ്ചാരികൾക്കും പാണ്ഡവൻ പാറയെ കുറിച്ച് അറിയില്ല. അതുകൊണ്ട് തന്നെ ഇനി തെന്മലയിലേക്ക് എത്തുമ്പോൾ പാണ്ഡവൻ പാറ കയറാൻ മറക്കേണ്ട.