തിരക്കുകളിൽ നിന്നൊഴിഞ്ഞ് ചരിത്രം ഉറങ്ങുന്ന മണ്ണിലേയ്ക്ക് ഒരു യാത്ര; പോകാം ചന്ദ്രഗിരിക്കോട്ടയിലേയ്ക്ക്

കടൽനിരപ്പിൽ നിന്ന് 150 അടിയോളം ഉയരത്തിലാണ് ചന്ദ്ര​ഗിരിക്കോട്ട സ്ഥിതി ചെയ്യുന്നത്.

കാസർ​ഗോഡ് ജില്ലയിലെ പ്രധാന വിനോദസഞ്ചാര കേന്ദ്രങ്ങളിലൊന്നാണ് ചന്ദ്ര​ഗിരിക്കോട്ട. ചന്ദ്ര​ഗിരിപ്പുഴയുടെ തീരത്തായാണ് ചന്ദ്ര​ഗിരിക്കോട്ട സ്ഥിതി ചെയ്യുന്നത്. പതിനേഴാം നൂറ്റാണ്ടിൽ ബേഡന്നൂരിലെ ശിവപ്പ നായിക്കാണ് ഈ കോട്ട പണി കഴിപ്പിച്ചത്. പലരുടെ ഉടമസ്ഥതകൾ കൈമറിഞ്ഞ് ഒടുവിൽ ഈസ്റ്റിന്ത്യാ കമ്പനിയുടെ കൈവശമായിരുന്നു ഈ കോട്ട. 

കടൽനിരപ്പിൽ നിന്ന് 150 അടിയോളം ഉയരത്തിൽ ഏഴ് ഏക്കറിലായാണ് കോട്ട വ്യാപിച്ചു കിടക്കുന്നത്. ഇപ്പോൾ പുരാവസ്തു വകുപ്പിനാണ് ഈ ചരിത്രസ്മാരകത്തിന്റെ സംരക്ഷണ ചുമതല. പ്രസിദ്ധ വിനോദസഞ്ചാര കേന്ദ്രമായ ബേക്കലിനെ അപേക്ഷിച്ച് ഇവിടെ സഞ്ചാരികളുടെ തിരക്ക് കുറവാണ്. കോട്ടമുകളിൽ നിന്നുളള സൂര്യാസ്തമയ ദൃശ്യം മനോഹരമാണ്. കൂടാതെ ചന്ദ്ര​ഗിരി പാലത്തിൽ നിന്നും തൊട്ടടുത്ത പ്രദേശങ്ങളിലേക്കുളള ബോട്ടിം​ഗ് ഹൃദ്യമായ ഒരനുഭവമാണ്. ഇവിടെയുളള ചന്ദ്ര​ഗിരി ബോട്ട് ക്ലബിൽ സ്പീഡ് ബോട്ടുകളും പുരവഞ്ചികളും ലഭ്യമാണ്.

എങ്ങനെ എത്താം

അടുത്തുളള റെയിൽവേ സ്റ്റേഷൻ : കാസർ​ഗോഡ്, 7 കി.മീ 
വിമാനത്താവളം: മംഗലാപുരം വിമാനത്താവളം (കർണാടക) 67 കി.മീ