മൺസൂൺ ആഘോഷമാക്കാൻ വയനാട് മഡ് ഫെസ്റ്റ് സീസൺ-3 നാളെ മുതല്; മത്സരങ്ങളുടെ രജിസ്ട്രേഷൻ തുടങ്ങി
Synopsis
ജൂലൈ 12 മുതൽ 17 വരെയാണ് വയനാട്ടിൽ മഡ്ഫെസ്റ്റ് സീസൺ 3 നടക്കുക.
കൽപ്പറ്റ: ജില്ലയിൽ മണ്സൂണ്കാല വിനോദസഞ്ചാരം പ്രോത്സാഹിപ്പിക്കുന്നതിന്റെ ഭാഗമായി ജില്ലാ ടൂറിസം പ്രമോഷന് കൗണ്സിലിന്റെ നേതൃത്വത്തില് സംഘടിപ്പിക്കുന്ന 'വയനാട് മഡ്ഫെസ്റ്റ്-സീസണ് 3' ജൂലൈ 12 ന് തുടങ്ങും. വിനോദസഞ്ചാര വകുപ്പ്, വിവിധ ടൂറിസം സംഘടനകൾ എന്നിവയുടെ സഹകരണത്തോടെ ജൂലൈ 12 മുതൽ 17 വരെയാണ് പരിപാടി. ഉദ്ഘടനം ജൂലൈ 12 ന് സുൽത്താൻ ബത്തേരിയിൽ സംസ്ഥാന വിനോദ സഞ്ചാര വകുപ്പ് മന്ത്രി പി എ മുഹമ്മദ് റിയാസ് നിർവഹിക്കും. സമാപനം ജൂലൈ 15 ന് മാനന്തവാടി വള്ളിയൂർകാവിൽ പട്ടികജാതി പട്ടിക്കവർഗ പിന്നാക്ക ക്ഷേമ വകുപ്പ് മന്ത്രി ഒ ആർ കേളു ഉദ്ഘാടനം ചെയ്യും.
ഫെസ്റ്റിന്റെ ഭാഗമായി മഡ് ഫുട്ബോള്, മഡ് വടംവലി, മഡ് കബഡി, കയാക്കിംഗ്, മണ്സൂണ് ട്രക്കിംഗ് എന്നിവ നടത്തും. വിവിധ മത്സരങ്ങളില് പങ്കെടുക്കുന്നതിനായുള്ള രജിസ്ട്രേഷന് ആരംഭിച്ചു. ജൂലൈ 14 ന് ഡബിൾ കാറ്റഗറി 100 മീറ്റർ വിഭാഗത്തിൽ കർലാട് തടകത്തിൽ കയാക്കിങ് മത്സരം നടക്കും. 500 രൂപയാണ് രജിസ്ട്രേഷൻ. ആദ്യ നാല് സ്ഥാനക്കാർക്ക് യഥാക്രമം 10000, 5000, 3000, 2000 രൂപയാണ് സമ്മാനം. വിവിധ മത്സരങ്ങളിൽ പങ്കെടുക്കുന്നതിനായി പേരുകൾ മുൻകൂട്ടി 9447399793, 7593892961 നമ്പറുകളിൽ ബന്ധപ്പെട്ട് രജിസ്റ്റർ ചെയ്യണം.