കാന്താരി

വീട്ടിൽ കാന്താരി ചെടി നട്ടിട്ടും അതിൽ മുളക് പിടിക്കുന്നില്ലേ? വഴിയുണ്ട്, ഇക്കാര്യങ്ങൾ ശ്രദ്ധിക്കാം. ദിവസം കുറഞ്ഞത് 5 - 6 മണിക്കൂർ വരെ നേരിട്ട് വെയിൽ ലഭിക്കുന്ന സ്ഥലങ്ങളിൽ നടുക.

മണ്ണിൽ എപ്പോഴും നേരിയ ഈർപ്പം ഉണ്ടായിരിക്കണം, എന്നാൽ വെള്ളം കെട്ടിക്കിടക്കാൻ അനുവദിക്കരുത്.

മേൽമണ്ണ്, ചാണകപ്പൊടി (അല്ലെങ്കിൽ കമ്പോസ്റ്റ്), മണൽ, ചകിരിച്ചോറ് എന്നിവ തുല്യ അളവിൽ കലർത്തി വേണം പോട്ടിംഗ് മിശ്രിതം തയ്യാറാക്കാൻ.

കടലപ്പിണ്ണാക്ക്/ വേപ്പിൻപിണ്ണാക്ക് വെള്ളത്തിൽ കുതിർത്ത് പുളിപ്പിച്ച ശേഷം അതിന്റെ തെളി നേർപ്പിച്ചു ചെടിയുടെ ചുവട്ടിൽ ഒഴിച്ചുകൊടുക്കുന്നത് മികച്ച ഫലം തരും.

പുളിപ്പിച്ച കഞ്ഞിവെള്ളം ഇരട്ടി വെള്ളം ചേർത്ത് നേർപ്പിച്ചു ചെടികൾക്ക് ഒഴിച്ചുകൊടുക്കാം. ചെടി ചെറുതായി വളർന്നു വരുമ്പോൾ അതിന്റെ പ്രധാന തലപ്പ് നുള്ളി വിടുക.

ചെടി പൂത്തു തുടങ്ങുമ്പോൾ നനയ്ക്കുന്നത് അല്പം കുറയ്ക്കുക. കാൽസ്യത്തിന്റെ കുറവ് മൂലം പൂക്കൾ കൊഴിയുന്നത് തടയാൻ മുട്ടത്തോട് നന്നായി പൊടിച്ച് ചെടിയുടെ ചുവട്ടിൽ ഇട്ടുകൊടുക്കാം.

ഉള്ളിത്തൊലി വെള്ളത്തിൽ കുതിർത്തു വച്ച ശേഷം ആ വെള്ളം ചെടികൾക്ക് ഒഴിക്കുന്നത് പൂവിടാൻ സഹായിക്കും.

മുളകുകൾ പാകമാകുന്ന മുറയ്ക്ക് പറിച്ചെടുക്കാൻ ശ്രദ്ധിക്കുക. ചെടിയിൽ തന്നെ കൂടുതൽ കാലം മുളകുകൾ നിർത്തിയാൽ പുതിയ പൂക്കളും കായ്കളും ഉണ്ടാകുന്നത് കുറയും.