അടുക്കളത്തോട്ടം

മഴക്കാലം ഇങ്ങെത്തിപ്പോയി. അടുക്കളത്തോട്ടത്തിൽ പച്ചക്കറി നടുന്നവരാണെങ്കിൽ കുറച്ച് കാര്യങ്ങൾ ശ്രദ്ധിക്കേണ്ടതുണ്ട്. അവയെന്തൊക്കെയാണ്?

ഗ്രോബാഗുകളിലോ തടങ്ങളിലോ വെള്ളം കെട്ടിക്കിടക്കാതിരിക്കാൻ കൃത്യമായ ഡ്രെയിനേജ് ദ്വാരങ്ങളും ചാലുകളും ഉറപ്പാക്കണം.

ശക്തമായ മഴയുള്ളപ്പോൾ നേരിട്ട് വിത്ത് പാകുന്നതിനേക്കാൾ, തണലിൽ പാകി മുളപ്പിച്ച തൈകൾ മാറ്റി നടുന്നതാണ് നല്ലത്.

പാവൽ, പടവലം, കോവൽ തുടങ്ങിയ പച്ചക്കറികൾക്ക് വേണ്ടി നിർമ്മിച്ച പന്തലുകൾ കാറ്റിലും മഴയിലും വീഴാത്ത രീതിയിൽ ബലപ്പെടുത്തണം.

മഴവെള്ളം കുത്തിയൊലിച്ച് വേരുകൾ പുറത്താകാതിരിക്കാൻ ചെടികളുടെ ചുവട്ടിലേക്ക് മണ്ണ് കൂട്ടി കൊടുക്കുകയും താങ്ങ് നൽകുകയും ചെയ്യണം.

ഇലപ്പുള്ളി രോഗം, വേരുചീയൽ എന്നിവ തടയാൻ ആഴ്ചയിലൊരിക്കൽ സ്യൂഡോമോണാസ് (20 ഗ്രാം ഒരു ലിറ്റർ വെള്ളത്തിൽ) തളിക്കുന്നത് ശീലമാക്കുക.

മഴയുള്ളപ്പോൾ രാസവളങ്ങൾ ഒഴിവാക്കുക. ചാണകപ്പൊടിയോ കമ്പോസ്റ്റോ മഴയില്ലാത്ത സമയം നോക്കി മാത്രം നൽകുക.

മഴക്കാലത്ത് വെയിൽ കുറവായതിനാൽ തോട്ടത്തിൽ പരമാവധി വെളിച്ചം കിട്ടുന്ന സ്ഥലങ്ങളിൽ മാത്രം ഗ്രോബാഗുകൾ ക്രമീകരിക്കുക.

പച്ചക്കറികളേക്കാൾ വേഗത്തിൽ മഴക്കാലത്ത് കളകൾ വളരും. ഇവ അപ്പപ്പോൾ‌ പിഴുതുമാറ്റിയില്ലെങ്കിൽ ചെടികളുടെ വളർച്ചയെ ബാധിക്കും.