ടെറസിൽ

നമ്മുടെ വീടിന്റെ ടെറസിലെ ഗ്രോ ബാഗുകളിൽ വളരെ എളുപ്പത്തിൽ വളർത്തിയെടുക്കാവുന്ന ഒന്നാണ് മധുരക്കിഴങ്ങ്. കുറഞ്ഞ പരിചരണവും മികച്ച പ്രതിരോധശേഷിയുമാണ് പ്രത്യേകത.

കിഴങ്ങുകൾ മണ്ണിലേക്ക് ഇറങ്ങി വളരേണ്ടതുകൊണ്ട് 16x16 ഇഞ്ച് വലിപ്പമുള്ളതോ വലിയതോ ആയ ബാഗുകൾ ഉപയോഗിക്കാം. മണ്ണ് എപ്പോഴും നല്ല അയവുള്ളതായിരിക്കണം, എങ്കിലേ കിഴങ്ങ് നന്നായി താഴേക്ക് വളരൂ.

മേൽമണ്ണ്/ചാണകപ്പൊടി/ചകിരിച്ചോറ് എന്നിവ തുല്യ അളവിൽ മിക്സ് ചെയ്ത് ബാഗിന്റെ മുക്കാൽ ഭാഗത്തോളം നിറയ്ക്കുക. വിപണിയിൽ നിന്നോ നഴ്സറിയിൽ നിന്നോ വാങ്ങിയ ആരോഗ്യവുമുള്ള വള്ളികള്‍ നടണം.

20-30 സെന്റീമീറ്റർ നീളമുള്ള (ഏകദേശം 3-4 മുട്ടുകളുള്ള) വള്ളിക്കഷണങ്ങളായി ഇവ മുറിച്ചെടുക്കുക.

വള്ളിയുടെ അടിഭാഗത്തെ 1-2 ഇലകൾ നുള്ളിക്കളയുക. രണ്ട് മുട്ടുകൾ മണ്ണിലേക്ക് ഇറങ്ങിയിരിക്കത്തക്ക വണ്ണമാണ് നടേണ്ടത്. 

ഒരു വലിയ ഗ്രോ ബാഗിൽ പരമാവധി രണ്ടോ മൂന്നോ വള്ളികൾ മാത്രം നടുക. മധുരക്കിഴങ്ങിന് നല്ലതുപോലെ സൂര്യപ്രകാശം ആവശ്യമാണ്.

തുടക്കത്തിൽ വള്ളികൾ പിടിച്ചുകിട്ടുന്നത് വരെ ദിവസവും നനയ്ക്കണം. വള്ളികൾ പടർന്നു കഴിഞ്ഞാൽ മണ്ണ് ഉണങ്ങുന്നത് അനുസരിച്ച് മാത്രം (2-3 ദിവസത്തിലൊരിക്കൽ) നനച്ചാൽ മതിയാകും.

ടെറസിൽ വളർത്തുമ്പോൾ വള്ളികൾ ഒരുപാട് നീണ്ടുപോകാൻ അനുവദിക്കരുത്. വള്ളികൾ ചുരുട്ടി ഗ്രോ ബാഗിന് മുകളിൽ തന്നെ ഒതുക്കി വെക്കുന്നത് നല്ലതാണ്. 

നട്ട് കഴിഞ്ഞ 3.5 മുതൽ 4 മാസത്തിനുള്ളിൽ മധുരക്കിഴങ്ങ് വിളവെടുപ്പിന് പാകമാകും. ചെടിയുടെ ഇലകൾ മഞ്ഞനിറമായി വരുന്നത് ഇതിന്റെ ലക്ഷണമാണ്.