നടീൽ രീതിയും പരിപാലനവും

തണ്ട് മുറിച്ച് നട്ട് വളർത്തുന്നതാണ് ഡ്രാഗൺ ഫ്രൂട്ട് കൃഷിക്ക് അനുയോജ്യം. ആരോഗ്യമുള്ള ചെടിയിൽ നിന്ന് 10-12 ഇഞ്ച് നീളമുള്ള കമ്പ് മുറിച്ചെടുത്ത് 2-3 ദിവസം തണലത്ത് വെച്ച് ഉണക്കി നടാം. 

വെള്ളം കെട്ടിനിൽക്കാത്ത ഏത് തരം മണ്ണിലും ഡ്രാഗൺ ഫ്രൂട്ട് വളരും. മണ്ണ്, മണൽ, ചാണകപ്പൊടി അല്ലെങ്കിൽ കമ്പോസ്റ്റ് എന്നിവ തുല്യ അനുപാതത്തിൽ കലർത്തി ചട്ടിയിലോ തറയിലോ നടാവുന്നതാണ്.

ദിവസവും 6 മുതൽ 8 മണിക്കൂർ വരെ നേരിട്ടുള്ള സൂര്യപ്രകാശം ലഭിക്കുന്ന സ്ഥലത്താണ് ഈ ചെടി നന്നായി പുഷ്പിക്കുകയും കായ്ക്കുകയും ചെയ്യുക.

പടർന്നു വളരുന്ന സ്വഭാവമുള്ള ചെടിയായതിനാൽ ഇതിന് താങ്ങ് ആവശ്യമാണ്. കോൺക്രീറ്റ് തൂണുകളോ മരത്തടികളോ ഉപയോഗിച്ച് ഇവയെ പടർത്തി വിടാം.  

ചെടിക്ക് അമിതമായി വെള്ളം ആവശ്യമില്ല. മണ്ണിലെ ഈർപ്പം പരിശോധിച്ച ശേഷം മാത്രം നനയ്ക്കുക. ജൈവവളങ്ങൾക്ക് മുൻഗണന നൽകുന്നതാണ് ഉത്തമം.  

ഒന്നര മുതൽ രണ്ട് വർഷത്തിനുള്ളിൽ ചെടി പൂത്ത് തുടങ്ങും. ഏകദേശം ഒരു മാസത്തിനുള്ളിൽ ഫലം പാകമാകും. പഴത്തിന്‍റെ നിറം പച്ചയിൽ നിന്ന് പിങ്കോ ചുവപ്പോ നിറമാകുമ്പോൾ വിളവെടുക്കാം. 

കുറഞ്ഞ മുതൽ മുടക്കിൽ മികച്ച വരുമാനവും ആരോഗ്യവും നൽകുന്ന ഒരു കൃഷിയാണ് ഡ്രാഗൺ ഫ്രൂട്ട്. 

വീടിന്‍റെ ടെറസ്സിലോ മുറ്റത്തോ ഒരു ചെറിയ ഭാഗം ഇതിനായി മാറ്റിവെച്ചാൽ വിഷരഹിതമായ പഴങ്ങൾ സ്വന്തമായി ഉത്പാദിപ്പിക്കാൻ സാധിക്കും. ആർക്കും അനായാസം ഈ കൃഷി വിജയിപ്പിക്കാം