1983 ഏകദിന ലോകകപ്പിലെ ഇന്ത്യയുടെ ഐതിഹാസിക വിജയത്തിന് ഇന്ന് നാൽപതാണ്ട്.

കരുത്തരായ വെസ്റ്റ് ഇൻഡീസിനെ തോൽപിച്ചായിരുന്നു ഇന്ത്യൻ ക്രിക്കറ്റിന്‍റെ തലവര മാറ്റിയ കിരീടധാരണം.

മഴ, കട്ടൻചായ, ജോൺസൺ മാഷ്. ഇന്ത്യൻ ക്രിക്കറ്റിന്‍റെ ഓർമ്മകളിലേക്ക് കാലൂന്നുമ്പോൾ ഇത് ലോർഡ്സ്, ജൂൺ 25, കപിലിന്‍റെ ചെകുത്താൻമാർ എന്നാവും.

ക്രിക്കറ്റിന്‍റെ തറവാടായ ലോർഡ്സിൽ ഇന്ത്യൻ ക്രിക്കറ്റ് ചരിത്രം രണ്ടായി പിളർന്ന ഭാഗ്യദിവസം.1983 ജൂൺ 25.കപിൽ ദേവും സംഘവും ലോക കപ്പ് സ്വന്തമാക്കിയത് വെസ്റ്റ് ഇൻഡീസിനെ മുട്ടുകുത്തിച്ച്.

ലോകകപ്പിന്‍റെ മൂന്നാം പതിപ്പിലേക്ക് വിമാനം കയറുമ്പോൾ സെമിഫൈനൽ പോലും ഇന്ത്യൻ ടീമിന്‍റെ സ്വപ്നത്തിൽ ഉണ്ടായിരുന്നില്ല.വിദഗ്ധർ ഇന്ത്യക്ക് കൽപിച്ച സാധ്യത വെറും രണ്ടു ശതമാനം.

സാധ്യതാ പട്ടികയിൽ ഇന്ത്യക്ക് പിന്നിൽ സിംബാബ്‍വെ മാത്രം. പ്രാഥമിക റൗണ്ടിൽ ആറ് കളിയിൽ നാല് ജയത്തോടെ സെമിയിലേക്ക്. ഇംഗ്ലണ്ടിനെ വീഴ്ത്തി ഫൈനലിൽ.

ക്രിക്കറ്റ് ലോകം അമ്പരപ്പിലായിരുന്നെങ്കിലും ക്ലൈവ് ലോയ്ഡിന്‍റെ കരീബിയൻ കരുത്തിനെ വീഴ്ത്താൻ ഇന്ത്യക്ക് കഴിയുമെന്ന് ആരും കരുതിയിരുന്നില്ല.

ആദ്യം ബാറ്റ് ചെയ്ത ഇന്ത്യ 183 റൺസിന് പുറത്ത്. വിവ് റിച്ചാർഡ്സിന് ഒറ്റയ്ക്ക് നേടാവുന്ന സ്കോർ. പക്ഷേ ലോർഡ്സ് സാക്ഷ്യം വഹിച്ചത് മറ്റൊന്നിന്.

മൊഹീന്ദർ അമർനാഥും മദൻലാലും ബൽവീന്ദ‍ർ സന്ധുവും റോജർ ബിന്നിയും കപിലും തീക്കാറ്റായപ്പോൾ വിൻഡീസ് പ്രതാപം നിലംപൊത്തി.

33 റൺസെടുത്ത റിച്ചാർഡ്സ് കപിലിന്‍റെ അനശ്വര ക്യാച്ചിൽ കുടുങ്ങിയപ്പോൾ ലോർഡ്സിൽ ഇന്ത്യൻ ക്രിക്കറ്റിന്‍റെ സൂര്യോദയം.

കപിലിന്‍റെ ചെകുത്താൻമാർക്ക് 43 റൺസ് വിജയം. 26 റൺസും മൂന്ന് വിക്കറ്റും നേടിയ വൈസ് ക്യാപ്റ്റൻ മൊഹീന്ദർ അമർനാഥ് മാൻ ഓഫ് ദി മാച്ച്.