ദർബ് അൽ സായിയിൽ ദേശീയ ദിനാഘോഷങ്ങൾക്ക് തുടക്കം

ദേശീയ ദിനാഘോഷങ്ങളുടെ ഭാഗമായി ദർബ് അൽ സായിയിൽ 11 ദിവസത്തെ സാംസ്കാരിക വിരുന്നിന് ബുധനാഴ്ച തുടക്കമായി. പാരമ്പര്യവും സാംസ്കാരിക മൂല്യങ്ങളും പ്രതിഫലിക്കുന്ന പരിപാടികൾ സംഘടിപ്പിക്കും. 

ഡിസംബർ 20 ന് വരെ നീണ്ടുനിൽക്കുന്ന ഈ ആഘോഷപരിപാടികൾ സാംസ്കാരികവും വിനോദപരവുമായ ഒരു വേറിട്ട അനുഭവമായിരിക്കും സന്ദർശകർക്ക്‌ സമ്മാനിക്കുകയെന്ന് സാംസ്കാരിക മന്ത്രാലയം ഉറപ്പ് നൽകുന്നു.

ഉം സലാലിലെ 1.5 ലക്ഷം ചതുരശ്ര മീറ്റർ വിസ്തൃതിയുള്ള ദർബ് അൽ സായി വേദിയിലാണ് പരിപാടികൾ. ദർബ് അൽ സായി എല്ലാ ദിവസവും ഉച്ചകഴിഞ്ഞ് 3 മണി മുതൽ രാത്രി 11 മണി വരെ പൊതുജനങ്ങൾക്കായി തുറക്കും. 

ഫാൽക്കണറി ഹൗസ്, ഹണ്ടിംഗ്ഹൗസ്, സദു ആൻഡ് സ്പിന്നിംഗ് ഹൗസ് തുടങ്ങി പരമ്പരാഗത വീടുകളുടെ പ്രദർശനം, ഒട്ടകസവാരി, നാടോടി ജീവിതത്തിന്‍റെ പ്രായോഗിക അനുഭവങ്ങൾ പരിചയപ്പെടുത്തൽ എന്നിവയുമുണ്ട്. 

ബെഡൂയിൻ ജീവിതം, അൽ മഖ്തർ, അൽ അസ്ബ തുടങ്ങിയ കര, കടൽ പൈതൃക പ്രദർശനങ്ങൾ, കവിത, കടങ്കഥ മത്സരങ്ങൾ തുടങ്ങിയവയും പരിപാടികളിൽ ഉൾപ്പെടുന്നു. 

അൽ ബിദാ പരിപാടിയിലൂടെ സന്ദർശകർക്കായി ഖത്തറിന്‍റെ കടൽസാംസ്കാരിക പൈതൃകം അവതരിപ്പിക്കും. ഫോട്ടോഗ്രഫി, കലാപ്രദർശനം, വർക്ക്‌ഷോപ്പുകൾ, നാടകരംഗാവതരണങ്ങൾ എന്നിവയും ഒരുക്കിയിട്ടുണ്ട്.

എല്ലാ ദിവസവും പ്രധാന വേദിയിൽ സെമിനാറുകളും കവിതാ സന്ധ്യകളും അരങ്ങേറും. കുട്ടികൾക്കായി പ്രത്യേക ഔട്ട്ഡോർ ആക്ടിവിറ്റി മേഖലയുമുണ്ട്.

ഖത്തർ വളണ്ടിയർ സെന്‍ററിലെ മെഡിക്കൽ മീഡിയ സ്പെഷ്യലിസ്റ്റുകൾ, അഡ്മിനിസ്ട്രേറ്റീവ് സപ്പോർട്ട്, പ്രോട്ടോക്കോൾ ടീമുകൾ, ഫീൽഡ്ഓർഗനൈസർമാർ എന്നിവരടക്കം 420 സന്നദ്ധപ്രവർത്തകർ സേവനത്തിനുണ്ട്.