ബാത്ത് ഡേ

ബാത്ത് ടബ്ബിൽ കിടക്കുമ്പോഴാണ് പ്രശസ്ത ഗ്രീക്ക് ശാസ്ത്രജ്ഞനായ ആർക്കിമിഡീസ് 'പ്ലവന തത്വ'ത്തിലേക്ക് നയിച്ച കാര്യങ്ങൾ കണ്ടെത്തിയത്. അതിനെ ഓർമ്മിപ്പിക്കുന്നതിനാണ് ജൂൺ 14 ബാത്ത് ഡേ ആയത്.

ബാത്ത് ടബ്ബിലെ വെള്ളം പുറത്തേക്ക് ഒഴുക്കുന്നത് കണ്ട് ആവേശഭരിതനായ ആർക്കിമിഡീസ് വസ്ത്രം പോലും ധരിക്കാതെ 'യുറേക്കാ യുറേക്കാ' എന്ന് വിളിച്ചുപറഞ്ഞ് തെരുവിലൂടെ ഓടിയെന്നാണ് ചരിത്രം.

പുരാതന റോമൻ ജനതയ്ക്ക് കുളി എന്നത് കേവലം ശരീരം വൃത്തിയാക്കൽ മാത്രമല്ലായിരുന്നു. ഒത്തുകൂടാനും, സുഹൃത്തുക്കളെ കാണാനുമൊക്കെയുള്ള ഒരു സാമൂഹികഒത്തുചേരൽ കേന്ദ്രമായിരുന്നു പൊതു കുളിയിടങ്ങൾ

കുട്ടികളുടെ ബാത്ത് ടബ്ബുകളിലെ സ്ഥിരം സാന്നിധ്യമായ 'റബ്ബർ ഡക്ക്' ആദ്യമായി നിർമ്മിച്ചത് 1800-കളുടെ അവസാനത്തിലാണ്. അന്നവയ്ക്ക് വെള്ളത്തിൽ പൊങ്ങിക്കിടക്കാൻ കഴിയില്ലായിരുന്നു.

ഫ്ലോറന്റൈൻ ഹോഫ്മാൻ എന്ന ഡച്ച് കലാകാരൻ നിർമ്മിച്ച ലോകത്തിലെ ഏറ്റവും വലിയ റബ്ബർ ഡക്കിന് 54 അടിയിലധികം ഉയരമുണ്ട്!

ലോകസുന്ദരിയായിരുന്ന ഈജിപ്തിലെ ക്ലിയോപാട്ര രാജ്ഞി ചർമ്മത്തിന്റെ ഭംഗി കൂട്ടാൻ കഴുതപ്പാലിലാണ് കുളിച്ചിരുന്നത്! 

ജപ്പാനിൽ പ്രകൃതിദത്തമായ ചൂടുനീരുറവകളിൽ കുളിക്കുന്നത് ഒരു വലിയ ആചാരമാണ്. ഇതിനെ 'ഓൺസെൻ' എന്ന് വിളിക്കുന്നു. ഇത് ശരീരത്തിനും മനസ്സിനും ഒരേപോലെ ഉന്മേഷം നൽകുന്നു.

ബഹിരാകാശത്ത് ഗുരുത്വാകർഷണം ഇല്ലാത്തതിനാൽ വെള്ളം ഒഴുകിപ്പോകില്ല. അതുകൊണ്ട് ബഹിരാകാശ സഞ്ചാരികൾ പ്രത്യേക തരം ലിക്വിഡ് സോപ്പും നനഞ്ഞ തുണികളും ഉപയോഗിച്ചാണ് ശരീരം വൃത്തിയാക്കുന്നത്.

രാത്രി കിടക്കുന്നതിന് 90 മിനിറ്റ് മുൻപ് ചെറുചൂടുവെള്ളത്തിൽ കുളിക്കുന്നത് ശരീരത്തിന്റെ താപനില ക്രമീകരിക്കാനും ആഴത്തിലുള്ള നല്ല ഉറക്കം ലഭിക്കാനും സഹായിക്കുമെന്ന് പഠനങ്ങൾ പറയുന്നു.