വർക്ക് ഫ്രം ഹോം

മലേഷ്യൻ സർക്കാർ ജീവനക്കാരുടെ 'വർക്ക് ഫ്രം ഹോം' പദ്ധതി വഴി പെട്രോൾ സബ്‌സിഡി ഇനത്തിൽ സർക്കാർ ലാഭിച്ചത് 73 ലക്ഷത്തിലധികം റിംഗിറ്റ്. അതായത് ഏകദേശം 17 കോടി രൂപ!

കഴിഞ്ഞ മൂന്ന് മാസത്തിനിടെ 40 ലക്ഷത്തിലധികം ലിറ്റർ (4,046,448 ലിറ്റർ) ഇന്ധന ഉപയോഗം കുറയ്ക്കാൻ ഈ പദ്ധതിക്ക് സാധിച്ചു.

രാജ്യമൊട്ടാകെയുള്ള ഏകദേശം 6,59,000 സർക്കാർ ജീവനക്കാർക്കാണ് വർക്ക് ഫ്രം ഹോം പദ്ധതിയുടെ പ്രയോജനം ലഭിച്ചത്.

വർക്ക് ഫ്രം ഹോം പദ്ധതിയുടെ വിജയത്തെത്തുടർന്ന് ഓഗസ്റ്റ് 1 മുതൽ സർക്കാർ 'ഹൈബ്രിഡ് വർക്കിംഗ് ഡേ' രീതി നടപ്പിലാക്കും.

ഇന്ധന സബ്‌സിഡി ചെലവ് കുറയ്ക്കുക, ഒപ്പം ജീവനക്കാരുടെ ഉൽപ്പാദനക്ഷമത നിലനിർത്തുക എന്നിവയാണ് ഇതിന്റെയും ലക്ഷ്യങ്ങൾ.

പുതിയ നയപ്രകാരം ആഴ്ചയിൽ 3 ദിവസം ഓഫീസിലും 2 ദിവസം വീട്ടിലിരുന്നോ മറ്റ് സ്ഥലങ്ങളിലിരുന്നോ ജോലി ചെയ്യണം.

വീക്കെൻഡിലെ അവധികൾക്കോ മറ്റ് പൊതുഅവധികൾക്കോ തൊട്ടുമുൻപുള്ള ദിവസങ്ങളിലോ ശേഷമുള്ള ദിവസങ്ങളിലോ ഹൈബ്രിഡ് വർക്കിംഗ് അനുവദിക്കില്ല.

ജീവനക്കാർ ഈ ആനുകൂല്യം ഉപയോഗിച്ച് അവധികൾ നീട്ടിയെടുക്കുന്നത് തടയാനാണ് ഈ നിയന്ത്രണം ഏർപ്പെടുത്തിയിരിക്കുന്നത്.

ശനി, ഞായർ ദിവസങ്ങളിൽ അവധിയുള്ള ഒരു ജീവനക്കാരന് തിങ്കൾ, വെള്ളി ദിവസങ്ങളിൽ വീട്ടിലിരുന്ന് ജോലി ചെയ്യാൻ അനുവാദമുണ്ടായിരിക്കില്ല.

ഗവൺമെന്റ് ചീഫ് സെക്രട്ടറി താൻ ശ്രീ ഷംസുൽ അസ്രി അബുബക്കർ ആണ് ഈ വിവരങ്ങൾ അറിയിച്ചത്.