ഫ്രഞ്ച് മ്യൂസിയത്തിൽ നിന്ന് കവർന്ന റെനോയിർ പെയിന്റിംഗുകൾ വീണ്ടെടുത്തു: ലോകത്തെ വിറപ്പിച്ച ആർട്ട് മോഷണങ്ങൾ!

കലാസൃഷ്ടികൾ സുരക്ഷിതമായി തിരികെ ലഭിച്ചെങ്കിലും, ഈ സംഭവം വീണ്ടും അന്താരാഷ്ട്ര തലത്തിൽ മ്യൂസിയങ്ങളുടെ സുരക്ഷയെക്കുറിച്ചും അമൂല്യ ശേഖരങ്ങളുടെ സംരക്ഷണത്തെക്കുറിച്ചുമുള്ള ചർച്ചകൾക്ക് വഴിവെച്ചിരിക്കുകയാണ്.

ഫ്രഞ്ച് റിവിയേറയിലെ പ്രശസ്തമായ റെനോയിർ മ്യൂസിയത്തിൽ നിന്ന് മോഷ്ടിക്കപ്പെട്ട, വിഖ്യാത ഫ്രഞ്ച് ആർട്ടിസ്റ്റ് പിയറി-ഓഗസ്റ്റ് റെനോയിറിന്റെ പെയിന്റിംഗുകൾ വീണ്ടെടുത്തു. സംഭവം നടന്ന് ഏകദേശം ഒരു മാസത്തിനുശേഷം നടന്ന അന്വേഷണത്തിൽ ആറ് പേരെയാണ് സംശയത്തിന്റെ പേരിൽ പൊലീസ് അറസ്റ്റ് ചെയ്തതെന്ന് അന്താരാഷ്ട്ര വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്യുന്നു.

കലാസൃഷ്ടികൾ സുരക്ഷിതമായി തിരികെ ലഭിച്ചെങ്കിലും, ഈ സംഭവം വീണ്ടും അന്താരാഷ്ട്ര തലത്തിൽ മ്യൂസിയങ്ങളുടെ സുരക്ഷയെക്കുറിച്ചും അമൂല്യ ശേഖരങ്ങളുടെ സംരക്ഷണത്തെക്കുറിച്ചുമുള്ള ചർച്ചകൾക്ക് വഴിവെച്ചിരിക്കുകയാണ്.

അമൂല്യ സൃഷ്ടികൾ തൊട്ടടുത്തുനിന്ന് കാണാനാണ് ആളുകൾ താല്പര്യപ്പെടുന്നത്. എന്നാൽ, പൊതുജനങ്ങൾക്ക് പെട്ടെന്ന് പ്രാപ്യമാകുന്ന രീതിയിൽ ഇവ സജ്ജീകരിക്കുന്നത് സുരക്ഷയ്ക്ക് ഭീഷണിയാവുകയാണ് ചെയ്യുന്നത്. കടുപ്പമേറിയ കവചങ്ങളും നിയന്ത്രണങ്ങളും പെയിന്റിംഗുകളെ സംരക്ഷിക്കുമെങ്കിലും, സന്ദർശകരിൽ അത് അതൃപ്തി ഉണ്ടാക്കാൻ സാധ്യതയുണ്ടെന്ന് വിദഗ്ധർ ചൂണ്ടിക്കാണിക്കുന്നു.

ചരിത്രത്തിൽ ഇടംപിടിച്ച 4 പ്രശസ്തമായ ആർട്ട് മോഷണങ്ങൾ

കലാവസ്തുക്കളുടെ കവർച്ചയ്ക്ക് നൂറ്റാണ്ടുകളുടെ ചരിത്രമുണ്ട്. ലോകത്തെ നടുക്കിയ പ്രശസ്തമായ ചില ആർട്ട് ഹീസ്റ്റുകൾ താഴെ പറയുന്നവയാണ്:

1. 1911-ലെ 'മൊണാലിസ' മോഷണം

ലിയോനാർഡോ ഡാ വിഞ്ചിയുടെ ലോകപ്രശസ്തമായ 'മൊണാലിസ' (Mona Lisa) 1911 ഓഗസ്റ്റിൽ പാരീസിലെ ലൂവ്ര് മ്യൂസിയത്തിൽ നിന്നാണ് മോഷ്ടിക്കപ്പെട്ടത്. മ്യൂസിയത്തിലെ മുൻ ജീവനക്കാരനായ ഇറ്റാലിയൻ സ്വദേശി വിൻസെൻസോ പെറുഗ്ഗിയ ആണ് ഈ ചിത്രം കവർന്ന് രണ്ടു വർഷത്തിലധികം ഒളിപ്പിച്ചു വെച്ചത്. 1913-ൽ ഇറ്റലിയിലെ ഒരു ആർട്ട് ഡീലർക്ക് വിൽക്കാൻ ശ്രമിക്കുന്നതിനിടെയാണ് ഇത് വീണ്ടെടുത്തത്.

2. ഇസബെല്ല സ്റ്റുവർട്ട് ഗാർഡ്നർ മ്യൂസിയം കവർച്ച

1990 മാർച്ച് മാസം പൊലീസ് വേഷത്തിലെത്തിയ രണ്ടുപേർ ബോസ്റ്റണിലെ ഇസബെല്ല സ്റ്റുവർട്ട് ഗാർഡ്നർ മ്യൂസിയത്തിൽ അതിക്രമിച്ചു കയറി അവിടുത്തെ സെക്യൂരിറ്റി ജീവനക്കാരെ ബന്ധനസ്ഥരാക്കി. റെംബ്രാന്റ്, യൊഹാന്നസ് വെർമീർ, എഡ്ഗാർ ദെഗാ തുടങ്ങിയ പ്രശസ്തരുടെ 13 അമൂല്യ കലാസൃഷ്ടികളാണ് അവർ കവർന്നത്. അമേരിക്കൻ ചരിത്രത്തിലെ ഏറ്റവും വലിയ ആർട്ട് മോഷണമായാണ് എഫ്.ബി.ഐ ഇതിനെ വിശേഷിപ്പിക്കുന്നത്. മോഷ്ടിക്കപ്പെട്ട ചിത്രങ്ങൾ ഇതുവരെ കണ്ടെത്താനായിട്ടില്ല.

3. എഡ്വാർഡ് മഞ്ചിന്റെ 'ദി സ്ക്രീം'

നോർവീജിയൻ ചിത്രകാരനായ എഡ്വാർഡ് മഞ്ചിന്റെ 'ദി സ്ക്രീം' (The Scream) 1994-ൽ ഓസ്ലോ നാഷണൽ ഗാലറിയിൽ നിന്ന് മോഷ്ടിക്കപ്പെടുകയും പിന്നീട് വീണ്ടെടുക്കുകയും ചെയ്തു. തുടർന്ന് 2004-ൽ, ആയുധധാരികളായ കള്ളന്മാർ മഞ്ച് മ്യൂസിയത്തിൽ നിന്ന് ഈ ചിത്രത്തിന്റെ മറ്റൊരു പതിപ്പും 'മഡോണ' (Madonna) എന്ന ചിത്രവും കവർന്നു. വർഷങ്ങൾ നീണ്ട അന്വേഷണങ്ങൾക്കൊടുവിൽ 2006-ലാണ് ഇവ വീണ്ടെടുത്തത്.

4. വാൻ ഗോഗ് പെയിന്റിംഗുകൾ കവർന്ന സംഭവം (2002)

2002 -ൽ ആംസ്റ്റർഡാമിലെ വാൻ ഗോഗ് മ്യൂസിയത്തിന്റെ മേൽക്കൂര തകർത്ത് അകത്തുകയറിയ സംഘം പ്രശസ്തമായ രണ്ട് പെയിന്റിംഗുകൾ മോഷ്ടിച്ചു. തുടർന്ന്, 2016 -ൽ ഇറ്റലിയിൽ നടന്ന അന്വേഷണങ്ങൾക്കിടയിലാണ് ഈ ചിത്രങ്ങൾ തിരിച്ചുകിട്ടിയത്.