ഒന്നല്ല, രണ്ടല്ല.. ഇന്ത്യയില്‍ എണ്ണ വേണ്ടാ വണ്ടികളുടെ പെരുമഴയുമായി ഈ കമ്പനി!

ഡീലർഷിപ്പ് മുഖാന്തരമോ കമ്പനി വെബ്‌സൈറ്റിലൂടെയോ വാഹനങ്ങള്‍ ബുക്കു ചെയ്യാം

ജർമ്മന്‍ ആഡംബര കാർ നിർമ്മാതാക്കളായ ഔഡി ഇന്ത്യ മൂന്ന് ഇലക്‌ട്രിക് എസ്‍യുവി മോഡലുകൾ ഇന്ത്യൻ വിപണിയില്‍ പുറത്തിറക്കി. ഔഡി ഇട്രോൺ 50, ഔഡി ഇട്രോൺ 55, ഔഡി ഇട്രോൺ സ്‌പോർട്‌ബാക്ക് 55 എന്നിവയാണ് ഈ പുതിയ മോഡലുകൾ എന്ന് ഇക്കണോമിക്ക് ടൈംസ് ഓട്ടോ റിപ്പോര്‍ട്ട് ചെയ്യുന്നു. യഥാക്രമം 99.99 ലക്ഷം, 1.16 കോടി, 1.18 കോടി എന്നിങ്ങനെയാണ് ഈ മോഡലുകളുടെ എക്സ്‌ ഷോറൂം വില എന്നാണ് റിപ്പോര്‍ട്ടുകള്‍.

മുന്നിലും പിന്നിലുമുള്ള ഇരട്ട ഇലക്‌ട്രിക് മോട്ടോറുകളാണ് ഈ വാഹനങ്ങളുടെ ഹൃദയം. ഔഡി ഇട്രോൺ 55, ഔഡി ഇട്രോൺ സ്‌പോർട്‌ബാക്ക് 55 എന്നിവയ്ക്ക് 300 കിലോവാട്ട് പവറും 664 എൻ എം ടോർക്കുമാണ് ഉല്‍പ്പാദിപ്പിക്കുന്നത്.  95 കിലോവാട്ട് അവർ ലിഥിയം ബാറ്ററിയുള്ള ഈ മോഡലുകൾക്ക് ഒറ്റത്തവണ ചാർജിങ്ങിൽ 359-484 കിലോമീറ്റർ സഞ്ചരിക്കാം. 71 കിലോവാട്ട് ബാറ്ററി ശേഷിയുള്ള ഇട്രോൺ 50 ഒറ്റ ചാർജിൽ 264-379 കിലോ മീറ്റർ ഓടും. 310 എച്ച്.പി. പവറും 540 എൻ.എം. ടോർക്കും നൽകും.

ഡീലർഷിപ്പ് മുഖാന്തരമോ ഔഡി വെബ്‌സൈറ്റിലൂടെയോ വാഹനങ്ങള്‍ ബുക്കു ചെയ്യാം. ബാറ്ററിക്ക് 1.60 ലക്ഷം കിലോമീറ്റർ/ 8 വർഷം വാറന്റി ലഭിക്കും. ക്വാട്രോ പെർമനന്റ് ഓൾ-വീൽ ഡ്രൈവ്, പ്രോഗ്രസീവ് സ്റ്റീയറിങ്, അഡാപ്റ്റീവ് എയർ സസ്‌പെൻഷൻ, 4 സോൺ ക്ലൈമറ്റ് കൺട്രോൾ, സൺറൂഫ് തുടങ്ങി ഒട്ടേറെ ആഡംബര സൗകര്യങ്ങൾ മൂന്നു മോഡലുകള്‍ക്കും ലഭിക്കുമെന്ന് ഔഡി ഇന്ത്യ വ്യക്തമാക്കുന്നു.

കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്‍തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona