ജര്‍മ്മന്‍ ആഡംബര വാഹന നിര്‍മ്മാതാക്കളായ ബിഎംഡബ്ല്യു ഗ്രൂപ്പ് ഇന്ത്യ തെരഞ്ഞെടുത്ത മോഡലുകളുടെ വില പുതുക്കി
ജര്‍മ്മന്‍ ആഡംബര വാഹന നിര്‍മ്മാതാക്കളായ ബിഎംഡബ്ല്യു ഗ്രൂപ്പ് ഇന്ത്യ തെരഞ്ഞെടുത്ത മോഡലുകളുടെ വില പുതുക്കി. ബിഎംഡബ്ല്യു 3 സീരീസ്, 2 സീരീസ് ഗ്രാന്‍ കൂപ്പെ, XI, X3, X4, X5, X7 എന്നിവയ്ക്കാണ് വില കൂടുന്നത്. 3.08 ലക്ഷം രൂപ വരെയുള്ള വര്‍ദ്ധനവാണ് നടപ്പായതെന്ന് കാര്‍ വാലെ റിപ്പോര്‍ട്ട് ചെയ്യുന്നു. ഈ മോഡലുകളുടെ എല്ലാ പുതിയ വിലകളും കമ്പനി പുറത്തുവിട്ടു.
220d സ്‌പോര്‍ട്‌സ്‌ലൈന്‍, 220im സ്പോര്‍ട്സ് മോഡലുകള്‍ക്ക് ഇപ്പോള്‍ യഥാക്രമം 80,000 രൂപയും 60,000 രൂപയുമാണ് വര്‍ധനവ് ഉണ്ടായിരിക്കുന്നത്. അതേസമയം അടുത്തിടെ സമാരംഭിച്ച 220i സ്പോര്‍ട്ട് ട്രിം അതിന്റെ ആമുഖ വില നിലനിര്‍ത്തുന്നുവെന്ന് കമ്പനി അറിയിച്ചു.
പെട്രോള്‍, ഡീസല്‍ എഞ്ചിന്‍ ഓപ്ഷനുകള്‍ ഉപയോഗിച്ചാണ് 3 സീരീസ് വാഗ്ദാനം ചെയ്യുന്നത്. പെട്രോള്‍ വേരിയന്റുകളായ 330i സ്പോര്‍ട്ട്, 330i M സ്പോര്‍ട്ട് എന്നിവയ്ക്ക് യഥാക്രമം 1,00,000 രൂപയും 60,000 രൂപയുമാണ് വില വര്‍ധനവ്.
320d ലക്ഷ്വറി പതിപ്പിന്റെ വില ഇപ്പോള്‍ 60,000 രൂപയോളം ഉയര്‍ന്നു. ഈ വര്‍ഷത്തിന്റെ തുടക്കത്തില്‍, 320d സ്പോര്‍ട്ട് ട്രിം ബ്രാന്‍ഡിന്റെ ഔദ്യോഗിക വെബ്സൈറ്റില്‍ നിന്ന് ഒഴിവാക്കിയിരുന്നു. ബ്രാന്‍ഡില്‍ നിന്നുള്ള എന്‍ട്രി ലെവല്‍ സെഡാന്‍ – 2 സീരീസ് ഗ്രാന്‍ കൂപ്പെയ്ക്ക് അതിന്റെ ആദ്യത്തെ വില വര്‍ദ്ധനവാണ് ലഭിക്കുന്നത് എന്നാണ് റിപ്പോര്‍ട്ടുകള്‍. പുതിയ വിലകള്‍ 2021 ഏപ്രില്‍ 8 മുതല്‍ പ്രാബല്യത്തില്‍ വന്നതായും കമ്പനി അറിയിച്ചു.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona