70ല്‍ അധികം ആഭ്യന്തര, അന്തർദേശീയ വാഹന നിർമ്മാതാക്കൾ തങ്ങളുടെ ഇലക്ട്രിക് വാഹനങ്ങൾ എക്‌സ്‌പോയിൽ പ്രദർശിപ്പിച്ചു
2023 ഓട്ടോ എക്‌സ്‌പോ മികച്ച രീതിയില്‍ മുന്നേറുകയാണ്. ഇത്തവണത്തെ ഓട്ടോമോട്ടീവ് ഷോയിൽ ഇലക്ട്രിക് വാഹനങ്ങൾ (ഇവി) ശ്രദ്ധ നേടി. 70ല്‍ അധികം ആഭ്യന്തര, അന്തർദേശീയ വാഹന നിർമ്മാതാക്കൾ തങ്ങളുടെ ഇലക്ട്രിക് വാഹനങ്ങൾ എക്‌സ്‌പോയിൽ പ്രദർശിപ്പിച്ചു. വൈദ്യുത വാഹനങ്ങൾ വാഹന ഉടമകൾക്ക് സാധ്യമായ ഓപ്ഷനായി ഉയർന്നുവന്നിട്ടുണ്ടെന്നും സിന്തറ്റിക് ഇന്ധനവും ഹൈഡ്രജനും ഓട്ടോമൊബൈൽ രംഗത്തെ പുതിയ കാലത്തെ ഓപ്ഷനുകളാണെന്നും എക്‌സ്‌പോയിൽ സുസുക്കി മോട്ടോർ പ്രസിഡന്റ് സുസുക്കി തോഷിഹിറോ പറഞ്ഞു.
രാജ്യത്ത് ഇലക്ട്രിക് മൊബിലിറ്റി ശക്തിപ്രാപിക്കുന്നതിനാല്‍, വാഹന മലിനീകരണം കുറയ്ക്കാൻ കേന്ദ്ര ഗവൺമെന്റ് പദ്ധതിയിടുന്നുണ്ട്. 2030 ഓടെ 30 ശതമാനം വാഹന ഉടമകളെയും ഇവിയിലേക്ക് മാറാൻ പ്രോത്സാഹിപ്പിക്കും. കഴിഞ്ഞ കുറച്ച് വർഷങ്ങളായി ഇന്ത്യ ഗുരുതരമായ വായു മലിനീകരണം നേരിടുന്ന സാഹചര്യത്തിൽ, വാഹന മലിനീകരണം കുറയ്ക്കാൻ കേന്ദ്രസർക്കാർ പദ്ധതിയിട്ടിട്ടുണ്ട്.
NHK വേൾഡ് റിപ്പോർട്ട് അനുസരിച്ച്, രാജ്യത്തെ 1.4 ബില്യൺ കാർ ജനസംഖ്യ ഇനിയും വികസിക്കുമെന്ന് പ്രതീക്ഷിക്കുന്നു. ഒറ്റ ചാർജിൽ 550 കിലോമീറ്റർ സഞ്ചരിക്കാൻ കഴിയുമെന്ന് അവകാശപ്പെടുന്ന മാരുതി സുസുക്കിയുടെ ഏറ്റവും പുതിയ കൺസെപ്റ്റ് ഇവി ആയിരുന്നു ഓട്ടോ ഷോയിലെ പ്രധാന ആകർഷണം. ഈ മോഡല്‍ 2025 ഓടെ ഇന്ത്യൻ വാഹന വിപണിയിൽ വിൽപ്പനയ്‌ക്ക് എത്തിക്കാൻ മാരുതി ലക്ഷ്യമിടുന്നു.
ഇന്ത്യൻ വാഹന മേഖലയിലെ മറ്റ് മുഖ്യ വാഹന നിർമ്മാതാക്കളായ ടാറ്റ മോട്ടോഴ്‌സ്, ദക്ഷിണ കൊറിയയിലെ ഹ്യുണ്ടായ് മോട്ടോർ കമ്പനി എന്നിവയും ചടങ്ങിൽ തങ്ങളുടെ ഇവികൾ പ്രദർശിപ്പിച്ചു.
കഴിഞ്ഞ വർഷം ഡിസംബറിൽ, 86 ശതമാനം വാർഷിക വളർച്ചയോടെ 7,046 ഇലക്ട്രിക് വാഹനങ്ങൾ രജിസ്റ്റർ ചെയ്‍തുകൊണ്ട് രാജ്യത്തെ ഏറ്റവും ഉയർന്ന സംസ്ഥാന-യുടി അടിസ്ഥാനത്തിലുള്ള പ്രതിമാസ വൈദ്യുത വാഹന വിൽപ്പന കൈവരിച്ച് ദേശീയ തലസ്ഥാനം ഒരു ചരിത്രം സൃഷ്ടിച്ചിരുന്നു. ഇലക്ട്രിക്ക് വാഹന പോളിസി ആരംഭിച്ചതിനുശേഷം, UT 93,239 ഇലക്ട്രിക് വാഹനങ്ങൾ രജിസ്റ്റർ ചെയ്തിട്ടുണ്ട്, അതിൽ 2022 ലെ മൊത്തം ഇലക്ട്രിക്ക് വാഹന വിൽപ്പനയുടെ 55 ശതമാനവും ഇരുചക്രവാഹനങ്ങളാണ് സംഭാവന ചെയ്യുന്നത്. 2020 ഓഗസ്റ്റ് 7 നാണ് ദില്ലിയുടെ ഇവി പോളിസി ആരംഭിച്ചത്. ഇരുചക്ര വാഹനങ്ങളും മുച്ചക്ര വാഹനങ്ങളും മേളയില്‍ മുൻഗണനാ വാഹന വിഭാഗങ്ങളാണ്.