Force Gurkha : അഞ്ച് ഡോര്‍ ഫോഴ്‍സ് ഗൂര്‍ഖ പരീക്ഷണത്തില്‍

ഗൂർഖയുടെ അഞ്ച് വാതിലുകളുള്ള പതിപ്പ് രാജ്യത്ത് പരീക്ഷിക്കുന്നത് ശ്രദ്ധയിൽപ്പെട്ടതായി റഷ് ലൈനിനെ ഉദ്ദരിച്ച് കാര്‍ വെയ്‍ല്‍ റിപ്പോര്‍ട്ട് ചെയ്യുന്നു

ഫോഴ്‌സ് മോട്ടോഴ്‌സിന്റെ (Force Motors) പരുക്കൻ എസ്‌യുവിയായ ഗൂർഖ (Gurkha) അതിന്റെ ഓഫ്-റോഡിംഗ് കഴിവുകൾക്ക് ശ്രദ്ധേയമായ മോഡലാണ്. നിലവിൽ ത്രീ-ഡോർ പതിപ്പിൽ വാഹനം ലഭ്യമാണ്. അതുകൊണ്ട് തന്നെ വാഹനത്തിന്‍റെ വിൽപ്പനയ്ക്ക് വെല്ലുവിളി ഏറെയുണ്ട്. അതിന്റെ എതിരാളിയായ മഹീന്ദ്ര ഈ വർഷാവസാനം അഞ്ച് വാതിലുകളുള്ള ഥാർ ഇന്ത്യയിൽ അവതരിപ്പിക്കാൻ ഒരുങ്ങുമ്പോൾ, ഫോഴ്‌സ് മോട്ടോഴ്‌സ് പിന്നിലാകാൻ ആഗ്രഹിക്കുന്നില്ല. അതുകൊമ്ടു തന്നെയാവണം ഗൂര്‍ഖയുടെ അഞ്ച് ഡോര്‍ പതിപ്പിന്‍റെ പരീക്ഷണത്തിലാണ് കമ്പനി എന്നാണ് പുതിയ റിപ്പോര്‍ട്ടുകള്‍. ഗൂർഖയുടെ അഞ്ച് വാതിലുകളുള്ള പതിപ്പ് രാജ്യത്ത് പരീക്ഷിക്കുന്നത് ശ്രദ്ധയിൽപ്പെട്ടതായി റഷ് ലൈനിനെ ഉദ്ദരിച്ച് കാര്‍ വെയ്‍ല്‍ റിപ്പോര്‍ട്ട് ചെയ്യുന്നു.

പുറത്തുവന്ന ചിത്രങ്ങളെ അടിസ്ഥാനമാക്കി, ഈ അഞ്ച് ഡോര്‍ പതിപ്പിന്‍റെ ഡിസൈൻ ഘടകങ്ങൾ മൂന്ന് ഡോർ പതിപ്പുമായി പങ്കിടുന്നു. അഞ്ച് വാതിലുകളുള്ള വരാനിരിക്കുന്ന മൂന്ന്-വരി പതിപ്പ് മൂന്നാം നിരയിൽ ക്യാപ്റ്റൻ സീറ്റുകളോടെയാണ് കണ്ടെത്തിയതെന്നാണ് റിപ്പോര്‍ട്ടുകള്‍. ഇതിനർത്ഥം പുതിയ മോഡലിന് ആറ് ഫോർവേഡ് ഫേസിംഗ് സീറ്റുകൾ ലഭിക്കുമെന്നാണ്. ഫീച്ചർ ലിസ്റ്റിൽ പുതിയ ഡാഷ്‌ബോർഡ് ഡിസൈൻ, ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, മാനുവൽ എസി എന്നിവയും അതിലേറെയും ഉൾപ്പെടും. അത് നിലവിലെ ത്രീ-ഡോർ പതിപ്പുമായി പങ്കിടും.

പുതിയ വാഹനത്തിന്‍റെ മെക്കാനിക്കൽ വിശദാംശങ്ങൾ ഇപ്പോൾ വ്യക്തമല്ല. 91 ബിഎച്ച്പിയും 250 എൻഎം ടോർക്കും ഉൽപ്പാദിപ്പിക്കുന്ന നിലവിലുള്ള 2.6-ലിറ്റർ ഡീസൽ എഞ്ചിൻ ഇതിന് കരുത്തേകും. ഈ എഞ്ചിൻ അഞ്ച് സ്പീഡ് മാനുവൽ ട്രാൻസ്മിഷനുമായി ഘടിപ്പിച്ചിരിക്കുന്നു, കൂടാതെ 4x4 സിസ്റ്റവും ലഭിച്ചേക്കാം. പവർ കണക്കുകളിലെ മാറ്റങ്ങൾ ഉള്‍പ്പെടെയുള്ള വിവരങ്ങള്‍ വരും ദിവസങ്ങളില്‍ പുറത്തു വന്നേക്കും എന്നാണ് റിപ്പോര്‍ട്ടുകള്‍.

അതേസമയം  നിലവിലെ ഗൂര്‍ഖയെപ്പറ്റി പറയുകയാണെങ്കില്‍, 2021 സെപ്റ്റംബറില്‍ ആണ് ഫോഴ്‍സ് മോട്ടോഴ്‍സ് പുതിയ ഗൂര്‍ഖ എസ്‍യുവിയെ വിപണിയില്‍ അവതരിപ്പിക്കുന്നത്.  രണ്ടാം നിരയിലെ ക്യാപ്റ്റൻ സീറ്റുകൾ, ലോക്കിങ്​ ഡിഫറൻഷ്യലുകളുള്ള ഫോർ-വീൽ ഡ്രൈവ് തുടങ്ങിയ പ്രത്യേകതകൾ വാഹനത്തിനുണ്ട്​.  പുതിയ ഗൂർഖയുടെ ഡിസൈൻ പഴയ മോഡലിന് ഏതാണ്ട്​ സമാനമാണ്. എന്നാൽ വാഹനത്തി​ന്‍റെ മുഴുവൻ ബോഡി ഷെല്ലും മാറിയിട്ടുണ്ട്​. മഹീന്ദ്ര ഥാർ രൂപകൽപനയുടെ ആധാരം ജീപ്പ് റാംഗ്ലറാണെങ്കിൽ ഫോഴ്സ് മോട്ടോഴ്സ് ഗൂർഖയെ സൃഷ്ടിച്ചത് മെഴ്സിഡീസ് ജി വാഗനാണ്. പുതിയ ഗ്രിൽ, ബമ്പറുകൾ, ലൈറ്റ് ക്ലസ്റ്ററുകൾ, പിൻ യാത്രക്കാർക്കുള്ള വലിയ വിൻഡോ എന്നിവ മാറ്റങ്ങളിൽ ഉൾപ്പെടുന്നു. പനോരമിക് വിൻഡോ എന്ന്​ കമ്പനി വിളിക്കുന്ന വലിയ ഗ്ലാസ്​ ഏരിയ പിന്നിലെ ദൃശ്യപരതയെ സഹായിക്കുന്നുണ്ട്​. പുതിയ ഡാഷ്‌ബോർഡ്, ടച്ച്‌സ്‌ക്രീൻ ഇൻഫോടെയ്ൻമെൻറ്​ സിസ്റ്റം, മുൻവശത്തുള്ള രണ്ടാം നിര ക്യാപ്റ്റൻ സീറ്റുകൾ എന്നിവയാണ്​ ശ്രദ്ധേയമായ കാബിൻ മാറ്റങ്ങൾ.

നേരത്തേ ഉണ്ടായിരുന്ന ഡ്യുവൽ-ടോൺ ക്യാബിനിൽ നിന്ന് സിംഗിൾ ടോൺ ഡാർക്​ ഗ്രേയിലേക്ക് മാറിയിട്ടുണ്ട്​. ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവ ടച്ച്​ സ്​ക്രീനിൽ നൽകിയിട്ടുണ്ട്​. ബ്ലൂടൂത്​ വഴി ഫോൺ കോളുകൾ എടുക്കാനുമാകും. ടിൽറ്റ്, ടെലിസ്കോപിക് അഡ്​ജസ്റ്റ്മെൻറുള്ള സ്റ്റിയറിങ്​, പിൻ സീറ്റുകൾക്കുള്ള വ്യക്തിഗത ആം റെസ്​റ്റുകൾ, നാല് യാത്രക്കാർക്കും യുഎസ്ബി ചാർജിങ്​ സോക്കറ്റുകൾ, പവർ വിൻഡോകൾ, സെൻട്രൽ ലോക്കിങ്​, എയർ കണ്ടീഷനിങ്​, ഡിആർഎല്ലുകളുള്ള എൽഇഡി ഹെഡ് ലാമ്പുകൾ, ഫോഗ് ലാമ്പുകൾ, കോർണർ ലാമ്പുകൾ എന്നിവയാണ് മറ്റ് സവിശേഷതകൾ.

പഴയ മോഡലിനെക്കാൾ 22 മി.മി. നീളവും 20 മി.മി. ഉയരവുമുണ്ട്. മുൻ ഓവർഹാങ് 13 സെ.മി. കൂടിയത് പുതിയ സുരക്ഷാനിയമങ്ങൾക്കനുസരിച്ച് ബമ്പറും മറ്റും പരിഷ്കരിക്കാനാണ്. വീൽ ബേസ് 2400 മില്ലീമിറ്റര്‍ എന്ന പഴയ തന്നെ. മനോഹരമായ നാലു ക്യാപ്റ്റൻ സീറ്റുകൾ ഉണ്ട്. ഡാഷ് ബോർഡ് ആധുനിക ഓഫ് റോഡ് എസ്‌യുവികൾക്ക് ഇണങ്ങുന്ന തരം. നല്ല സ്റ്റിയറിങ്. ടച്ച് സ്ക്രീൻ സ്റ്റീരിയോ. മികച്ച എസി. കാറുകളോടു കിട പിടിക്കും ഉൾവശം. ക്യാപ്റ്റൻ സീറ്റുകളുടെ സുഖവും കുറച്ചുകൂടി മെച്ചപ്പെട്ട യാത്രയും പ്രതീക്ഷിക്കാം.

സാക്ഷാല്‍ ബെന്‍സിന്‍റെതാണ് വാഹനത്തിന്‍റെ എൻജിനും ഗീയർബോക്സും. ബിഎസ്6​ നിയന്ത്രണങ്ങൾ പാലിക്കുന്നതിന്​ കമ്പനി പഴയ 2.6 ലിറ്റർ ഡീസൽ എഞ്ചിൻ നവീകരിച്ചു. ഈ എഞ്ചിന്‍ 91hp ഉം 250Nm ടോർക്കും സൃഷ്‍ടിക്കും. അഞ്ച്​ സ്​പീഡ് മാനുവൽ ഗിയർബോക്​സാണ് ട്രാന്‍സ്‍മിഷന്‍. പഴയ ഗൂർഖ എക്‌സ്ട്രീമിന്റെ 140 എച്ച്പി 2.2 ലിറ്റർ ഡീസൽ എഞ്ചിൻ ഇനി ഉണ്ടാവില്ല.  സ്വതന്ത്ര ഡബിൾ വിഷ്ബോണുകളും മുൻവശത്ത് മൾട്ടിലിങ്ക് സെറ്റപ്പും ഉള്ള സസ്പെൻഷൻ സെറ്റപ്പും മാറ്റമില്ലാതെ തുടരുന്നു.