ഇന്ത്യൻ വാഹന വിപണിയിൽ കോടികളുടെ കുതിപ്പ്; എന്താണ് വരാനിരിക്കുന്നത്?

മാരുതി സുസുക്കി, ഹ്യുണ്ടായ്, മഹീന്ദ്ര, ടാറ്റ മോട്ടോഴ്‌സ് തുടങ്ങിയ പ്രമുഖ ഇന്ത്യൻ വാഹന നിർമ്മാതാക്കൾ ഈ സാമ്പത്തിക വർഷം 40,000 കോടി രൂപയുടെ വൻ നിക്ഷേപം നടത്താൻ ഒരുങ്ങുന്നു. വർധിച്ചുവരുന്ന വാഹന ആവശ്യം മുതലെടുത്ത് പുതിയ മോഡലുകൾ, ഇലക്ട്രിക് വാഹനങ്ങൾ, ഉത്പാദന ശേഷി വർദ്ധിപ്പിക്കൽ എന്നിവയിലാണ് കമ്പനികൾ ശ്രദ്ധ കേന്ദ്രീകരിക്കുന്നത്.

ഇന്ത്യയിലെ പ്രമുഖ വാഹന നിർമ്മാതാക്കളായ മാരുതി സുസുക്കി, ഹ്യുണ്ടായ്, മഹീന്ദ്ര ആൻഡ് മഹീന്ദ്ര (എം ആൻഡ് എം), ടാറ്റ മോട്ടോഴ്‌സ്, ഹീറോ മോട്ടോകോർപ്പ് എന്നിവ ഈ സാമ്പത്തിക വർഷം ഏകദേശം 40,000 കോടി രൂപയുടെ മൂലധന ചെലവ് ആസൂത്രണം ചെയ്യുന്നതായി റിപ്പോർട്ട്. രാജ്യത്ത് വാഹന വിൽപ്പന വർദ്ധിച്ചുകൊണ്ടിരിക്കുന്നതിനാലാണ് ഈ നിക്ഷേപം നടത്തുന്നത് എന്നാണ് റിപ്പോർട്ടുകൾ. പശ്ചിമേഷ്യ പോലുള്ള ലോകത്തിന്റെ ചില ഭാഗങ്ങളിൽ നിലനിൽക്കുന്ന സംഘർഷങ്ങൾ സമ്പദ്‌വ്യവസ്ഥയെ ബാധിച്ചേക്കാമെന്ന ആശങ്കകൾ ഉണ്ടെങ്കിലും  ഇന്ത്യൻ വാഹന വിപണി ശക്തമായ നിലയിൽ തന്നെ തുടരുമെന്ന് വാഹന കമ്പനികൾ വിശ്വസിക്കുന്നു.

മാരുതി സുസുക്കിയുടെ ഏറ്റവും വലിയ നിക്ഷേപ പദ്ധതി

 ഈ വർഷം 14,000 കോടി നിക്ഷേപിക്കാൻ ആണ് മാരുതി സുസുക്കിയുടെ നീക്കം. ഇതുവരെയുള്ള കമ്പനിയുടെ ഏറ്റവും വലിയ നിക്ഷേപമാണിത്. പ്രതിവർഷം 500,000 പുതിയ കാറുകൾ ഉത്പാദിപ്പിക്കുന്നതിനുള്ള ശേഷി വർദ്ധിപ്പിക്കുക എന്നതാണ് ലക്ഷ്യം. ഇന്ത്യയിൽ കാറുകളുടെ ആവശ്യം വിതരണത്തേക്കാൾ കൂടുതലാണെന്ന് കമ്പനി പറയുന്നു.

ഹ്യുണ്ടായിയുടെ പുതിയ പദ്ധതി

 ഹ്യുണ്ടായ് മോട്ടോർ ഇന്ത്യയും ഈ വർഷം ഏകദേശം 7,500 കോടി ചെലവഴിക്കും. രണ്ട് പുതിയ എസ്‌യുവി മോഡലുകൾ പുറത്തിറക്കാൻ കമ്പനി തയ്യാറെടുക്കുകയാണ്, കൂടാതെ മഹാരാഷ്ട്രയിലെ തലേഗാവ് പ്ലാന്റിൽ ഉത്പാദനം വിപുലീകരിക്കുകയും ചെയ്യും.

മഹീന്ദ്രയുടെയും ടാറ്റയുടെയും നീക്കം

മഹീന്ദ്ര ആൻഡ് മഹീന്ദ്ര സാമ്പത്തിക വർഷം 25 നും സാമ്പത്തിക വർഷം 27 നും ഇടയിൽ ഏകദേശം 27,000 കോടി നിക്ഷേപിക്കാൻ പദ്ധതിയിടുന്നു. കമ്പനി കൂടുതൽ നിക്ഷേപങ്ങൾ ആസൂത്രണം ചെയ്യുന്നു. ടാറ്റ മോട്ടോഴ്‌സ് സാമ്പത്തിക വർഷം 26 നും സാമ്പത്തിക വർഷം 30 നും ഇടയിൽ 33,000 കോടി മുതൽ 35,000 കോടി വരെ ചെലവഴിക്കും. ഈ പണം പുതിയ വാഹനങ്ങൾ, ഇലക്ട്രിക് വാഹനങ്ങൾ, സോഫ്റ്റ്‌വെയർ, പുതിയ സാങ്കേതികവിദ്യകൾ എന്നിവയിൽ നിക്ഷേപിക്കും.

ഇരുചക്ര വാഹന മേഖലയിലും വലിയ നിക്ഷേപം

 പെട്രോൾ, ഇലക്ട്രിക് സ്‍കൂട്ടറുകളുടെ ശേഷി വികസിപ്പിക്കുന്നതിനായി ഹീറോ മോട്ടോകോർപ്പ് ഈ വർഷം ഇതുവരെയുള്ളതിൽ വച്ച് ഏറ്റവും ഉയർന്ന നിരക്കായ 1,500 കോടി നിക്ഷേപിക്കാൻ പദ്ധതിയിടുന്നു.

വിൽപ്പനയിലും ഡിമാൻഡിലും വർദ്ധനവ്

വാഹന വിൽപ്പനയിൽ 10 ശതമാനത്തിൽ അധികം വർധനവ് പ്രതീക്ഷിക്കുന്നതായി മാരുതി സുസുക്കി പറഞ്ഞു. ഏകദേശം 1.65 ലക്ഷം വാഹനങ്ങൾക്കുള്ള ഓർഡറുകൾ ഇപ്പോഴും കമ്പനിക്ക് ബാക്കിയുണ്ട്. ഈ വർഷം വിൽപ്പനയിൽ 810 ശതമാനം വർധനവ് ഉണ്ടാകുമെന്ന് ഹ്യുണ്ടായിയും കണക്കാക്കുന്നു.

ഇന്ത്യയുടെ സമ്പദ്‌വ്യവസ്ഥയിൽ ആഘാതം യുവ ജനസംഖ്യ, വർദ്ധിച്ചുവരുന്ന വരുമാനം, പരിഷ്കാരങ്ങൾ എന്നിവ കാരണം ഇന്ത്യയിൽ ഡിമാൻഡ് ക്രമാനുഗതമായി വർദ്ധിച്ചുകൊണ്ടിരിക്കുകയാണെന്ന് മഹീന്ദ്ര ഗ്രൂപ്പ് സിഇഒ പറയുന്നു. 2030 ആകുമ്പോഴേക്കും ഇന്ത്യൻ വാഹന വിപണി ആറുദശലക്ഷം യൂണിറ്റ് കവിയുമെന്ന് ടാറ്റ മോട്ടോഴ്‌സും പ്രതീക്ഷിക്കുന്നു.