സൈബർ ആക്രമണത്തിൽ തളർന്ന് ടാറ്റയുടെ സ്വന്തം ജഗ്വാർ, അടച്ചുപൂട്ടിയ ഫാക്ടറികൾ തുറക്കുന്നത് നീട്ടി

ടാറ്റാ മോട്ടോഴ്സിന്‍റെ ജാഗ്വാർ ലാൻഡ് റോവർ (ജെഎൽആർ) ഒരു വലിയ റാൻസംവെയർ സൈബർ ആക്രമണത്തെ തുടർന്ന് ആഗോളതലത്തിൽ ഉത്പാദനം നിർത്തിവച്ചു. 

ടാറ്റാ മോട്ടോഴ്സിന്‍റെ ഉടമസ്ഥതയിലുള്ള ഓട്ടോമൊബൈൽ ഭീമനായ ജാഗ്വാർ ലാൻഡ് റോവർ (ജെഎൽആർ) ഇതുവരെയുള്ളതിൽ വച്ച് ഏറ്റവും വലിയ പ്രതിസന്ധിയിലൂടെയാണ് ഇപ്പോൾ കടന്നുപോകുന്നത്. 2025 ഓഗസ്റ്റ് 31 ന് കമ്പനിയുടെ ആഗോള പ്ലാന്റുകളിൽ ഉണ്ടായ ഒരു വലിയ സൈബർ ആക്രമണം കാരണം കമ്പനിയുടെ ഉത്പാദനം പൂർണ്ണമായും നിർത്തിവച്ചു. സ്ഥിതി ഇപ്പോഴും വളരെ ഗുരുതരമാണെന്നും ഫാക്ടറി അടച്ചുപൂട്ടൽ 2025 ഒക്ടോബർ ഒന്നുവരെ നീട്ടിയതായും കമ്പനി ഔദ്യോഗികമായി പ്രഖ്യാപിച്ചു. ഓഗസ്റ്റ് അവസാനത്തിൽ നടന്ന സൈബർ ആക്രമണത്തിനുശേഷം, ജെഎൽആറിന് വാഹനങ്ങൾ നിർമ്മിക്കാൻ കഴിയാത്തതിനാൽ കമ്പനി അതിന്റെ ഐടി സംവിധാനങ്ങൾ പ്രവർത്തനരഹിതമാക്കാൻ നിർബന്ധിതരായി.

ജെഎൽആറിന് നേരെയുണ്ടായ റാൻസംവെയർ ആക്രമണം കമ്പനിയുടെ ഐടി സംവിധാനങ്ങളെ പൂർണ്ണമായും തടസപ്പെടുത്തി എന്നാണ് റിപ്പോർട്ടുകൾ. സോളിഹൾ, ഹെയ്ൽവുഡ് തുടങ്ങിയ പ്രധാന യുകെ പ്ലാന്റുകൾ ഏതാണ്ട് അടച്ചുപൂട്ടി. ഇതിന്റെ ആഘാതം യുകെയിൽ മാത്രമല്ല ഇന്ത്യ, ചൈന, ബ്രസീൽ, സ്ലൊവാക്യ എന്നിവിടങ്ങളിലും ഉൽപ്പാദനത്തെ ബാധിച്ചിട്ടുണ്ട്. ഇന്ത്യയിലെ ജാഗ്വാർ ലാൻഡ് റോവറിന്‍റെ ഫാക്ടറിക്ക് പ്രതിമാസം ഏകദേശം 1,000 കാറുകൾ നിർമ്മിക്കാനുള്ള ശേഷിയുണ്ട്. എങ്കിലും, ഈ ആക്രമണം കാരണം, അവിടെ കാർ ഡെലിവറികൾ ഇപ്പോൾ മൂന്ന് മുതൽ എട്ട് മാസം വരെ വൈകുമെന്ന് പ്രതീക്ഷിക്കുന്നു.

യുകെയിൽ മാത്രം 33,000-ത്തിലധികം ജീവനക്കാരെ ഇത് ബാധിച്ചിട്ടുണ്ട്. ഡീലർമാർക്ക് പുതിയ കാറുകൾ രജിസ്റ്റർ ചെയ്യാനോ സ്പെയർ പാർട്‍സുകൾ ഓർഡർ ചെയ്യാനോ കഴിയുന്നില്ല. ഡയഗ്നോസ്റ്റിക് സോഫ്റ്റ്‌വെയർ പോലും പ്രവർത്തനരഹിതമായതിനാൽ അറ്റകുറ്റപ്പണികൾ ബുദ്ധിമുട്ടാണ്. അതേസമയം ഈ പ്രതിസന്ധി ജെഎൽആറിൽ മാത്രമായി ഒതുങ്ങുന്നില്ല. ഇത് മുഴുവൻ വിതരണ ശൃംഖലയെയും ബാധിക്കുന്നു. ഏകദേശം 200,000 ജോലികളെ നേരിട്ട് ബാധിച്ചേക്കാമെന്ന് കണക്കാക്കപ്പെടുന്നു. ചെറുകിട, ഇടത്തരം വിതരണക്കാരാണ് ഏറ്റവും കൂടുതൽ ബാധിച്ചത്. 25% വിതരണക്കാർ ഇതിനകം തന്നെ ജീവനക്കാരെ താൽക്കാലികമായി പിരിച്ചുവിട്ടിട്ടുണ്ടെന്നും വരും ആഴ്ചകളിൽ കൂടുതൽ കമ്പനികൾ ഇത് പിന്തുടരുമെന്നും വ്യവസായ സംഘടനയായ എസ്എംഎംടി മുന്നറിയിപ്പ് നൽകി.

ബ്രിട്ടനിലെ നാഷണൽ സൈബർ സെക്യൂരിറ്റി സെന്ററും (NCSC) ടാറ്റ കൺസൾട്ടൻസി സർവീസസും (TCS) ചേർന്ന് സിസ്റ്റം പുനഃസ്ഥാപിക്കാൻ പ്രവർത്തിക്കുന്നു. റഷ്യ, ഉത്തര കൊറിയ, ഇറാൻ തുടങ്ങിയ രാജ്യങ്ങളിൽ നിന്നുള്ള സൈബർ ഗ്രൂപ്പാണ് ആക്രമണം നടത്തിയതെന്ന് വിദഗ്ദ്ധർ പറയുന്നു. വലിയ കമ്പനികളുടെ ഡിജിറ്റൽ സുരക്ഷ എങ്ങനെ ശക്തിപ്പെടുത്താം എന്നതിനെക്കുറിച്ച് ബ്രിട്ടീഷ് പാർലമെന്റിൽ ഇപ്പോൾ ഒരു ചർച്ച ശക്തമായി.

അതേസമയം ജീവനക്കാർ, വിതരണക്കാർ, ഉപഭോക്താക്കൾ, ഡീലർമാർ എന്നിവരുടെ സുരക്ഷയും പിന്തുണയും ഉറപ്പാക്കുക എന്നതാണ് തങ്ങളുടെ മുൻഗണനയെന്ന് കമ്പനി വ്യക്തമാക്കി. സുരക്ഷിതമായി പ്രവർത്തനങ്ങൾ പുനരാരംഭിക്കുന്നതിന് സൈബർ സുരക്ഷാ വിദഗ്ധരുമായും നിയമ നിർവ്വഹണ ഏജൻസികളുമായും 24 മണിക്കൂറും പ്രവർത്തിക്കുന്നുവെന്ന് കമ്പനി വ്യക്തമാക്കുന്നു.