മാരുതി സുസുക്കിയുടെ നെക്സ വിൽപ്പന കുതിക്കുന്നു: പ്രീമിയം കാറുകൾ ഇനി എല്ലായിടത്തും

മാരുതി സുസുക്കിയുടെ പ്രീമിയം ചാനലായ നെക്സ, 5.4 ലക്ഷം യൂണിറ്റ് വിൽപ്പനയുമായി ശ്രദ്ധേയ നേട്ടം കൈവരിച്ചു. മെട്രോ നഗരങ്ങൾക്ക് പുറമെ ചെറിയ പട്ടണങ്ങളിലും പ്രീമിയം അനുഭവം നൽകുന്ന നെക്സ സ്റ്റുഡിയോ ശൃംഖല കമ്പനി ഇപ്പോൾ വിപുലീകരിക്കുന്നു

ഇന്ത്യയിലെ പ്രീമിയം കാർ വിപണി ഇനി മെട്രോ നഗരങ്ങളിൽ മാത്രം ഒതുങ്ങുന്നില്ലെന്ന് തെളിയിച്ച് മാരുതി സുസുക്കിയുടെ നെക്സാ ചാനൽ ശ്രദ്ധേയ നേട്ടം സ്വന്തമാക്കി. 2024-25 സാമ്പത്തിക വർഷത്തിൽ നെക്സാ മുഖേന 5.4 ലക്ഷം യൂണിറ്റുകളുടെ വിൽപ്പനയാണ് കമ്പനി രേഖപ്പെടുത്തിയത്. ഇത് കമ്പനിയുടെ ആഭ്യന്തര മൊത്തം വിൽപ്പനയുടെ ഏകദേശം 30 ശതമാനത്തോളം വരും. ഈ നേട്ടത്തോടൊപ്പം നെക്സാ സ്റ്റുഡിയോയുടെ 200-ാമത്തെ ഔട്ട്‌ലെറ്റ് ഹരിയാനയിലെ ഖാർക്കോഡയിൽ ഉദ്ഘാടനം ചെയ്തു.

മെട്രോ നഗരങ്ങളിലെ വൻ ഷോറൂമുകൾക്ക് സമാനമായ അനുഭവം ചെറിയ നഗരങ്ങളിലും വളർന്നുവരുന്ന വിപണികളിലും നൽകുന്നതിനായി രൂപകൽപ്പന ചെയ്തതാണ് നെക്സാ സ്റ്റുഡിയോ മാതൃക. വിൽപ്പന, സർവീസ്, സ്പെയർ പാർട്സ് എന്നിവയെല്ലാം ഒരേ കുടക്കീഴിൽ ലഭ്യമാക്കുന്ന സമഗ്ര സൗകര്യങ്ങളാണ് സ്റ്റുഡിയോയുടെ പ്രത്യേകത. വലിയ അടിസ്ഥാന സൗകര്യങ്ങൾ ആവശ്യമില്ലാതെ പ്രീമിയം അനുഭവം നൽകുക എന്നതാണ് ലക്ഷ്യം.

2015-ൽ പ്രീമിയം റീട്ടെയിൽ ചാനലായി ആരംഭിച്ച നെക്സാ ഇന്ന് 530-ത്തിലധികം നഗരങ്ങളിൽ 740-ത്തിലധികം ടച്ച്‌പോയിന്റുകളോടെ ശക്തമായ സാന്നിധ്യമാണ്. ആദ്യ വർഷം തന്നെ 100 ഔട്ട്‌ലെറ്റുകൾ പിന്നിട്ട നെക്സാ, അതിവേഗ വികസനത്തിന്റെ പാതയിലാണ്. നഗരപ്രദേശങ്ങളിലെ വലിയ നെക്സാ ഡീലർഷിപ്പുകളും വികസനോന്മുഖ നഗരങ്ങളിലെ സ്റ്റുഡിയോ ഔട്ട്‌ലെറ്റുകളും ചേർന്ന ഇരട്ട മാതൃകയിലാണ് ശൃംഖല പ്രവർത്തിക്കുന്നത്.

നെക്സാ ശൃംഖലയിലൂടെ വിപണിയിലെത്തുന്ന മോഡലുകളിൽ മാരുതി സുസുക്കി ബലേനോ, മാരുതി സുസുക്കി ഫ്രോങ്ക്സ്, മാരുതി സുസുക്കി ഗ്രാൻഡ് വിറ്റാര, മാരുതി സുസുക്കി XL6, മാരുതി സുസുക്കി ഇഗ്നിസ്, മാരുതി സുസുക്കി ജിംനി, മാരുതി സുസുക്കി ഇൻവിക്റ്റോ കൂടാതെ ഇലക്ട്രിക് എസ്‌യുവിയായ മാരുതി സുസുക്കി ഇ-വിറ്റാരയും ഉൾപ്പെടുന്നു.

2030-31 സാമ്പത്തിക വർഷാവസാനം നെക്സാ സ്റ്റുഡിയോ ഔട്ട്‌ലെറ്റുകളുടെ എണ്ണം 600 ആയി ഉയർത്താനാണ് ലക്ഷ്യമെന്ന് കമ്പനിയുടെ മാനേജിംഗ് ഡയറക്ടറും സിഇഒയുമായ ഹിസാഷി ടകെയുച്ചി വ്യക്തമാക്കി. ഉയർന്ന് വരുന്ന ആകാംക്ഷയും പ്രീമിയം വാഹനങ്ങളോടുള്ള ആവേശവും വർധിക്കുന്ന ടിയർ-2, ടിയർ-3 നഗരങ്ങളിലേക്കാണ് കൂടുതൽ ശ്രദ്ധ കേന്ദ്രീകരിക്കുന്നത്.

ഇതോടെ പ്രീമിയം കാർ വിൽപ്പന മേഖലയിൽ നെക്സാ ശക്തമായ സാന്നിധ്യമായി മാറിയിരിക്കുകയാണ്. ചെറിയ നഗരങ്ങളിലെ ഉപഭോക്താക്കളെയും ലക്ഷ്യമിട്ട് വിപണി വിപുലീകരിക്കുന്ന തന്ത്രം കമ്പനിയ്ക്ക് ഭാവിയിൽ കൂടുതൽ വളർച്ച ഉറപ്പാക്കുമെന്ന് വിലയിരുത്തപ്പെടുന്നു.