തലേവര തെളിയിച്ച മാഗ്നൈറ്റിന് 'ചുവപ്പന്‍' എഡിഷനുമായി നിസാന്‍ ഇന്ത്യ

മാഗ്നൈറ്റിന്‍റെ ഈ പ്രത്യേക പതിപ്പിനുള്ള ബുക്കിംഗ് കമ്പനി തുറന്നിട്ടുണ്ടെന്നും ഇത് പ്രത്യേകിച്ചും യുവ ഉപഭോക്താക്കള്‍ക്കിടയിൽ പ്രീതി നേടുമെന്ന് കമ്പനി പറയുന്നതായും സ്ഥിരീകരിച്ചതായി എച്ച്ടി ഓട്ടോ റിപ്പോര്‍ട്ട് ചെയ്യുന്നു. 

ഇന്ത്യയില്‍ ജാപ്പനീസ് വാഹന നിര്‍മ്മാതാക്കളായ നിസാന്‍റെ തലവര തെളിയിച്ച മോഡലാണ് മാഗനൈറ്റ്. ജനപ്രിയമായി നിരത്തിലും വിപണിയിലും കുതിക്കുന്ന വാഹനത്തിന്  ഒരു പ്രത്യേക  മാഗ്‌നൈറ്റ് റെഡ് എഡിഷൻ പ്രഖ്യാപിച്ചിരിക്കുകയാണ് നിസാൻ മോട്ടോർ ഇന്ത്യ. അത് ജൂലൈ 18 ന് രാജ്യത്ത് അവതരിപ്പിക്കും. മാഗ്നൈറ്റിന്‍റെ ഈ പ്രത്യേക പതിപ്പിനുള്ള ബുക്കിംഗ് കമ്പനി തുറന്നിട്ടുണ്ടെന്നും ഇത് പ്രത്യേകിച്ചും യുവ ഉപഭോക്താക്കള്‍ക്കിടയിൽ പ്രീതി നേടുമെന്ന് കമ്പനി പറയുന്നതായും സ്ഥിരീകരിച്ചതായി എച്ച്ടി ഓട്ടോ റിപ്പോര്‍ട്ട് ചെയ്യുന്നു.

ഫ്രണ്ട് ഗ്രില്ലിലെ ചുവന്ന ആക്സന്‍റ്, ഫ്രണ്ട് ബമ്പർ ക്ലാഡിംഗ്, വീൽ ആർച്ചുകൾ, ബോഡി സൈഡ് ക്ലാഡിംഗ് എന്നിവയാണ് നിസാൻ മാഗ്നൈറ്റ് റെഡ് എഡിഷന്റെ ചില പ്രധാന ഹൈലൈറ്റുകൾ. പ്രത്യേക പതിപ്പ് മോഡലിന് 'റെഡ് എഡിഷൻ' ബോഡി ബാഡ്‍ജ്, എൽഇഡി സ്‌കഫ് പ്ലേറ്റ്, ടെയിൽ ഡോർ ഗാർണിഷ്, ബോഡി ഗ്രാഫിക്‌സ് എന്നിവയും ലഭിക്കുന്നു.

2020 ഡിസംബറിൽ രാജ്യത്ത് ആദ്യമായി ലോഞ്ച് ചെയ്‍തതു മുതൽ നിസാന്റെ ശക്തമായ പ്രകടനമാണ് മാഗ്‌നൈറ്റ്. മത്സരം അങ്ങേയറ്റം കടുപ്പമുള്ളതാണെങ്കിലും അത് തുടരുന്നു. പ്രതികരണം വർദ്ധിപ്പിക്കുന്നതിനായി കമ്പനി ഇപ്പോൾ റെഡ് എഡിഷൻ മാഗ്‌നൈറ്റിലേക്ക് നോക്കുകയാണ്. നിസ്സാൻ മാഗ്‌നൈറ്റ് റെഡ് എഡിഷൻ യുവാക്കൾക്കും വിവേകികളായ പ്രേക്ഷകർക്കും അതുല്യമായ ഡ്രൈവിംഗ് അനുഭവങ്ങൾ സൃഷ്ടിക്കുമെന്ന് വാഗ്ദാനം ചെയ്യുന്നുവെന്ന് നിസാൻ മോട്ടോർ ഇന്ത്യയുടെ എംഡി രാകേഷ് ശ്രീവാസ്‍തവ പറഞ്ഞു. നിസാൻ മാഗ്‌നൈറ്റ് റെഡ് എഡിഷന്റെ ബോൾഡ് ഡിസൈനും കരുത്തും തങ്ങൾക്ക് ഉറപ്പുണ്ട് എന്നും പായ്ക്ക് ചെയ്‍ത പ്രകടനം, സുഖസൗകര്യങ്ങൾ, നൂതന സാങ്കേതികവിദ്യകൾ, കണക്റ്റിവിറ്റി സവിശേഷതകൾ എന്നിവ ഉപഭോക്താക്കളെ ആകർഷിക്കുകയും അവിസ്‍മരണീയമായ യാത്രകൾ സൃഷ്‍ടിക്കുകയും ചെയ്യും എന്നും കമ്പനി പുറത്തിറക്കിയ വാര്‍ത്താക്കുറിപ്പിൽ അധികൃതര്‍ വ്യക്തമാക്കി. 

മാഗ്‌നൈറ്റ് ആദ്യമായി പുറത്തിറക്കിയതിന് ശേഷം ഒരു ലക്ഷത്തിലധികം ബുക്കിംഗുകൾ ലഭിച്ചിട്ടുണ്ടെന്നും ഇതുവരെ 50,000 യൂണിറ്റുകൾ എത്തിച്ചിട്ടുണ്ടെന്നും നിസാൻ എടുത്തുപറയുന്നു. ടർബോ മോട്ടോർ ഉൾപ്പെടുന്ന രണ്ട് പെട്രോൾ എഞ്ചിൻ ഓപ്ഷനുകളാൽ പ്രവർത്തിക്കുന്ന നിസാൻ മാഗ്നൈറ്റിന് രണ്ട് ട്രാൻസ്‍മിഷൻ ചോയ്‌സുകളുണ്ട് - അഞ്ച് സ്പീഡ് മാനുവലും ഏറെ പ്രശംസ നേടിയ എക്സ്-ട്രോണിക്ക് സിവിടി ഗിയർബോക്സും. അതിന്റെ ബാഹ്യ രൂപകൽപ്പനയും വാങ്ങാൻ സാധ്യതയുള്ള നിരവധി ആളുകളെ ആകർഷിക്കുന്നുണ്ടെങ്കിലും, എട്ട് ഇഞ്ച് പ്രധാന ഇൻഫോടെയ്ൻമെന്റ് സ്‌ക്രീൻ, ഏഴ് ഇഞ്ച് ഡ്രൈവർ ഡിസ്‌പ്ലേ, എഞ്ചിൻ സ്റ്റാർട്ട്-സ്റ്റോപ്പ് ബട്ടൺ, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയ്ക്കുള്ള പിന്തുണ തുടങ്ങി നിരവധി പ്രധാന സവിശേഷതകളാൽ ക്യാബിൻ നിറഞ്ഞിരിക്കുന്നു. 

ലോഞ്ച് സമയത്ത്, നിസ്സാൻ മാഗ്‌നൈറ്റിന്റെ അടിസ്ഥാന വേരിയന്റിന് അഞ്ച് ലക്ഷം രൂപയിൽ താഴെ ( എക്സ് ഷോറൂം) വില നിശ്ചയിച്ചിരുന്നു. നിലവിൽ 5.97 ലക്ഷം രൂപയ്ക്കും 10.57 ലക്ഷം രൂപയ്ക്കും ഇടയിലാണ് (എക്സ് ഷോറൂം) വില. കൂടാതെ, അറ്റകുറ്റപ്പണികൾക്കുള്ള കുറഞ്ഞ ചിലവും നിസ്സാൻ അവകാശപ്പെടുന്നു. വിപണിയിൽ, റെനോ കിഗര്‍ , കിയ സോണറ്റ്, ഹ്യുണ്ടായി വെന്യു, ടാറ്റാ നെക്സോണ്‍,മാരുതി ബ്രെസ , മഹീന്ദ്ര XUV300 തുടങ്ങിയ മോഡലുകള്‍ക്ക് എതിരെയാണ് മാഗ്നൈറ്റ് മത്സരിക്കുന്നത്.

എന്താണ് നിസാന്‍ മാഗ്നൈറ്റ്?
മാഗ്‌നൈറ്റ് രൂപകൽപ്പന ചെയ്‌ത് വികസിപ്പിച്ചെടുത്തത് ഇന്ത്യയിലാണ്.  നിസാൻ നെക്സ്റ്റ് ട്രാൻസ്ഫോർമേഷൻ പ്ലാനിന് കീഴിൽ പുറത്തിറക്കുന്ന ആദ്യത്തെ ആഗോള ഉൽപ്പന്നമായ മാഗ്നൈറ്റിനെ 2020 ഡിസംബര്‍ ആദ്യവാരമാണ് നിസാൻ ഇന്ത്യൻ വിപണിയിൽ അവതരിപ്പിക്കുന്നത്.  XE,XL,XV,XV പ്രീമിയം എന്നീ നാല് വേരിയന്റുകളില്‍ 20 ഗ്രേഡുകളായാണ് നിസാന്‍ മാഗ്‌നൈറ്റ് വിപണിയില്‍ എത്തിയത്. 'മേക്ക് ഇന്‍ ഇന്ത്യ, മേക്ക് ഫോര്‍ ദി വേള്‍ഡ്' എന്ന ആശയത്തില്‍ ഇന്ത്യയിലാണ് വാഹനം നിര്‍മിച്ചിരിക്കുന്നത് എന്നതായിരുന്നു ഏറ്റവും വലിയ പ്രത്യേകത. നിസാന്‍ നെക്സ്റ്റ് സ്ട്രാറ്റജിക്ക് കീഴിലുള്ള കമ്പനിയുടെ ആദ്യത്തെ ഉല്‍പ്പന്നമാണിത്. നിസാന്റെ ഏറ്റവും പുതിയ ഇന്റലിജന്റ് മൊബിലിറ്റി സാങ്കേതികവിദ്യ മാഗ്നൈറ്റില്‍ അവതരിപ്പിച്ചിട്ടുണ്ട്. 1.0 ലിറ്റർ B4D നാച്ചുറലി ആസ്പിറേറ്റഡ് പെട്രോള്‍, 1.0 ലിറ്റർ HRA0 ടർബോ-പെട്രോൾ എന്നിങ്ങനെ രണ്ട് പെട്രോൾ എഞ്ചിൻ ഓപ്ഷനുകളോടെയാണ് വാഹനം പുറത്തിറക്കിയത്.  

എഞ്ചിൻ, ഗിയർബോക്സ് വിശദാംശങ്ങൾ
രണ്ട് പെട്രോൾ എഞ്ചിൻ ഓപ്ഷനുകളിൽ നിസാൻ മാഗ്‌നൈറ്റ് ലഭ്യമാണ്. ആദ്യത്തേത് 72 എച്ച്പി, 1.0 ലിറ്റർ, മൂന്ന് സിലിണ്ടർ, നാച്ചുറലി ആസ്പിറേറ്റഡ് എഞ്ചിൻ, രണ്ടാമത്തേത് 100 എച്ച്പി, 1.0 ലിറ്റർ, മൂന്ന് സിലിണ്ടർ, ടർബോ-പെട്രോൾ യൂണിറ്റാണ്. രണ്ട് എഞ്ചിനുകളും സ്റ്റാൻഡേർഡായി 5-സ്പീഡ് മാനുവൽ ഗിയർബോക്സിൽ ലഭ്യമാണ്. ഒരു CVT ഓട്ടോമാറ്റിക് ഗിയർബോക്‌സിന്റെ തിരഞ്ഞെടുപ്പിനൊപ്പം ടർബോ-പെട്രോൾ വാഗ്ദാനം ചെയ്യുന്നു (ഇത് 152Nm ടോർക്ക് ഉത്പാദിപ്പിക്കുന്നു - മാനുവലിനേക്കാൾ 8Nm കുറവ്). XE, XL, XV എക്സിക്യൂട്ടീവ്, XV, XV പ്രീമിയം എന്നിങ്ങനെ അഞ്ച് വകഭേദങ്ങളിൽ മാഗ്നൈറ്റ് ലഭ്യമാണ്. നിലവിൽ മിക്ക നഗരങ്ങളിലും മാഗ്‌നൈറ്റിനായുള്ള കാത്തിരിപ്പ് കാലയളവ് നീളുന്നു.

സുരക്ഷ
ഇന്ത്യയിലെ ഏറ്റവും സുരക്ഷിതമായ കാറുകളിലൊന്നാണ് നിസാൻ മാഗ്നൈറ്റ്. ഈ വർഷം ഫെബ്രുവരിയിൽ നടന്ന ഗ്ലോബൽ എൻസിഎപി ക്രാഷ് ടെസ്റ്റിൽ സബ് കോംപാക്ട് എസ്‌യുവിക്ക് ഫോർ സ്റ്റാർ സുരക്ഷാ റേറ്റിംഗ് ലഭിച്ചു.