Nissan Magnite : ജനപ്രിയം വാക്കിലല്ല, കണക്കിൽ തന്നെ; രാജ്യത്ത് ഒരുലക്ഷം ബുക്കിംഗ് രജിസ്റ്റർ ചെയ്ത് മാഗ്നൈറ്റ്
മാഗ്നൈറ്റ് രൂപകൽപ്പന ചെയ്ത് വികസിപ്പിച്ചെടുത്തത് ഇന്ത്യയിലാണ്. നിസാൻ നെക്സ്റ്റ് ട്രാൻസ്ഫോർമേഷൻ പ്ലാനിന് കീഴിൽ പുറത്തിറക്കുന്ന ആദ്യത്തെ ആഗോള ഉൽപ്പന്നമായ മാഗ്നൈറ്റിനെ 2020 ഡിസംബര്‍ ആദ്യവാരമാണ് നിസാൻ ഇന്ത്യൻ വിപണിയിൽ അവതരിപ്പിക്കുന്നത്
നിസാൻ ഇന്ത്യയുടെ ജനപ്രിയ എസ്‌യുവി മോഡലായ മാഗ്നൈറ്റ് രാജ്യത്ത് ഒരുലക്ഷം ബുക്കിംഗ് രജിസ്റ്റർ ചെയ്‍തതായി റിപ്പോര്‍ട്ട്. തങ്ങളുടെ സെഗ്‌മെന്‍റിലെ ഏറ്റവും താങ്ങാനാവുന്ന ഓപ്ഷനുകളിലൊന്നായ ഈ ജനപ്രിയ സബ്-കോംപാക്റ്റ് എസ്‌യുവി ഇന്ത്യൻ വിപണിയിൽ അവതരിപ്പിച്ച് രണ്ട് വർഷം പിന്നിടുമ്പോഴാണ് ഈ നാഴികക്കല്ല് കൈവരിച്ചതായി കമ്പനി പ്രഖ്യാപിക്കുന്നത് എന്ന് എച്ച്ടി ഓട്ടോ റിപ്പോര്‍ട്ട് ചെയ്യുന്നു.
മാരുതി സുസുക്കി വിറ്റാര ബ്രെസ, ഹ്യുണ്ടായ് വെന്യു തുടങ്ങിയവര്‍ക്കെതിരെ പോരാടാന്‍ 2020 ഡിസംബറിൽ ആണ് നിസാന്‍ മാഗ്നൈറ്റിനെ കമ്പനി അവതരിപ്പിച്ചത്. നിസാൻ നെക്സ്റ്റ് ട്രാൻസ്ഫോർമേഷൻ പ്ലാനിന് കീഴിൽ പുറത്തിറക്കിയ ആദ്യത്തെ ആഗോള ഉൽപ്പന്നമാണ് മാഗ്നൈറ്റ്. ഇന്ത്യയിലെ നിസാന്റെ മൊത്തത്തിലുള്ള വിൽപ്പനയിൽ ഇത് ഇപ്പോഴും ഗണ്യമായ പങ്ക് നൽകുന്നു.
എന്താണ് നിസാന്‍ മാഗ്നൈറ്റ്?
മാഗ്നൈറ്റ് രൂപകൽപ്പന ചെയ്ത് വികസിപ്പിച്ചെടുത്തത് ഇന്ത്യയിലാണ്. നിസാൻ നെക്സ്റ്റ് ട്രാൻസ്ഫോർമേഷൻ പ്ലാനിന് കീഴിൽ പുറത്തിറക്കുന്ന ആദ്യത്തെ ആഗോള ഉൽപ്പന്നമായ മാഗ്നൈറ്റിനെ 2020 ഡിസംബര്‍ ആദ്യവാരമാണ് നിസാൻ ഇന്ത്യൻ വിപണിയിൽ അവതരിപ്പിക്കുന്നത്. XE,XL,XV,XV പ്രീമിയം എന്നീ നാല് വേരിയന്റുകളില്‍ 20 ഗ്രേഡുകളായാണ് നിസാന്‍ മാഗ്നൈറ്റ് വിപണിയില്‍ എത്തിയത്. 'മേക്ക് ഇന്‍ ഇന്ത്യ, മേക്ക് ഫോര്‍ ദി വേള്‍ഡ്' എന്ന ആശയത്തില്‍ ഇന്ത്യയിലാണ് വാഹനം നിര്‍മിച്ചിരിക്കുന്നത് എന്നതായിരുന്നു ഏറ്റവും വലിയ പ്രത്യേകത. നിസാന്‍ നെക്സ്റ്റ് സ്ട്രാറ്റജിക്ക് കീഴിലുള്ള കമ്പനിയുടെ ആദ്യത്തെ ഉല്‍പ്പന്നമാണിത്. നിസാന്റെ ഏറ്റവും പുതിയ ഇന്റലിജന്റ് മൊബിലിറ്റി സാങ്കേതികവിദ്യ മാഗ്നൈറ്റില്‍ അവതരിപ്പിച്ചിട്ടുണ്ട്. 1.0 ലിറ്റർ B4D നാച്ചുറലി ആസ്പിറേറ്റഡ് പെട്രോള്‍, 1.0 ലിറ്റർ HRA0 ടർബോ-പെട്രോൾ എന്നിങ്ങനെ രണ്ട് പെട്രോൾ എഞ്ചിൻ ഓപ്ഷനുകളോടെയാണ് വാഹനം പുറത്തിറക്കിയത്.
നിസാൻ മാഗ്നൈറ്റ്: കയറ്റുമതി
2021 ജൂണിൽ നിസാൻ ഇന്ത്യയിൽ നിർമ്മിച്ച മാഗ്‌നൈറ്റിന്റെ കയറ്റുമതി ആരംഭിച്ചിരുന്നു. അപ്പോള്‍ ഇന്തോനേഷ്യ, ദക്ഷിണാഫ്രിക്ക തുടങ്ങിയ വിപണികളിലേക്ക് മാത്രമാണ് പോയത്. ഇപ്പോൾ . നിസാൻ മോട്ടോർ 15 രാജ്യങ്ങളിലേക്ക് ഇന്ത്യയിൽ നിർമ്മിച്ച മാഗ്നൈറ്റ് എസ്‌യുവി കയറ്റുമതി ചെയ്യുന്നു. നേപ്പാൾ, ഭൂട്ടാൻ, ബംഗ്ലാദേശ്, ശ്രീലങ്ക, ബ്രൂണെ, ഉഗാണ്ട, കെനിയ, സീഷെൽസ്, മൊസാംബിക്ക്, സാംബിയ, മൗറീഷ്യസ്, ടാൻസാനിയ, മലാവി തുടങ്ങിയ വിപണികളിൽ ഇപ്പോൾ ഇന്ത്യയിൽ നിർമ്മിച്ച മാഗ്നൈറ്റ് വിൽക്കുന്നു. ഇന്തോനേഷ്യയിലേക്കും ദക്ഷിണാഫ്രിക്കയിലേക്കും കയറ്റുമതി ആരംഭിച്ചതു മുതൽ, കഴിഞ്ഞ വർഷം ഡിസംബർ വരെ നിസാൻ 6,344 യൂണിറ്റ് ഇൻ ഇന്ത്യ മാഗ്‌നൈറ്റുകൾ കയറ്റി അയച്ചിട്ടുണ്ട്. ഈ വർഷം മാർച്ചിൽ നിസാൻ മോട്ടോർ ചെന്നൈയിലെ റെനോ നിസാൻ ഓട്ടോമോട്ടീവ് ഇന്ത്യ പ്രൈവറ്റ് ലിമിറ്റഡ് (ആർഎൻഐപിഎൽ) ഫെസിലിറ്റിയിൽ നിന്ന് 50,000-ാമത്തെ മാഗ്നൈറ്റ് എസ്‌യുവി പുറത്തിറക്കിയിരുന്നു.
നിസാൻ മാഗ്നൈറ്റ്- എഞ്ചിൻ, ഗിയർബോക്സ് വിശദാംശങ്ങൾ
രണ്ട് പെട്രോൾ എഞ്ചിൻ ഓപ്ഷനുകളിൽ നിസാൻ മാഗ്നൈറ്റ് ലഭ്യമാണ്. ആദ്യത്തേത് 72 എച്ച്പി, 1.0 ലിറ്റർ, മൂന്ന് സിലിണ്ടർ, നാച്ചുറലി ആസ്പിറേറ്റഡ് എഞ്ചിൻ, രണ്ടാമത്തേത് 100 എച്ച്പി, 1.0 ലിറ്റർ, മൂന്ന് സിലിണ്ടർ, ടർബോ-പെട്രോൾ യൂണിറ്റാണ്. രണ്ട് എഞ്ചിനുകളും സ്റ്റാൻഡേർഡായി 5-സ്പീഡ് മാനുവൽ ഗിയർബോക്സിൽ ലഭ്യമാണ്. ഒരു CVT ഓട്ടോമാറ്റിക് ഗിയർബോക്‌സിന്റെ തിരഞ്ഞെടുപ്പിനൊപ്പം ടർബോ-പെട്രോൾ വാഗ്ദാനം ചെയ്യുന്നു (ഇത് 152Nm ടോർക്ക് ഉത്പാദിപ്പിക്കുന്നു - മാനുവലിനേക്കാൾ 8Nm കുറവ്). XE, XL, XV എക്സിക്യൂട്ടീവ്, XV, XV പ്രീമിയം എന്നിങ്ങനെ അഞ്ച് വകഭേദങ്ങളിൽ മാഗ്നൈറ്റ് ലഭ്യമാണ്. നിലവിൽ മിക്ക നഗരങ്ങളിലും മാഗ്‌നൈറ്റിനായുള്ള കാത്തിരിപ്പ് കാലയളവ് നീളുന്നു.
നിസാൻ മാഗ്നൈറ്റ് - സുരക്ഷ
ഇന്ത്യയിലെ ഏറ്റവും സുരക്ഷിതമായ കാറുകളിലൊന്നാണ് നിസാൻ മാഗ്നൈറ്റ്. ഈ വർഷം ഫെബ്രുവരിയിൽ നടന്ന ഗ്ലോബൽ എൻസിഎപി ക്രാഷ് ടെസ്റ്റിൽ സബ് കോംപാക്ട് എസ്‌യുവിക്ക് ഫോർ സ്റ്റാർ സുരക്ഷാ റേറ്റിംഗ് ലഭിച്ചു.
നിസാൻ മാഗ്നൈറ്റ്: വിലയും എതിരാളികളും
റെനോ കിഗര്‍, കിയ സോണറ്റ്, ഹ്യുണ്ടായി വെന്യു, മഹീന്ദ്ര എക്സ്‍യുവി 300, ടാറ്റ നെക്സോണ്‍, മാരുതി സുസുക്കി വിറ്റാര ബ്രെസ, ടൊയോട്ട അര്‍ബന്‍ ക്രൂസര്‍ എന്നിവയ്‌ക്കൊപ്പം മത്സരിക്കുന്ന കോംപാക്ട് എസ്‌യുവി വിഭാഗത്തിലാണ് മാഗ്‌നൈറ്റിന്റെ സ്ഥാനം. നിലവിൽ 5.88 ലക്ഷം മുതൽ 10.56 ലക്ഷം വരെയാണ് മാഗ്‌നൈറ്റിന്റെ വില ദില്ലി എക്‌സ് ഷോറൂം വില.
