ടാറ്റ സിയറയുടെ ഗംഭീര തിരിച്ചുവരവ്: എന്തൊക്കെ പ്രതീക്ഷിക്കാം?

ടാറ്റ സിയറ പുതിയ രൂപത്തിൽ തിരിച്ചെത്തുന്നു. ആധുനിക സാങ്കേതികവിദ്യയും പുതിയ ഡിസൈനുമായി എത്തുന്ന ഈ എസ്‌യുവി 2025 ലെ ഭാരത് മൊബിലിറ്റി ഷോയിൽ അനാച്ഛാദനം ചെയ്തു. പെട്രോൾ, ഡീസൽ, ഇലക്ട്രിക് പതിപ്പുകളിൽ ലഭ്യമാകുന്ന സിയറ 4x4 ഓപ്ഷനും വാഗ്ദാനം ചെയ്യുന്നു.

ടാറ്റ സിയറ ബ്രാൻഡ് ഇന്ത്യയിൽ ഗംഭീര തിരിച്ചുവരവിന് ഒരുങ്ങുന്നു. ബ്രാൻഡിന്റെ പുതിയ ഡിസൈൻ സമീപനം, ആധുനിക സാങ്കേതികവിദ്യ, ഉൽപ്പന്ന തന്ത്രം എന്നിവ പ്രദർശിപ്പിക്കുന്ന പുതിയ രൂപത്തിലാണ് ഈ എസ്‌യുവി വരുന്നത്. മഞ്ഞ നിറത്തിലുള്ള അതിന്റെ പ്രൊഡക്ഷൻ-റെഡി ഐസിഇ (ആന്തരിക ജ്വലന എഞ്ചിൻ) പതിപ്പ് കഴിഞ്ഞ മാസം 2025 ലെ ഭാരത് മൊബിലിറ്റി ഷോയിൽ അനാച്ഛാദനം ചെയ്തു.  വരാനിരിക്കുന്ന പുതിയ ടാറ്റ സിയറ എസ്‌യുവിയെക്കുറിച്ചുള്ള ചില രസകരമായ വസ്തുതകൾ ഇതാ:

ഡിസൈൻ
ഹാരിയർ, സഫാരി എസ്‌യുവികളിൽ നമ്മൾ ഇതിനകം കണ്ട ടാറ്റയുടെ പുതിയ ഡിസൈൻ ഭാഷയാണ് സിയറയിലും ഉള്ളത്. ശ്രദ്ധേയമായ കാര്യം, അതേ സിലൗറ്റ്, വലിയ ആൽപൈൻ വിൻഡോകൾ, ചതുരാകൃതിയിലുള്ള വീൽ ആർച്ചുകൾ, ഉയർത്തിയ ഹുഡ് എന്നിവ ഉപയോഗിച്ച് എസ്‌യുവി പഴയ ചാരുത നിലനിർത്തുന്നു എന്നതാണ്. പഴയ സിയറയുമായി താരതമ്യപ്പെടുത്തുമ്പോൾ, പുതിയതിൽ കൂടുതൽ മെലിഞ്ഞ ലൈറ്റ് യൂണിറ്റുകൾ, ചെറിയ ഫ്രണ്ട്, റിയർ ഓവർഹാൻഡുകൾ, റൂഫ്‌ലൈനിന്റെ ഷാർപ്പായിട്ടുള്ള റേക്ക് എന്നിവയുണ്ട്. പഴയ മോഡലിൽ നിന്ന് ഇതിനെ വ്യത്യസ്തമാക്കുന്നത് 195/65 R19 ടയറുകളുള്ള പുതുതായി രൂപകൽപ്പന ചെയ്ത 19 ഇഞ്ച് അലോയി വീലുകളാണ്. കറുത്ത പ്ലാസ്റ്റിക് ക്ലാഡിംഗും റൂഫ് റെയിലുകളും ഇതിൽ കാണുന്നില്ല.

അത്യാധുനിക ഇന്റീരിയർ
പ്രദർശിപ്പിച്ച ടാറ്റ സിയറ ഐസിഇയിൽ ക്യാബിൻ വിശദാംശങ്ങൾ മറച്ചുവെച്ച് ടിന്‍റഡ് വിൻഡോ ഗ്ലാസുകൾ ഉണ്ടായിരുന്നു. എങ്കിലും, എസ്‌യുവിക്ക് മൂന്ന് സ്‌ക്രീനുകൾ ഉണ്ടായിരിക്കുമെന്ന് വ്യക്തമാണ്. ഒന്ന് ഡിജിറ്റൽ ഇൻസ്ട്രുമെന്റ് ക്ലസ്റ്ററിനും രണ്ട് സെൻട്രൽ, പാസഞ്ചർ സൈഡ് ടച്ച്‌സ്‌ക്രീൻ ഇൻഫോടെയ്ൻമെന്റിനും. ഈ യൂണിറ്റിന് ഏകദേശം 12.3 ഇഞ്ച് വലിപ്പമുണ്ടാകും. പുതിയ സിയറയിൽ പ്രീമിയം സവിശേഷതകളാൽ സമ്പന്നമായ ആധുനിക ക്യാബിൻ ലേഔട്ട് ഉണ്ടായിരിക്കുമെന്ന് പ്രതീക്ഷിക്കുന്നു. പ്രകാശിതമായ 'ടാറ്റ' ലോഗോയുള്ള 4-സ്‌പോക്ക് സ്റ്റിയറിംഗ് വീൽ, പ്രീമിയം സൗണ്ട് സിസ്റ്റം, വയർലെസ് ഫോൺ ചാർജർ, പനോരമിക് സൺറൂഫ്, വെന്റിലേറ്റഡ് ഫ്രണ്ട് സീറ്റുകൾ, 6 എയർബാഗുകൾ, ഇലക്ട്രോണിക് സ്റ്റെബിലിറ്റി കൺട്രോൾ, 360 ഡിഗ്രി ക്യാമറ, ADAS സ്യൂട്ട് തുടങ്ങി നിരവധി സവിശേഷതകൾ എസ്‌യുവിക്ക് ലഭിക്കാൻ സാധ്യതയുണ്ട്.

വ്യത്യസ്‍ത പ്ലാറ്റ്‌ഫോമുകൾ
രസകരമെന്നു പറയട്ടെ, ടാറ്റ സിയറ ICE ATLAS (അഡാപ്റ്റീവ് ടെക് ഫോർവേഡ് ലൈഫ്‌സ്റ്റൈൽ ആർക്കിടെക്ചർ) പ്ലാറ്റ്‌ഫോമിലാണ് രൂപകൽപ്പന ചെയ്തിരിക്കുന്നത്, അതേസമയം എസ്‌യുവിയുടെ ഇവി പതിപ്പ് Acti.ev പ്ലാറ്റ്‌ഫോമിലാണ് നിർമ്മിക്കുന്നത്.

ഒന്നിലധികം പവർട്രെയിനുകൾ
പുതിയ ടാറ്റ സിയറയിൽ പെട്രോൾ, ഡീസൽ, ഇലക്ട്രിക് എന്നീ മൂന്ന് പവർട്രെയിൻ ഓപ്ഷനുകൾ വാഗ്ദാനം ചെയ്യും. പെട്രോൾ പതിപ്പിൽ 1.5 ലിറ്റർ ഡയറക്ട്-ഇഞ്ചക്ഷൻ ടർബോ എഞ്ചിൻ ഉണ്ടായിരിക്കാൻ സാധ്യതയുണ്ട്. ഇത് പരമാവധി 170 ബിഎച്ച്പി പവറും 280 എൻഎം ടോർക്കും പുറപ്പെടുവിക്കുന്നു. സിയറ ഡീസൽ ഹാരിയർ, സഫാരി എസ്‌യുവികളിൽ നിന്ന് 2.0 ലിറ്റർ എഞ്ചിൻ കടമെടുത്തേക്കാം. ഈ യൂണിറ്റ് പരമാവധി 170 ബിഎച്ച്പി പവറും 280 എൻഎം ടോർക്കും ഉത്പാദിപ്പിക്കുന്നു. മാനുവൽ, ഓട്ടോമാറ്റിക് ഗിയർബോക്‌സുകൾ വാഗ്ദാനം ചെയ്യും. സിയറ ഇവിയിൽ ഒന്നിലധികം ബാറ്ററി ഓപ്ഷനുകൾ ഉണ്ടാകുമെന്ന് പ്രതീക്ഷിക്കുന്നു, പൂർണ്ണ ചാർജിൽ 500 കിലോമീറ്ററിൽ കൂടുതൽ റേഞ്ച് വാഗ്ദാനം ചെയ്യുന്നു.

4X4 ഡ്രൈവ്ട്രെയിൻ
4X4 ഡ്രൈവ്ട്രെയിൻ സിസ്റ്റത്തിനുള്ള സാധ്യതയുണ്ട്. നേരത്തെ, അറ്റ്ലാസ് പ്ലാറ്റ്‌ഫോം അധിഷ്ഠിത വാഹനങ്ങൾ കുറച്ച് മെക്കാനിക്കൽ മാറ്റങ്ങളോടെ 4X4 ആക്കാമെന്ന് കമ്പനി വെളിപ്പെടുത്തിയിരുന്നു. വലിയ വലിപ്പത്തിലുള്ള ടയറുകളും ഉയർന്ന ഗ്രൗണ്ട് ക്ലിയറൻസും അതിന്റെ ഓഫ്-റോഡ് കഴിവുകളെ കൂടുതൽ മെച്ചപ്പെടുത്തും.

സുഖയാത്ര
പഴയ സിയറയ്ക്ക് 5 സീറ്റ് കോൺഫിഗറേഷൻ, മടക്കാവുന്ന പിൻ ബെഞ്ച് സീറ്റ് എന്നിവ വാഗ്ദാനം ചെയ്തിരുന്നു. 2025 പതിപ്പിന് 4 സീറ്റും 5 സീറ്റ് ലേഔട്ട് ഓപ്ഷനുകളും ലഭിച്ചേക്കും. 4 സീറ്റർ പതിപ്പ് വിശാലമായ ലെഗ്‌റൂം വാഗ്ദാനം ചെയ്യുന്നു. ഈ സീറ്റുകൾക്ക് സ്ലൈഡിംഗ് ഫംഗ്ഷൻ ഉണ്ടായിരിക്കും. ക്യാബിൻ, ബൂട്ട് സ്പേസ് കൈകാര്യം ചെയ്യാൻ ഇടം നൽകും. സീറ്റുകൾക്ക് നീട്ടാവുന്ന ലെഗ് സപ്പോർട്ട് അല്ലെങ്കിൽ ഒട്ടോമൻ ഫംഗ്ഷൻ വാഗ്ദാനം ചെയ്യുമെന്നും റിപ്പോർട്ടുകൾ ഉണ്ട്. പിൻ സീറ്റ് എന്റർടൈൻമെന്റ് സ്‌ക്രീനുകൾ, ഫോൾഡ്-ഡൗൺ ആം റെസ്റ്റുകൾ, ഫോൾഡ്-ഔട്ട് ട്രേ ടേബിളുകൾ, ഫോൺ ചാർജറുകൾ, ഒന്നിലധികം കണക്റ്റിവിറ്റി ഓപ്ഷനുകൾ തുടങ്ങിയവ പോലുള്ള സവിശേഷതകളും പുതിയ സിയറയുടെ യാത്രാ സുഖം വർദ്ധിപ്പിക്കും.