പുത്തന്‍ കാർ നിന്നു കത്തി; കാരണമറിയാതെ കുടുംബം

കുടുംബം യാത്ര കഴിഞ്ഞെത്തിയ ഉടന്‍ പുതിയ കാറിനു തീപിടിച്ചു. കായംകുളത്താണ് സംഭവം. കഴിഞ്ഞ ദിവസം രാത്രി എംഎസ്എം കോളജിനു സമീപമുള്ള സാബുവിന്റെ കാറിനാണ് തീപിടിച്ചത്. കാറില്‍ പുറത്തു പോയി വന്ന കുടുംബം കാറിൽ നിന്നും പുറത്തിറങ്ങിയ ഉടനെ മുൻവശത്തു നിന്നും തീ ആളിപ്പടരുകയായിരുന്നുവെന്നാണ് റിപ്പോര്‍ട്ടുകള്‍. തുടർന്ന് അഗ്നിശമന സേന എത്തി തീ അണയ്ക്കുകയായിരുന്നു. 

എന്നാല്‍ തീ പിടിക്കാന്‍ എന്താണു കാരണമെന്നറിയാതെ അധികൃതരും കുടുംബവും കുഴങ്ങുകയാണ്. രണ്ടു മാസം മുൻപ് ഒന്നാം കുറ്റിയിൽ റോഡരികിൽ നിർത്തിയ മറ്റൊരു കാറും സമാനമായ രീതിയിൽ തീപിടിച്ചു നശിച്ചിരുന്നതായി റിപ്പോര്‍ട്ടുകളുണ്ട്.