എസ്‍യുവി വാങ്ങാൻ പ്ലാനുണ്ടെങ്കിൽ ഒരാഴ്ച കാത്തിരിക്കൂ, എത്തുന്നത് രണ്ട് വമ്പന്മാ‍ർ

2025 ഏപ്രിലിൽ ഫോക്‌സ്‌വാഗൺ ടിഗ്വാൻ ആർ ലൈനും രണ്ടാം തലമുറ സ്കോഡ കൊഡിയാക്കും വിപണിയിലെത്തും. Tiguan R ലൈൻ അതിന്റെ കരുത്തുറ്റ എഞ്ചിനും സ്പോർട്ടി രൂപകൽപ്പനയും കൊണ്ട് ശ്രദ്ധേയമാണ്, അതേസമയം പുതിയ സ്കോഡ കൊഡിയാക് അത്യാധുനിക ഫീച്ചറുകളും മികച്ച മൈലേജും വാഗ്ദാനം ചെയ്യുന്നു.

2025 ഏപ്രിൽ മാസം വാഹനപ്രേമികൾക്ക് വളരെ ആവേശകരമായിരിക്കും. കാരണം നിരവധി ശ്രദ്ധേയമായ വാഹനങ്ങൾ നിരത്തിലിറങ്ങാൻ തയ്യാറാണ്. എസ്‌യുവി വിഭാഗത്തിൽ, ഫോക്‌സ്‌വാഗൺ, സ്‌കോഡ എന്നിവയിൽ നിന്ന് രണ്ട് പ്രധാന ലോഞ്ചുകൾ അണിനിരക്കുന്നു. ഏപ്രിൽ 14 ന് പെർഫോമൻസിനെ അടിസ്ഥാനമാക്കിയുള്ള ഫോക്‌സ്‌വാഗൺ ടിഗ്വാൻ ആർ ലൈൻ അവതരിപ്പിക്കും. തുടർന്ന് ഏപ്രിൽ 17 ന് രണ്ടാം തലമുറ സ്‌കോഡ കൊഡിയാക്കും എത്തും. വരാനിരിക്കുന്ന ഈ മുൻനിര എസ്‌യുവികളുടെ പ്രധാന വിശദാംശങ്ങൾ പരിശോധിക്കാം.

ഫോക്‌സ്‌വാഗൺ ടിഗ്വാൻ ആർ ലൈൻ
204bhp, 2.0L ടർബോ പെട്രോൾ എഞ്ചിൻ ഉൾക്കൊള്ളുന്ന, ടിഗുവാൻ എസ്‌യുവിയുടെ സ്‌പോർട്ടിയർ, പെർഫോമൻസ് ഫോക്കസ്ഡ് പതിപ്പാണ് ഫോക്‌സ്‌വാഗൺ ടിഗുവാൻ ആർ ലൈൻ . ഇത് പരമാവധി 320Nm ടോർക്ക് നൽകുന്നു. 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് ഗിയർബോക്‌സ് നാല് ചക്രങ്ങളിലേക്കും പവർ നൽകുന്നു. ടിഗുവാൻ ആർ ലൈൻ 7.1 സെക്കൻഡിനുള്ളിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കു. മണിക്കൂറിൽ 229 കിലോമീറ്റർ വേഗത കൈവരിക്കുന്നു.

ഒരു ഫ്ലാഗ്ഷിപ്പ് എസ്‌യുവി എന്ന നിലയിൽ, 10.3 ഇഞ്ച് ഓൾ ഡിജിറ്റൽ ഇൻസ്ട്രുമെന്റ് ക്ലസ്റ്റർ, 12.3 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 30 കളർ ആംബിയന്റ് ലൈറ്റിംഗ്, ട്രൈ-സോൺ ക്ലൈമറ്റ് കൺട്രോൾ, വയർലെസ് ചാർജിംഗ്, ആർ ലൈൻ ബ്രാൻഡിംഗുള്ള മുൻവശത്ത് സ്‌പോർട്‌സ് സീറ്റുകൾ, ക്രമീകരിക്കാവുന്ന ലംബർ സപ്പോർട്ട്, മസാജ് ഫംഗ്ഷണാലിറ്റി, രണ്ട് സ്മാർട്ട്‌ഫോണുകൾക്കുള്ള വയർലെസ് ചാർജിംഗ്, 9 എയർബാഗുകൾ, ഹിൽ സ്റ്റാർട്ട് അസിസ്റ്റ്, ഹിൽ ഡിസന്റ് കൺട്രോൾ, 21 ഫംഗ്ഷനുകളുള്ള ലെവൽ 2 ADAS തുടങ്ങിയ നിരവധി നൂതന സവിശേഷതകൾ നിറഞ്ഞ പ്രീമിയം ഇന്റീരിയർ ഫോക്സ്‍വാഗൻ ടിഗ്വാൻ ആർ ലൈൻ വാഗ്‍ദാനം ചെയ്യുന്നു. ഈ വാഹനത്തിന് പ്രതീക്ഷിക്കുന്ന വില  50 ലക്ഷം രൂപയാണ്.

പുതിയ സ്കോഡ കൊഡിയാക്
2025 സ്കോഡ കൊഡിയാക്ക് എൽ ആൻഡ് കെ (ലോറൻ, ക്ലെമെന്റ്), സ്പോർട്‍ലൈൻ എന്നിങ്ങനെ രണ്ട് വകഭേദങ്ങളിൽ ലഭ്യമാകും. 2.0L, 4-സിലിണ്ടർ ടർബോ പെട്രോൾ എഞ്ചിനാണ് ഇതിൽ പ്രവർത്തിക്കുന്നത്. ഈ മോട്ടോർ പരമാവധി 204bhp കരുത്തും 320Nm ടോർക്കും ഉത്പാദിപ്പിക്കുന്നു. 7-സ്പീഡ് ഡിസിടി ഓട്ടോമാറ്റിക് ഗിയർബോക്സും എഡബ്ല്യുഡി സിസ്റ്റവുമായി ജോടിയാക്കിയ ഈ എസ്‌യുവി 14.86 കിമി മൈലേജ് വാഗ്ദാനം ചെയ്യുന്നു.

10 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, 13 ഇഞ്ച് ഫ്രീ ഫ്ലോട്ടിംഗ് ടച്ച്‌സ്‌ക്രീൻ ഇൻഫോടെയ്ൻമെന്റ്, 'സ്കോഡ' ബാഡ്‍ജിംഗ് ഉള്ള പുതിയ രണ്ട്-സ്‌പോക്ക് സ്റ്റിയറിംഗ് വീൽ, പനോരമിക് സൺറൂഫ്, മൂന്ന്-സോൺ ക്ലൈമറ്റ് കൺട്രോൾ, എൽ & കെ ട്രിമ്മിൽ മസാജ് ഫംഗ്ഷനോടുകൂടിയ വെന്‍റിലേറ്റഡ് മുൻ സീറ്റുകൾ, പവർഡ് ഫ്രണ്ട് സീറ്റുകൾ, 360 ഡിഗ്രി ക്യാമറ, പാർക്ക് അസിസ്റ്റ് എന്നിവ ഈ പുതിയ സ്കോഡ എസ്‌യുവിയിൽ ഉൾപ്പെടുന്നു. 45 ലക്ഷം രൂപയാണ് ഈ വാഹനത്തിന് പ്രതീക്ഷിക്കുന്ന വില.