ഹ്യുണ്ടായിയുടെ ആഡംബര എസ്‌യുവി ഇന്ത്യയിലേക്ക്: പേറ്റന്റ് സ്വന്തമാക്കി ജെനസിസ് ജിവി90

ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായിയുടെ പ്രീമിയം ബ്രാൻഡായ ജെനസിസ് 2027ൽ ഇന്ത്യയിൽ അരങ്ങേറ്റം കുറിക്കാൻ ഒരുങ്ങുന്നു. ബ്രാൻഡിന്റെ മുൻനിര ആഡംബര എസ്‌യുവിയായ ജെനസിസ് ജിവി90ന് ഇന്ത്യയിൽ പേറ്റന്റ് ലഭിച്ചതായി റിപ്പോർട്ടുകൾ വ്യക്തമാക്കുന്നു.

ഇന്ത്യൻ ആഡംബര വാഹന വിപണിയിലേക്ക് ചുവടുവെക്കാൻ ഒരുങ്ങി ദക്ഷിണ കൊറിയൻ വാഹന നിർമാതാക്കളായ ഹ്യുണ്ടായി. കമ്പനിയുടെ പ്രീമിയം കാർ ബ്രാൻഡായ ജെനസിസ് 2027ൽ ഇന്ത്യയിൽ അരങ്ങേറ്റം കുറിക്കുമെന്ന് നേരത്തെ പ്രഖ്യാപിച്ചിരുന്നു. ഇതിന് പിന്നാലെ ബ്രാൻഡിന്റെ മുൻനിര ആഡംബര എസ്‌യുവിയായ ജെനസിസ് ജിവി90ന് ഇന്ത്യയിൽ പേറ്റന്റ് ലഭിച്ചിരിക്കുകയാണ്. ഇതോടെ വമ്പൻ ആഡംബര എസ്‌യുവിയുമായി ഇന്ത്യൻ വിപണിയിൽ പ്രവേശിക്കാനാണ് കമ്പനിയുടെ നീക്കമെന്ന സൂചന ശക്തമായി. എന്നാൽ വാഹനത്തിന്റെ ഇന്ത്യയിലെ ലോഞ്ച് തീയതി സംബന്ധിച്ച് ഔദ്യോഗിക പ്രഖ്യാപനം ഉണ്ടായിട്ടില്ല.

ജെനസിസിന്റെ ഏറ്റവും വലിയ ആഡംബര എസ്‌യുവി

ജെനസിസ് നിരയിലെ ഏറ്റവും വലുതും ആഡംബരപൂർണവുമായ എസ്‌യുവിയാണ് ജിവി90. 2026 ഓഗസ്റ്റിലാണ് വാഹനം ആഗോളതലത്തിൽ അവതരിപ്പിച്ചത്. സ്റ്റാൻഡേർഡ് പതിപ്പിനൊപ്പം കൂടുതൽ ആഡംബര സൗകര്യങ്ങളുള്ള നിയോലുൻ പതിപ്പും കമ്പനി പ്രദർശിപ്പിച്ചിരുന്നു. ഇന്ത്യയിൽ പേറ്റന്റ് നേടിയിരിക്കുന്നത് സ്റ്റാൻഡേർഡ് ജിവി90 മോഡലിനാണ്. പരമ്പരാഗത വാതിലുകളും മൂന്ന് നിര സീറ്റുകളുമായിരിക്കും ഇതിന്റെ പ്രധാന സവിശേഷതകൾ.

നിയോലുൻ പതിപ്പിൽ കമ്പനിയുടെ പ്രത്യേക ആർച്ച് ഗേറ്റ് ഡിസൈനിലുള്ള എതിർദിശയിൽ തുറക്കുന്ന വാതിലുകളാണ് നൽകിയിരിക്കുന്നത്. അളവുകളുടെ കാര്യത്തിലും വാഹനം വലുതാണ്. 5,285 എംഎം നീളവും 2,030 എംഎം വീതിയും 1,825 എംഎം ഉയരവുമാണ് ജിവി90നുള്ളത്. 3,245 എംഎം വീൽബേസും 224 എംഎം ഗ്രൗണ്ട് ക്ലിയറൻസുമുണ്ട്. സ്റ്റാൻഡേർഡ് പതിപ്പിൽ 22 ഇഞ്ച് വരെ വലുപ്പമുള്ള വീലുകൾ ലഭിക്കും. നിയോലുൻ പതിപ്പിൽ 24 ഇഞ്ച് വീലുകളും പ്രതീക്ഷിക്കാം.

എൽഇഡി ലൈറ്റിങ്ങും ആകർഷകമായ ഡിസൈനും

ജെനസിസിന്റെ സവിശേഷമായ ഡിസൈൻ ശൈലിയാണ് ജിവി90യിലും പിന്തുടരുന്നത്. വി ആകൃതിയിലുള്ള ലൈറ്റിങ് സിഗ്നേച്ചറോടുകൂടിയ നീളൻ എൽഇഡി ഡിആർഎല്ലുകളാണ് മുൻവശത്തെ പ്രധാന ആകർഷണം. ബ്രഷ്ഡ് മെറ്റാലിക് ഫിനിഷും വാഹനത്തിന് പ്രീമിയം രൂപം നൽകുന്നു. വശങ്ങളിലേക്ക് നോക്കിയാൽ വലിയ ബോഡി ഡിസൈനും വളഞ്ഞ പിൻ ഡി പില്ലറും ശ്രദ്ധേയമാണ്. പിന്നിൽ ടെയിൽഗേറ്റിനോട് ചേർന്ന രീതിയിലുള്ള നീളൻ എൽഇഡി ടെയിൽലൈറ്റുകളും മധ്യഭാഗത്തായി ജെനസിസ് ലോഗോയും നൽകിയിട്ടുണ്ട്.

24.6 ഇഞ്ച് ഒഎൽഇഡി സ്ക്രീൻ; ആഡംബര ഫീച്ചറുകൾ

മൂന്ന് നിര സീറ്റുകളുള്ള വിശാലമായ ക്യാബിനാണ് ജിവി90യുടെ മറ്റൊരു പ്രത്യേകത. 24.6 ഇഞ്ച് റോളിങ് ഒഎൽഇഡി ഇൻഫോടെയ്ൻമെന്റ് സ്ക്രീൻ, 25 ഇഞ്ച് ഹെഡ്-അപ്പ് ഡിസ്പ്ലേ, പ്ലിയോസ് കണക്ട് സംവിധാനം എന്നിവ വാഹനത്തിലുണ്ടാകും. 25 സ്പീക്കറുകളുള്ള ബാങ് ആൻഡ് ഒലുഫ്‌സെൻ ഓഡിയോ സിസ്റ്റം, റിമോട്ട് പാർക്കിങ് അസിസ്റ്റ് 3, റൂഫ് എയർബാഗുകൾ എന്നിവയും പ്രതീക്ഷിക്കുന്നു. മസാജ് സംവിധാനത്തോടുകൂടിയ ഹീറ്റഡ്, വെന്റിലേറ്റഡ് സീറ്റുകൾ, പിൻവശത്തെ വീലുകൾ തിരിക്കുന്ന സംവിധാനം എന്നിവയും ആഡംബര സൗകര്യങ്ങളുടെ ഭാഗമാണ്.

123.5 കിലോവാട്ട് അവർ ബാറ്ററി; 657 ബിഎച്ച്പി കരുത്ത്

ഹ്യുണ്ടായിയുടെ ഇഎംപി ഹൈ വോൾട്ടേജ് പ്ലാറ്റ്‌ഫോമിലാണ് ജെനസിസ് ജിവി90 നിർമിച്ചിരിക്കുന്നത്. 123.5 കിലോവാട്ട് അവർ ബാറ്ററി പായ്ക്കാണ് വാഹനത്തിലുള്ളത്. ഒറ്റ ചാർജിൽ ഏകദേശം 500 കിലോമീറ്റർ റേഞ്ച് ലഭിക്കുമെന്നാണ് പ്രതീക്ഷ. 350 കിലോവാട്ട് ഡിസി ഫാസ്റ്റ് ചാർജിങ് സംവിധാനവും വാഹനത്തിലുണ്ട്. ഡ്യുവൽ മോട്ടോർ ഓൾ വീൽ ഡ്രൈവ് സംവിധാനമാണ് കരുത്തേകുന്നത്. പരമാവധി 657 ബിഎച്ച്പി പവറും 800 എൻഎം ടോർക്കും ഉത്പാദിപ്പിക്കാൻ ഈ സംവിധാനത്തിന് കഴിയും.

വിലയും എതിരാളികളും

ദക്ഷിണ കൊറിയയിൽ സ്റ്റാൻഡേർഡ് ജെനസിസ് ജിവി90യുടെ വില 13.95 കോടി കൊറിയൻ വോൺ മുതലാണ്. ഇന്ത്യൻ രൂപയിൽ ഏകദേശം 97.97 ലക്ഷം രൂപയാണിത്. കൂടുതൽ ആഡംബര സൗകര്യങ്ങളുള്ള നിയോലുൻ പതിപ്പിന് 18.99 കോടി കൊറിയൻ വോൺ, അതായത് ഏകദേശം 1.33 കോടി രൂപ മുതലാണ് വില. എന്നാൽ ഇന്ത്യയിലെ വില സംബന്ധിച്ച് കമ്പനി ഇതുവരെ വിവരങ്ങൾ പുറത്തുവിട്ടിട്ടില്ല. ആഗോള വിപണിയിൽ മെഴ്‌സിഡസ് ബെൻസ് ജിഎൽഎസ്, ബിഎംഡബ്ല്യു എക്സ്7, ഓഡി ക്യു9 തുടങ്ങിയ ആഡംബര എസ്‌യുവികളുമായിട്ടായിരിക്കും ജെനസിസ് ജിവി90യുടെ മത്സരം. 2027ൽ ബ്രാൻഡ് ഇന്ത്യയിലെത്തുന്നതോടെ രാജ്യത്തെ ആഡംബര ഇലക്ട്രിക് എസ്‌യുവി വിപണിയിലും പുതിയൊരു മത്സരം പ്രതീക്ഷിക്കാം.