2027ൽ ഇന്ത്യൻ വിപണിയിൽ എത്തുന്ന മൂന്ന് കോംപാക്ട് എസ്‌യുവികളെക്കുറിച്ചുള്ള വിവരങ്ങൾ. മഹീന്ദ്ര വിഷൻ എസ്, ടാറ്റ നെക്‌സോൺ, കിയ സോണറ്റ് എന്നിവ പുതിയ ഡിസൈനിലും സാങ്കേതികവിദ്യയിലും വിപണിയിലെത്തും. ഈ മോഡലുകൾ എസ്‌യുവി വിഭാഗത്തിലെ മത്സരം ശക്തമാക്കും.
ഇന്ത്യൻ വാഹന വിപണിയിൽ കോംപാക്ട് എസ്‌യുവി വിഭാഗത്തിൽ 2027ൽ വൻ മാറ്റങ്ങൾക്ക് സാധ്യത. ടാറ്റ മോട്ടോഴ്‌സ്, കിയ, മഹീന്ദ്ര എന്നീ പ്രമുഖ വാഹന നിർമാതാക്കൾ മൂന്ന് പുതിയ എസ്‌യുവികൾ അവതരിപ്പിക്കാനുള്ള ഒരുക്കത്തിലാണ്. അടുത്ത തലമുറ ടാറ്റ നെക്‌സോൺ, രണ്ടാം തലമുറ കിയ സോണറ്റ്, മഹീന്ദ്രയുടെ പുതിയ വിഷൻ എസ് എന്നിവയാണ് വിപണിയിലെത്താൻ ഒരുങ്ങുന്നത്. 2027ന്റെ ആദ്യ പകുതിയിൽ ഈ മൂന്ന് മോഡലുകളും അരങ്ങേറ്റം കുറിക്കുമെന്നാണ് പ്രതീക്ഷിക്കുന്നത്. പുതിയ ഡിസൈൻ, ആധുനിക സാങ്കേതികവിദ്യ, പരിഷ്കരിച്ച പ്ലാറ്റ്‌ഫോം എന്നിവയുമായി എത്തുന്ന വാഹനങ്ങൾ ഈ വിഭാഗത്തിലെ മത്സരം കൂടുതൽ ശക്തമാക്കും.
അടുത്ത തലമുറ ടാറ്റ നെക്‌സോൺ
ടാറ്റ മോട്ടോഴ്‌സിന്റെ പുതിയ തലമുറ നെക്‌സോൺ വികസിപ്പിക്കുന്നത് പ്രോജക്ട് ഗരുഡ് എന്ന രഹസ്യനാമത്തിലാണ്. 2027 ഓട്ടോ എക്‌സ്‌പോയിൽ വാഹനം അവതരിപ്പിക്കുമെന്നും അതേ വർഷം മധ്യത്തോടെ വിൽപ്പന ആരംഭിക്കുമെന്നുമാണ് റിപ്പോർട്ടുകൾ. എട്ട് ലക്ഷം രൂപ മുതൽ 17 ലക്ഷം രൂപ വരെയായിരിക്കും പ്രതീക്ഷിക്കുന്ന എക്സ്-ഷോറൂം വില.
നിലവിലെ മോഡലിനെ അപേക്ഷിച്ച് ഡിസൈനിലും പ്ലാറ്റ്‌ഫോമിലും കാര്യമായ മാറ്റങ്ങൾ പുതിയ നെക്‌സോണിലുണ്ടാകും. നിലവിലെ എക്സ്1 പ്ലാറ്റ്‌ഫോമിന് പകരം കർവ്വിൽ ഉപയോഗിക്കുന്ന അറ്റ്‌ലസ് ആർക്കിടെക്ചറിലായിരിക്കും പുതിയ മോഡൽ നിർമിക്കുകയെന്നാണ് സൂചന. പുതിയ എൽഇഡി ലൈറ്റുകൾ, പരിഷ്കരിച്ച ബമ്പറുകൾ, കൂടുതൽ ആധുനികമായ ഡാഷ്‌ബോർഡ് എന്നിവയും പ്രതീക്ഷിക്കുന്നു. 1.2 ലിറ്റർ ടർബോ പെട്രോൾ, 1.5 ലിറ്റർ ഡീസൽ എൻജിനുകൾ തുടർന്നേക്കും. ഫാക്ടറി ഘടിപ്പിച്ച ഇരട്ട സിലിണ്ടർ സിഎൻജി സംവിധാനവും പുതിയ മോഡലിൽ ലഭിച്ചേക്കും. സിഎൻജി പതിപ്പിൽ എഎംടി ഗിയർബോക്‌സ് നൽകാനും സാധ്യതയുണ്ട്.
Related Articles
രണ്ടാം തലമുറ കിയ സോണറ്റ്
പുതിയ തലമുറ സോണറ്റുമായി കിയയും വിപണിയിൽ എത്തും. 2027ന്റെ ആദ്യ പാദത്തിൽ അവതരിപ്പിക്കുമെന്ന് പ്രതീക്ഷിക്കുന്ന വാഹനത്തിന് എട്ട് ലക്ഷം മുതൽ 17 ലക്ഷം രൂപ വരെയായിരിക്കും പ്രതീക്ഷിക്കുന്ന എക്സ്-ഷോറൂം വില. നിലവിലെ സോണറ്റിലെ പിൻസീറ്റ് യാത്രക്കാർക്കുള്ള പരിമിതമായ ലെഗ്‌റൂമും കുറഞ്ഞ ബൂട്ട് സ്പേസും പരിഹരിക്കുന്നതിനായിരിക്കും പുതിയ മോഡലിൽ പ്രധാന പരിഗണന. പരിഷ്കരിച്ച കെ1 പ്ലാറ്റ്‌ഫോമിലായിരിക്കും വാഹനം നിർമിക്കുക.
കിയ സൈറോസിൽ നിന്നും പുതിയ സെൽറ്റോസിൽ നിന്നും പ്രചോദനം ഉൾക്കൊണ്ടായിരിക്കും ഇന്റീരിയർ. 12.3 ഇഞ്ച് ടച്ച്‌സ്‌ക്രീനും 12.3 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേയും ഉൾപ്പെടുന്ന ഇരട്ട സ്‌ക്രീൻ സംവിധാനം പ്രതീക്ഷിക്കുന്നു. ഓവർ ദി എയർ അപ്‌ഡേറ്റുകൾ, ആറ് എയർബാഗുകൾ, ക്യാമറയോടുകൂടിയ റഡാർ അധിഷ്ഠിത ലെവൽ 2 എഡിഎഎസ് സംവിധാനവും ലഭിച്ചേക്കും. 1.2 ലിറ്റർ നാച്ചുറലി ആസ്പിറേറ്റഡ് പെട്രോൾ, 1.0 ലിറ്റർ ടർബോ പെട്രോൾ, 1.5 ലിറ്റർ ടർബോ ഡീസൽ എൻജിനുകൾ തുടരുമെന്നാണ് സൂചന. സിഎൻജി പതിപ്പിനും സാധ്യതയുണ്ട്. 2028ഓടെ ഹൈബ്രിഡ് പതിപ്പും അവതരിപ്പിച്ചേക്കും.
മഹീന്ദ്രയുടെ മിനി സ്‌കോർപിയോ; വിഷൻ എസ്
മഹീന്ദ്രയുടെ വിഷൻ എസ് കൺസെപ്റ്റിനെ അടിസ്ഥാനമാക്കിയുള്ള പുതിയ എസ്‌യുവിയും 2027ൽ വിപണിയിലെത്തുമെന്നാണ് പ്രതീക്ഷ. 2027 ജനുവരി, ഫെബ്രുവരി മാസങ്ങളിൽ വാഹനം അവതരിപ്പിച്ചേക്കും. എട്ട് ലക്ഷം മുതൽ 15 ലക്ഷം രൂപ വരെയാണ് പ്രതീക്ഷിക്കുന്ന എക്സ്-ഷോറൂം വില.
ബോക്‌സി രൂപകൽപ്പനയും കരുത്തുറ്റ എസ്‌യുവി ശൈലിയുമായിരിക്കും വാഹനത്തിന്റെ പ്രധാന ആകർഷണം. സ്‌കോർപിയോ കുടുംബത്തിലെ ഏറ്റവും ചെറിയ മോഡലാകുമെന്നതിനാൽ മിനി സ്‌കോർപിയോ എന്ന വിശേഷണവും ഇതിനകം ലഭിച്ചിട്ടുണ്ട്. മഹീന്ദ്രയുടെ പുതിയ എൻയുഐക്യു മോണോകോക്ക് പ്ലാറ്റ്‌ഫോമിൽ നിർമിക്കുന്ന ആദ്യ എസ്‌യുവിയായിരിക്കും ഇത്. 2,665 മില്ലിമീറ്റർ വീൽബേസാണ് മറ്റൊരു പ്രത്യേകത. ഈ വിഭാഗത്തിലെ ഏറ്റവും നീളം കൂടിയ വീൽബേസുകളിലൊന്നായ ഇത് അകത്തളത്തിൽ കൂടുതൽ സ്ഥലസൗകര്യവും മികച്ച ലെഗ്‌റൂമും ഉറപ്പാക്കുമെന്നാണ് പ്രതീക്ഷ.
പുറത്തുവന്ന പരീക്ഷണ ചിത്രങ്ങളിൽ ഉയർന്ന ബോഡി ഡിസൈൻ, വീതിയേറിയ വീൽ ആർച്ചുകൾ, ക്ലാംഷെൽ ബോണറ്റ് എന്നിവ കാണാം. അകത്തളത്തിൽ ഇരട്ട ഡിസ്‌പ്ലേ സംവിധാനവും പനോരമിക് സൺറൂഫും പ്രതീക്ഷിക്കുന്നു. പെട്രോൾ, ഡീസൽ, പൂർണ ഇലക്ട്രിക് പവർട്രെയിനുകളെ പിന്തുണയ്ക്കുന്നതാണ് പുതിയ പ്ലാറ്റ്‌ഫോം. എന്നാൽ പ്രൊഡക്ഷൻ പതിപ്പിൽ ലഭ്യമാകുന്ന എൻജിൻ ഓപ്ഷനുകളെക്കുറിച്ചുള്ള ഔദ്യോഗിക വിവരങ്ങൾ പുറത്തുവന്നിട്ടില്ല.
മത്സരം കടുക്കും
ടാറ്റ നെക്‌സോൺ, കിയ സോണറ്റ്, മഹീന്ദ്ര വിഷൻ എസ് എന്നീ മൂന്ന് മോഡലുകളും എത്തുന്നതോടെ നാല് മീറ്ററിൽ താഴെയുള്ള എസ്‌യുവി വിഭാഗത്തിൽ മത്സരം കൂടുതൽ കടുക്കും. പുതിയ സാങ്കേതികവിദ്യകളും കൂടുതൽ സൗകര്യങ്ങളും വ്യത്യസ്ത എൻജിൻ ഓപ്ഷനുകളും അവതരിപ്പിക്കാനുള്ള കമ്പനികളുടെ നീക്കം ഉപഭോക്താക്കൾക്കും നേട്ടമാകും.
