മഹീന്ദ്ര മരാസോയുടെ വിൽപ്പനയിൽ കുതിച്ചുചാട്ടം

കഴിഞ്ഞ ജൂലൈ മാസത്തിൽ മഹീന്ദ്ര മരാസോ 176 യൂണിറ്റുകൾ വിറ്റഴിച്ചു, ഇത് 1,157% വാർഷിക വളർച്ചയെ പ്രതിനിധീകരിക്കുന്നു.

കഴിഞ്ഞ കുറച്ച് മാസങ്ങളായി മഹീന്ദ്ര ആൻഡ് മഹീന്ദ്രയുടെ വിൽപ്പനയിൽ വൻ കുതിച്ചുചാട്ടമാണ് ഉണ്ടായത്. സ്കോർപിയോ മുതൽ ഥാർ, ബൊലേറോ വരെയുള്ള എല്ലാ മോഡലുകൾക്കും വൻ ഡിമാൻഡുണ്ട്. എങ്കിലും, കഴിഞ്ഞ രണ്ട് വർഷമായി വിൽപ്പന ഏതാണ്ട് നിലച്ച ഒരു മോഡൽ മഹീന്ദ്രയുടെ വാഹന നിരയിൽ ഉണ്ട്. കമ്പനിയുടെ 7 സീറ്റർ മരാസോ എംപിവി ആണ് ഈ കാർ. ഈ മോഡൽ കമ്പനിയെ സംബന്ധിച്ച് ഒരു പരാജയമായിരുന്നു. മരാസോയുടെ വിരലിൽ എണ്ണാവുന്ന യൂണിറ്റുകൾ വിറ്റഴിച്ച ചില മാസങ്ങളുണ്ടായിരുന്നു. എങ്കിലും, കഴിഞ്ഞ മാസം അതായത് ജൂലൈയിൽ, ഈ കാർ രണ്ട് വർഷത്തിനിടയിലെ മികച്ച വിൽപ്പന നേടി. മരാസോ എംപിവിയുടെ 176 യൂണിറ്റുകൾ കഴിഞ്ഞ മാസം വിറ്റു. ഇത് 1,157 ശതമാനം വാർഷിക വളർച്ചയും 935 ശതമാനം പ്രതിമാസ വളർച്ചയുമാണ്. 2024 ജൂലൈയിൽ മരാസോയുടെ 14 യൂണിറ്റുകൾ മാത്രമേ വിറ്റഴിക്കപ്പെട്ടിട്ടുള്ളൂ. അതേസമയം 2025 ജൂണിൽ 17 യൂണിറ്റായിരുന്നു വിൽപ്പന.

ജൂലൈയിൽ കമ്പനി ആദ്യമായി ഈ കാറിന് രണ്ടുലക്ഷം രൂപയുടെ കിഴിവ് നൽകിയിരുന്നു. നേരത്തെ, കമ്പനി ഈ കാറിന് ഏകദേശം 50,000 രൂപയുടെ കിഴിവ് നൽകിയിരുന്നു. അതുകൊണ്ടാകാം വിൽപ്പന പെട്ടെന്ന് വർദ്ധിച്ചത് എന്നാണ് റിപ്പോ‍ട്ടുകൾ. 14.59 ലക്ഷം മുതൽ 17 ലക്ഷം രൂപ വരെയാണ് മരാസോയുടെ എക്സ്-ഷോറൂം വില. ഏഴ്, എട്ട് സീറ്റർ മോഡലുകളിൽ മരാസോ വാങ്ങാം.

2025 സാമ്പത്തിക വർഷത്തിൽ മഹീന്ദ്രയുടെ ഏറ്റവും കുറഞ്ഞ വിൽപ്പനയുള്ള കാർ മരാസോ ആയിരുന്നു. 166 യൂണിറ്റുകൾ മാത്രമേ വിറ്റഴിക്കപ്പെട്ടുള്ളൂ. മറാസോയുടെ വിൽപ്പന മോശമായിരുന്നിട്ടും, കമ്പനി അത് വിൽപ്പന തുടർന്നു. ഇന്ത്യൻ വിപണിയിൽ, മാരുതി എർട്ടിഗ, ടൊയോട്ട ഇന്നോവ, കിയ കാരെൻസ് തുടങ്ങിയ മോഡലുകളുമായി ഇത് മത്സരിക്കുന്നു. എങ്കിലും, വിൽപ്പനയുടെ കാര്യത്തിൽ, സെഗ്‌മെന്റിലെ ഏറ്റവും വിലകുറഞ്ഞ റെനോ ട്രൈബർ എംപിവിക്ക് പിന്നിലാണ് മരാസോയുടെ സ്ഥാനം.

1.5 ലിറ്റർ ഡീസൽ എഞ്ചിനാണ് മരാസോയുടെ ഹൃദയം. ഈ എഞ്ചിൻ 121 കുതിരശക്തിയും 300 ന്യൂട്ടൺ മീറ്റർ ടോർക്കും ഉത്പാദിപ്പിക്കുന്നു. ഇതിന് 6 സ്പീഡ് ഗിയർബോക്സുണ്ട്. ഈ കാറിന്റെ എല്ലാ വകഭേദങ്ങളിലും എയർബാഗുകൾ, എബിഎസ്, ഇബിഡി, സുരക്ഷയ്ക്കായി റിയർ പാർക്കിംഗ് സെൻസർ തുടങ്ങിയ സവിശേഷതകൾ ഉണ്ടായിരിക്കും. ഇതിന്റെ സവിശേഷതകളെക്കുറിച്ച് പറയുകയാണെങ്കിൽ, 7.0 ഇഞ്ച് ഇൻഫോടെയ്ൻമെന്റ് സിസ്റ്റം (ആൻഡ്രോയിഡ് ഓട്ടോ, ആപ്പിൾ കാർപ്ലേ കണക്റ്റിവിറ്റിയോടൊപ്പം), റിമോട്ട് കീലെസ് എൻട്രി, ഓട്ടോ ക്ലൈമറ്റ് കൺട്രോൾ, സെൻട്രൽ എസി, 17 ഇഞ്ച് അലോയി വീലുകൾ തുടങ്ങിയ സവിശേഷതകൾ മരാസോയിൽ ലഭിക്കുന്നു.