മികച്ച മൈലേജും വമ്പൻ ഡിക്കി സ്‍പേസും; മാരുതി ഫ്രോങ്ക്‌സ് ഇപ്പോൾ വലിയ വിലക്കിഴിവിൽ വാങ്ങാം

മാരുതി സുസുക്കി ഫ്രോങ്ക്‌സ് എസ്‌യുവിയിൽ ജൂലൈയിൽ 93,000 രൂപ വരെ കിഴിവ് ലഭ്യമാണ്. ടർബോ വേരിയന്റിൽ 43,000 രൂപ വിലവരുന്ന ആക്‌സസറികളും ക്യാഷ്, എക്‌സ്‌ചേഞ്ച് ആനുകൂല്യങ്ങളും ലഭിക്കും. മറ്റ് വേരിയന്റുകളിലും ആകർഷകമായ കിഴിവുകൾ ലഭ്യമാണ്.

മാരുതി സുസുക്കിയുടെ പോർട്ട്‌ഫോളിയോയിൽ, നെക്‌സ ഡീലർഷിപ്പുകളിൽ വിൽക്കുന്ന ഫ്രോങ്ക്സ് എസ്‌യുവി വളരെ വേഗത്തിൽ സൂപ്പർഹിറ്റായി മാറി. തുടക്കത്തിൽ, ഈ എസ്‌യുവിയിൽ കമ്പനി ഒരു കിഴിവും വാഗ്ദാനം ചെയ്തിരുന്നില്ല.എന്നാൽ ഇപ്പോൾ ഇത് മികച്ച കിഴിവുകളോടെ വാങ്ങാം. ജൂലൈയിൽ ഈ കാറിൽ കമ്പനി 93,000 രൂപയുടെ വലിയ കിഴിവ് വാഗ്ദാനം ചെയ്യുന്നു. ഫ്രോങ്ക്‌സ് ടർബോ വേരിയന്റിന് 43,000 രൂപ വിലവരുന്ന വെലോസിറ്റി എഡിഷൻ ആക്‌സസറികളും ക്യാഷ്, എക്‌സ്‌ചേഞ്ച്/സ്ക്രാപ്പ് എന്നിവയും ലഭിക്കുന്നു. ഇതുമൂലം പരമാവധി 93,000 രൂപ കിഴിവ് ലഭിക്കുന്നു. അതേസമയം 1.2 ലിറ്റർ നാച്ചുറലി ആസ്പിറേറ്റഡ് എഞ്ചിൻ, എഎംടി ഗിയർബോക്‌സ് വേരിയന്റിൽ 45,000 രൂപ വരെ ആനുകൂല്യങ്ങൾ ലഭ്യമാകും. മിഡ്-സ്പെക്ക് ട്രിമ്മുകളിൽ 32,000 രൂപയും സിഎൻജി വേരിയന്റുകളിൽ 15,000 രൂപയും ആനുകൂല്യങ്ങൾ ലഭ്യമാകും.

മാരുതി സുസുക്കി ഫ്രോങ്ക്‌സിന് 1.0 ലിറ്റർ ടർബോ ബൂസ്റ്റർജെറ്റ് എഞ്ചിനാണുള്ളത്. ഇത് 5.3 സെക്കൻഡിനുള്ളിൽ 0 മുതൽ 60 കിലോമീറ്റർ വേഗത കൈവരിക്കും. ഇതിനുപുറമെ, ഇതിന് നൂതനമായ 1.2 ലിറ്റർ കെ-സീരീസ്, ഡ്യുവൽ ജെറ്റ്, ഡ്യുവൽ വിവിടി എഞ്ചിനുമുണ്ട്. ഈ എഞ്ചിൻ സ്മാർട്ട് ഹൈബ്രിഡ് സാങ്കേതികവിദ്യയോടെയാണ് വരുന്നത്. പാഡിൽ ഷിഫ്റ്ററുകളുള്ള 6-സ്പീഡ് ഓട്ടോമാറ്റിക് ട്രാൻസ്മിഷനുമായി ഈ എഞ്ചിൻ ഘടിപ്പിച്ചിരിക്കുന്നു. ഓട്ടോ ഗിയർ ഷിഫ്റ്റ് ഓപ്ഷനും ഇതിലുണ്ട്. 22.89 കിലോമീറ്റർ/ലിറ്റർ ആണ് ഇതിന്‍റെ മൈലേജ്. മാരുതി ഫ്രോങ്ക്‌സിന്റെ നീളം 3995 എംഎം ആണ്. വീതി 1765 എംഎമ്മും ഉയരം 1550 എംഎമ്മും ആണ്. 2520 എംഎം ആണ് വീൽബേസ്. 308 ലിറ്റർ ബൂട്ട് സ്‌പേസാണ് ഈ കാറിന് ഉള്ളത്.

ഹെഡ്-അപ്പ് ഡിസ്‌പ്ലേ, ക്രൂയിസ് കൺട്രോൾ, ലെതർ പൊതിഞ്ഞ സ്റ്റിയറിംഗ് വീൽ, 16 ഇഞ്ച് ഡയമണ്ട് കട്ട് അലോയ് വീലുകൾ, ഡ്യുവൽ-ടോൺ എക്സ്റ്റീരിയർ കളർ, വയർലെസ് ചാർജർ, വയർലെസ് സ്മാർട്ട്‌ഫോൺ കണക്റ്റിവിറ്റിയുള്ള ഇൻഫോടെയ്ൻമെന്റ് സിസ്റ്റം, 6-സ്പീക്കർ സൗണ്ട് സിസ്റ്റം, ഇൻസ്ട്രുമെന്റ് ക്ലസ്റ്ററിലെ നിറമുള്ള എംഐഡി, ഉയരം ക്രമീകരിക്കാവുന്ന ഡ്രൈവർ സീറ്റ്, പിൻ എസി വെന്‍റുകൾ, വേഗതയേറിയ യുഎസ്ബി ചാർജിംഗ് പോയിന്റ്, കണക്റ്റഡ് കാർ സവിശേഷതകൾ, റിയർ വ്യൂ ക്യാമറ, 9 ഇഞ്ച് ടച്ച്‌സ്‌ക്രീൻ തുടങ്ങിയ സവിശേഷതകൾ ഇതിലുണ്ടാകും. ഇത് ആൻഡ്രോയിഡ് ഓട്ടോ, ആപ്പിൾ കാർപ്ലേ എന്നിവയെ പിന്തുണയ്ക്കും.

സുരക്ഷയ്ക്കായി, സൈഡ്, കർട്ടൻ എയർബാഗുകൾ ഉള്ള ഡ്യുവൽ എയർബാഗുകൾ, റിയർ വ്യൂ ക്യാമറ, ഹിൽ ഹോൾഡ് അസിസ്റ്റ്, ഇലക്ട്രോണിക് സ്റ്റെബിലിറ്റി പ്രോഗ്രാം, റിവേഴ്‌സ് പാർക്കിംഗ് സെൻസർ, 3-പോയിന്‍റ് ഇഎൽആർ സീറ്റ് ബെൽറ്റ്, റിയർ ഡീഫോഗർ, ആന്റി-തെഫ്റ്റ് സെക്യൂരിറ്റി സിസ്റ്റം, ഐസോഫിക്സ് ചൈൽഡ് സീറ്റ് തുടങ്ങിയ സവിശേഷതകൾ ഇതിലുണ്ട്. അതേസമയം, ഡ്യുവൽ എയർബാഗുകൾ, EBD ഉള്ള ABS, ESP, ഹിൽ-ഹോൾഡ് അസിസ്റ്റ്, റിയർ പാർക്കിംഗ് സെൻസർ, ലോഡ്-ലിമിറ്ററുള്ള സീറ്റ് ബെൽറ്റ് പ്രീ-ടെൻഷനർ, സീറ്റ് ബെൽറ്റ് റിമൈൻഡർ സിസ്റ്റം, ഐസോഫിക്സ് ചൈൽഡ് സീറ്റ് ആങ്കറേജ് പോയിന്റ്, സ്പീഡ് അലേർട്ട് തുടങ്ങിയ സുരക്ഷാ സവിശേഷതകൾ സ്റ്റാൻഡേർഡായി നൽകിയിട്ടുണ്ട്. ഇതിനുപുറമെ, 360-ഡിഗ്രി ക്യാമറ, സൈഡ്, കർട്ടൻ എയർബാഗുകൾ, റിവേഴ്‌സ് പാർക്കിംഗ് ക്യാമറ, ഓട്ടോ-ഡിമ്മിംഗ് ഐആർവിഎം തുടങ്ങിയ ഫീച്ചറുകൾ തിരഞ്ഞെടുത്ത വേരിയന്റുകളിൽ ലഭ്യമാണ്.