ഹീറോയെ മലർത്തിയടിച്ച് ഹോണ്ട, ജൂലൈയിൽ ചരിത്ര നേട്ടം, വിറ്റത് 5.15 ലക്ഷം ടൂവീലറുകൾ

2025 ജൂലൈയിൽ 5.15 ലക്ഷം യൂണിറ്റുകൾ വിറ്റഴിച്ച് ഹോണ്ട ഇന്ത്യ രാജ്യത്തെ ഒന്നാം നമ്പർ ഇരുചക്ര വാഹന ബ്രാൻഡായി. ഹീറോ മോട്ടോകോർപ്പിനെ മറികടന്നാണ് ഈ നേട്ടം. പുതിയ മോഡലുകളും സിഎസ്ആർ പ്രവർത്തനങ്ങളും ഈ വളർച്ചയ്ക്ക് കാരണമായി.

2025 ജൂലൈ മാസം ടൂവീലർ വിൽപ്പന കണക്കുകൾ പുറത്തുവരുമ്പോൾ ജനപ്രിയ ജാപ്പനീസ് ബ്രാൻഡായ ഹോണ്ട മോട്ടോർസൈക്കിൾ ആൻഡ് സ്‍കൂട്ടർ ഇന്ത്യ (HMSI) വിൽപ്പനയിൽ പുതിയൊരു ചരിത്രം കുറിച്ചു . ഈ മാസം 5.15 ലക്ഷം യൂണിറ്റുകൾ വിറ്റഴിച്ച് ഹീറോ മോട്ടോകോർപ്പിനെ മറികടന്ന് ഹോണ്ട രാജ്യത്തെ നമ്പർ വൺ ഇരുചക്ര വാഹന ബ്രാൻഡായി മാറി. ഇതിൽ ആഭ്യന്തര വിൽപ്പനയിൽ 4,66,331 യൂണിറ്റുകളും കയറ്റുമതിയിൽ 49,047 യൂണിറ്റുകളും ഉൾപ്പെടുന്നു. 2025 ജൂണിനെ അപേക്ഷിച്ച് കമ്പനി പ്രതിമാസം 20 ശതമാനം വളർച്ച രേഖപ്പെടുത്തി. കഴിഞ്ഞ മാസം, ഹീറോയുടെ 4,49,755 യൂണിറ്റുകൾ മാത്രമാണ് വിറ്റഴിച്ചത്.

2025 ഏപ്രിൽ-ജൂലൈ കാലയളവിൽ കമ്പനിയുടെ മൊത്തം വിൽപ്പന 18,88,242 യൂണിറ്റുകളായി. ആഭ്യന്തര വിപണിയിൽ 16,93,036 യൂണിറ്റുകൾ വിറ്റഴിക്കുകയും 1,95,206 യൂണിറ്റുകൾ കയറ്റുമതി ചെയ്യുകയും ചെയ്തു. ഇന്ത്യയിൽ 25 -ആം വാർഷികത്തോടനുബന്ധിച്ച് ഹോണ്ട രണ്ട് പുതിയ ബൈക്കുകൾ പുറത്തിറക്കി. നഗര ഉപഭോക്താക്കൾക്കായി സ്ട്രീറ്റ് സ്റ്റൈൽ ബൈക്ക് CB125 ഹോർനെറ്റ്, ശക്തമായ പ്രകടനവും പ്രീമിയം ലുക്കും ഉള്ള ഷൈൻ 100 ഡീലക്സ് (DX) തുടങ്ങിയ മോഡലുകൾ ഇതിൽ ഉൾപ്പെടുന്നു. ഹോണ്ടയുടെ ജനപ്രിയ ഷൈൻ 100 ന്റെ പുതുക്കിയ പതിപ്പാണിത്. ഇത് താങ്ങാനാവുന്നതും ശക്തവുമാണ്. മാത്രമല്ല മികച്ച മൈലേജും വാഗ്‍ദാനം ചെയ്യുന്നു.

ജൂലൈയിൽ, യുവ റൈഡർമാരുടെ ഗതാഗത വിദ്യാഭ്യാസത്തിൽ ശ്രദ്ധ കേന്ദ്രീകരിച്ച് 13 നഗരങ്ങളിലായി എച്ച്എംഎസ്ഐ റോഡ് സുരക്ഷാ അവബോധ കാമ്പെയിനുകൾ നടത്തി. സുരക്ഷിതമായ റോഡ് പെരുമാറ്റം പ്രോത്സാഹിപ്പിക്കുന്നതിനായി ലുധിയാനയിലെ ട്രാഫിക് പരിശീലന പാർക്കിന്റെ ഒമ്പതാം വാർഷികവും കമ്പനി ആഘോഷിച്ചു. സിഎസ്ആർ വിഭാഗത്തിലൂടെ, ഹോണ്ട ഇന്ത്യ ഫൗണ്ടേഷൻ മിസോറാമിൽ പ്രോജക്റ്റ് ബുനിയാദിന്റെ പ്രവർത്തനങ്ങൾ തുടരുകയും സംസ്ഥാനത്തിന്റെ നൈപുണ്യ വികസന വകുപ്പുമായി ഒരു ധാരണാപത്രത്തിൽ ഒപ്പുവെക്കുകയും ചെയ്തുകൊണ്ട് സിക്കിമിൽ ഈ സംരംഭത്തിന് തുടക്കം കുറിക്കുകയും ചെയ്തു. ലോകബാങ്കിന്റെ പിന്തുണയുള്ള സിക്കിം ഇൻസ്പയർസ് പ്രോഗ്രാമിന് കീഴിൽ ഡിജിറ്റൽ വിദ്യാഭ്യാസവും തൊഴിൽ പരിശീലനവും ശക്തിപ്പെടുത്തുന്നതിനാണ് ഈ ശ്രമങ്ങൾ ലക്ഷ്യമിടുന്നത്.