ഹോണ്ടയുടെ ഷോക്ക്; ഈ രണ്ട് ടൂവീലറുകളുടെ വിൽപ്പന അവസാനിപ്പിച്ചു

ജാപ്പനീസ് വാഹന നിർമ്മാതാക്കളായ ഹോണ്ട തങ്ങളുടെ CBR1000RR-R ഫയർബ്ലേഡ് എസ്‍പി, റെബൽ 500 എന്നീ പ്രീമിയം മോട്ടോർസൈക്കിളുകൾ ഇന്ത്യൻ വെബ്സൈറ്റിൽ നിന്ന് നീക്കം ചെയ്തു. ഇന്ത്യയ്ക്കായി അനുവദിച്ച പരിമിതമായ യൂണിറ്റുകൾ വിറ്റുതീർന്നതാകാം ഇതിന് കാരണമെന്നാണ് സൂചന.

ഇന്ത്യൻ ഉപഭോക്താക്കളെ അമ്പരപ്പിച്ച് ജാപ്പനീസ് ടൂവീലർ ബ്രാൻഡായ ഹോണ്ട. കമ്പനി തങ്ങളുടെ ഔദ്യോഗിക വെബ്‌സൈറ്റിൽ നിന്ന് CBR1000RR-R ഫയർബ്ലേഡ് എസ്‍പി, റെബൽ 500 എന്നിവ നീക്കം ചെയ്‍തു. CBR1000RR-R ഫയർബ്ലേഡ് മുമ്പ് ഇന്ത്യയിൽ വിൽപ്പനയ്ക്കുണ്ടായിരുന്നു, ഹോണ്ട അടുത്തിടെ അതിന്റെ ഉയർന്ന-സ്പെക്ക് 'SP' അവതാരത്തിൽ അത് വീണ്ടും അവതരിപ്പിച്ചു. പക്ഷേ കമ്പനി ഇപ്പോൾ മോഡൽ വെബ്‌സൈറ്റിൽ നിന്ന് നിശബ്‍ദമായി നീക്കം ചെയ്തു. ഇത് ഇനി വാങ്ങാൻ ലഭ്യമല്ലെന്ന് സൂചിപ്പിക്കുന്നു. റെബൽ 500 നും സമാനമായ വിധി നേരിടേണ്ടി വന്നു. ക്രൂയിസറിന്റെ ഇന്ത്യയിലെ ആദ്യത്തെ ഔദ്യോഗിക വിൽപ്പന ആയിരുന്നു ഇത്. എന്നിട്ടും ഇതും വെബ്‌സൈറ്റിൽ നിന്ന് നീക്കം ചെയ്‌തു.

എന്താണ് കാരണം?

അതേസമയം ഹോണ്ട ഇന്ത്യയ്ക്കായി ഈ മോട്ടോർസൈക്കിളുകളുടെ പരിമിതമായ എണ്ണം യൂണിറ്റുകൾ അനുവദിച്ചിരുന്നുവെന്നും ആ യൂണിറ്റുകൾ ഇപ്പോൾ വിറ്റുതീർന്നിരിക്കാമെന്നുമാണ് വിശദീകരണം. കമ്പനി പലപ്പോഴും ഈ സമീപനം സ്വീകരിക്കുന്നു. സ്റ്റോക്ക് തീർന്നാൽ ഒരു മോഡൽ നീക്കം ചെയ്യുന്നു. ഇതിനർത്ഥം സ്ഥിരമായ ഉത്പാദനം നിർത്തണമെന്നില്ല. ഹോണ്ട ഇന്ത്യൻ വിപണിയിൽ പുതിയ യൂണിറ്റുകൾ അനുവദിച്ചാൽ, ഈ മോട്ടോർസൈക്കിളുകൾ ഒരുപക്ഷേ തിരിച്ചുവന്നേക്കാം. പക്ഷേ നിലവിൽ ഇക്കാര്യം അനിശ്ചിതത്വത്തിലാണ്. അടുത്തിടെ, ഹോണ്ട CB300R ന്റെ കാര്യത്തിലും ഇതുതന്നെ ചെയ്തു, അത് അതിന്റെ വെബ്‌സൈറ്റിൽ നിന്ന് നീക്കം ചെയ്തു.

ഹോണ്ട CBR1000RR-R ഫയർബ്ലേഡ് SPയിൽ 999 സിസി, ലിക്വിഡ്-കൂൾഡ് ഇൻലൈൻ-ഫോർ എഞ്ചിൻ ആണഅ ഹൃദയം. ഈ എഞ്ചിൻ 215 bhp കരുത്തും 113 Nm ടോർക്കും ഉത്പാദിപ്പിക്കുന്നു. 6-സ്പീഡ് ഗിയർബോക്സും റൈഡ്-ബൈ-വയർ ത്രോട്ടിലിനൊപ്പം ഒരു ബൈ-ഡയറക്ഷണൽ ക്വിക്ക്ഷിഫ്റ്ററും ഇതിൽ സജ്ജീകരിച്ചിരിക്കുന്നു. ഭാരം കുറഞ്ഞ അലുമിനിയം ഡയമണ്ട് ഫ്രെയിം ഉപയോഗിച്ചാണ് മോട്ടോർസൈക്കിൾ നിർമ്മിച്ചിരിക്കുന്നത്.

471 സിസി ലിക്വിഡ്-കൂൾഡ്, 4-സ്ട്രോക്ക്, 8-വാൽവ് പാരലൽ ട്വിൻ-സിലിണ്ടർ എഞ്ചിനാണ് ഹോണ്ട റെബൽ 500-ന് കരുത്ത് പകരുന്നത്. ഈ എഞ്ചിൻ 45.60 എച്ച്പിയും 43.3 എൻഎം ടോർക്കും ഉത്പാദിപ്പിക്കുന്നു, കൂടാതെ 6-സ്പീഡ് ഗിയർബോക്സുമായി ഇത് ജോടിയാക്കിയിരിക്കുന്നു. മോട്ടോർസൈക്കിളിൽ ടെലിസ്കോപ്പിക് ഫ്രണ്ട് ഫോർക്കുകളും പിന്നിൽ ഷോവ ഡ്യുവൽ ഷോക്ക് അബ്സോർബറുകളുമുണ്ട്. ഇതിന്റെ ബ്രേക്കിംഗ് സിസ്റ്റത്തിൽ മുന്നിലും പിന്നിലും യഥാക്രമം 296 എംഎം, 240 എംഎം ഡിസ്ക് ബ്രേക്കുകൾ ഉൾപ്പെടുന്നു, ഡ്യുവൽ-ചാനൽ എബിഎസ് സ്റ്റാൻഡേർഡായി നൽകിയിട്ടുണ്ട്.

റെബൽ 500 നിലവിൽ ഇന്ത്യയിൽ 5.49 ലക്ഷം രൂപ എക്സ്-ഷോറൂം വിലയിൽ ലഭ്യമാണ്. സിബിയു (കംപ്ലീറ്റ്ലി ബിൽറ്റ് യൂണിറ്റ്) റൂട്ട് വഴിയാണ് ഇത് വരുന്നത്, ഗുഡ്ഗാവ്, മുംബൈ, ബെംഗളൂരു എന്നിവിടങ്ങളിലുള്ള ഹോണ്ടയുടെ ബിഗ് വിംഗ് ടോപ്ലൈൻ ഡീലർഷിപ്പുകൾ വഴിയാണ് ഇത് വിൽക്കുന്നത്. ഹൈവേയിൽ മതിയായ പ്രകടനം നൽകുന്നതും സുഖകരവും നഗര സൗഹൃദപരവുമായ മോട്ടോർസൈക്കിൾ ആഗ്രഹിക്കുന്ന റൈഡർമാർക്കായി പ്രത്യേകം രൂപകൽപ്പന ചെയ്തിട്ടുള്ളതാണ് റെബൽ 500.