10 വർഷത്തിനിടയിലെ ഏറ്റവും മികച്ച ത്രൈമാസ വളർച്ച രേഖപ്പെടുത്തി നെസ്‌ലെ ഇന്ത്യ

നെസ്‌ലെ ഇന്ത്യ ഒരു ദശാബ്ദത്തിനിടയിലെ ഏറ്റവും മികച്ച ത്രൈമാസ വളർച്ച രേഖപ്പെടുത്തി. 2026 മാർച്ച് 31 ന് അവസാനിച്ച പാദത്തിൽ ആഭ്യന്തര വിൽപ്പന 23.1% ഉയർന്ന് ചരിത്രത്തിലെ ഏറ്റവും ഉയർന്ന നിരക്കായ 6,445 കോടി രൂപയിലെത്തി. പരസ്യ ചെലവിലെ വർദ്ധനവും, കൺഫെക്ഷനറി, പെറ്റ് ഫുഡ് തുടങ്ങിയ വിഭാഗങ്ങളിലെ മുന്നേറ്റവുമാണ് ഈ നേട്ടത്തിന് പ്രധാന കാരണം.

കൊച്ചി: ആഭ്യന്തര വിൽപ്പനയിൽ ഒരു ദശാബ്ദത്തിനിടെയുള്ള ഏറ്റവും മികച്ച ത്രൈമാസ വളർച്ച രേഖപ്പെടുത്തി നെസ്‌ലെ ഇന്ത്യ. 2026 മാർച്ച് 31 ന് അവസാനിച്ച നാലാം പാദത്തിൽ കമ്പനിയുടെ ആഭ്യന്തര വിൽപ്പന 23.1 ശതമാനം ഉയർന്നു. ചരിത്രത്തിലെ ഏറ്റവും ഉയർന്ന 6,445 കോടി രൂപയിലേക്ക് ആഭ്യന്തര വിൽപ്പന എത്തി. ഇതോടൊപ്പം 26.3 ശതമാനം പ്രവർത്തന ലാഭവും കമ്പനി നേടി. ഉപഭോക്തൃ കേന്ദ്രീകൃതമായ പ്രവർത്തനങ്ങളിലൂടെയും ശക്തമായ ബ്രാൻഡ് സാന്നിധ്യത്തിലൂടെയുമാണ് ഈ നേട്ടം കൈവരിച്ചതെന്ന് കമ്പനി പറയുന്നു.

പരസ്യ ചെലവ് 50 ശതമാനത്തിലധികം ഉയർത്തിയത് കുത്തനെയുള്ള വിൽപ്പന വളർച്ച നേടാൻ സഹായിച്ചു. കഴിഞ്ഞ വർഷം ഇതേ കാലയളവിലെ വിൽപ്പന കണക്കുകളെ അപേക്ഷിച്ച് മൊത്തം വിൽപ്പനയിൽ 23.4 ശതമാനമാണ് ഉണ്ടായത്. 2025-26 സാമ്പത്തിക വർഷത്തിൽ നെസ്‌ലെയുടെ മൊത്തം വിൽപ്പന 23,071.5 കോടി രൂപയാണ്. അറ്റാദായം 3,544.6 കോടി രൂപയുമാണ്.

കൺഫെക്ഷനറി, പൗഡർ & ലിക്വിഡ് ബെവറേജസ്, പെറ്റ് ഫുഡ് വിഭാഗങ്ങളിലെ മികച്ച മുന്നേറ്റമാണ് നേട്ടത്തിൻ്റെ പ്രധാന കാരണം. പ്രിപയേർഡ് ഡിഷസ് വിഭാഗവും മികച്ച മുന്നേറ്റം നടത്തി. ക്വിക്ക് കൊമേഴ്‌സ് ചാനലുകളും വളർച്ചയ്ക്ക് വലിയ പിന്തുണ നൽകി. രാജ്യത്തെ 2.16 ലക്ഷം ഗ്രാമീണ വിപണികളിലേക്ക് സാന്നിധ്യം വ്യാപിപ്പിച്ച കമ്പനി, മാലിദ്വീപ്, പാപ്പുവ ന്യൂ ഗിനിയ, യുകെ, യുഎസ് ഉൾപ്പെടെ 28 രാജ്യങ്ങളിലേക്ക് കയറ്റുമതിയും വർധിപ്പിച്ചു.