രഞ്ജിയില്‍ ഫോം തുടര്‍ന്ന് ആയുഷ് ബദോനി; ഗുജറാത്തിനെതിരെ ഇരട്ട സെഞ്ചുറിക്ക് പിന്നാലെ ജാര്‍ഖണ്ഡിനെതിരെ സെഞ്ചുറി

രഞ്ജി ട്രോഫിയിൽ ഗുജറാത്തിനെതിരായ ഇരട്ട സെഞ്ച്വറിക്ക് പിന്നാലെ ജാർഖണ്ഡിനെതിരെയും ഡൽഹി ക്യാപ്റ്റൻ ആയുഷ് ബദോനിക്ക് തകർപ്പൻ സെഞ്ച്വറി. ആദ്യ ദിനം കളി നിർത്തുമ്പോൾ ബദോനിയുടെയും സുമിത് മാഥൂറിന്റെയും മികവിൽ ഡൽഹി 5 വിക്കറ്റ് നഷ്ടത്തിൽ 309 റൺസെടുത്തിട്ടുണ്ട്.

റാഞ്ചി: രഞ്ജി ട്രോഫി സീസണിലെ മികച്ച ഫോം തുടരുന്ന ഡല്‍ഹി ക്യാപ്റ്റന്‍ ആയുഷ് ബദോനി, ജാര്‍ഖണ്ഡിനെതിരായ മത്സരത്തിന്റെ ആദ്യ ദിനം തകര്‍പ്പന്‍ സെഞ്ച്വറി നേടി. റാഞ്ചിയിലെ ജെ എസ് സി എ ഇന്റര്‍നാഷണല്‍ സ്റ്റേഡിയം കോംപ്ലക്‌സില്‍ നടക്കുന്ന മത്സരത്തില്‍ ആദ്യ ദിനം കളി നിര്‍ത്തുമ്പോള്‍ ബദോനിയുടെ (106*) കരുത്തില്‍ ഡല്‍ഹി 5 വിക്കറ്റ് നഷ്ടത്തില്‍ 309 റണ്‍സെന്ന ശക്തമായ നിലയിലാണ്. ഗുജറാത്തിനെതിരായ ഇരട്ട സെഞ്ച്വറി നേടിയതിന് തൊട്ടുപിന്നാലെയാണ് ബദോനിയുടെ ഈ മിന്നും പ്രകടനം. 122 പന്തുകളില്‍ നിന്ന് 11 ഫോറുകളും രണ്ട് സിക്‌സറുകളും അടങ്ങുന്നതാണ് അദ്ദേഹത്തിന്റെ ഇന്നിംഗ്‌സ്.

ഡല്‍ഹിയുടെ ടോപ്പ് ഓര്‍ഡര്‍ ബാറ്റര്‍മാര്‍ക്ക് മികച്ച തുടക്കം ലഭിച്ചെങ്കിലും അത് വലിയ സ്‌കോറുകളിലേക്ക് മാറ്റാന്‍ കഴിഞ്ഞില്ല. ഗുജറാത്തിനെതിരെ 199 റണ്‍സ് നേടിയ ഓപ്പണര്‍ പ്രിയാന്‍ഷ് ആര്യ 39 റണ്‍സിനും, സനത് സംഗ്വാന്‍ 37 റണ്‍സിനും പുറത്തായി. മൂന്നാം നമ്പറിലിറങ്ങിയ യഷ് ദുള്‍ 29 റണ്‍സും ആയുഷ് ദൊസേജ 29 പന്തില്‍ 21 റണ്‍സുമെടുത്ത് മടങ്ങി. അഞ്ചാം നമ്പറിലാണ് ക്യാപ്റ്റന്‍ ബദോനി ക്രീസിലെത്തിയത്. 181 റണ്‍സിന് 5 വിക്കറ്റ് എന്ന നിലയില്‍ ഡല്‍ഹി പതറിയ ഘട്ടത്തില്‍ സുമിത് മാഥൂറിനെ (50*) കൂട്ടുപിടിച്ച് ബദോനി ഇന്നിംഗ്‌സ് മുന്നോട്ട് നയിക്കുകയായിരുന്നു. പിരിയാത്ത ആറാം വിക്കറ്റ് കൂട്ടുകെട്ടില്‍ ഇരുവരും ചേര്‍ന്ന് ഇതുവരെ 128 റണ്‍സ് കൂട്ടിച്ചേര്‍ത്തിട്ടുണ്ട്.

കഴിഞ്ഞ മത്സരത്തില്‍ ഗുജറാത്തിനെതിരെ ബദോനി 217 റണ്‍സ് നേടിയിരുന്നു. അന്ന് പ്രിയാന്‍ഷ് ആര്യയ്‌ക്കൊപ്പം 234 റണ്‍സിന്റെ കൂട്ടുകെട്ടുണ്ടാക്കി ഡല്‍ഹിക്ക് ഒന്നാം ഇന്നിംഗ്‌സ് ലീഡ് നേടിക്കൊടുക്കാന്‍ അദ്ദേഹത്തിന് സാധിച്ചു. സീസണിലെ ആദ്യ മത്സരത്തില്‍ ബംഗാളിനെതിരെ ബൗളിംഗിലും തിളങ്ങിയ ബദോനി, 43 റണ്‍സ് വഴങ്ങി 5 വിക്കറ്റ് വീഴ്ത്തുകയും രണ്ടാം ഇന്നിംഗ്‌സില്‍ 85 റണ്‍സ് നേടുകയും ചെയ്തിരുന്നു.

റെഡ് ബോള്‍ ഫോര്‍മാറ്റില്‍ ഇതിനകം തന്നെ തന്റെ മികവ് തെളിയിച്ച 26-കാരനായ ബദോനി, 2024 നവംബറില്‍ ജാര്‍ഖണ്ഡിനെതിരെ പുറത്താകാതെ 205 റണ്‍സും 2025-ല്‍ ദുലീപ് ട്രോഫിയില്‍ ഈസ്റ്റ് സോണിനായി പുറത്താകാതെ 204 റണ്‍സും നേടിയിട്ടുണ്ട്. കഴിഞ്ഞ ആഴ്ച ഗുജറാത്തിനെതിരെ നേടിയത് ഫസ്റ്റ് ക്ലാസ് ക്രിക്കറ്റിലെ അദ്ദേഹത്തിന്റെ മൂന്നാം ഇരട്ട സെഞ്ച്വറിയായിരുന്നു.